Read Managalasi Ruku 7 Bible Online

Ruku 7 - Managalasi bible

Ruku 7

¹Jesuho ijaho emaa 'waravume pa'arejumakavi'i 'urine Kapeniami va'ana.

²'E'eme vea kajikano sorutia natohwijihuni pwea mamaijaho atama 'unama rena kwa'i 'ahauma venana.

³Vea ka'ene hu hejume Jesuho rou 'wavuma heji'i hu Jua 'aho'a irechamiume roe Hu jarime 'warave vu'e huni pwea kaji veje mara'amarono irechamiume roara.

⁴Pu Jesuni roe jarime ijá 'wava Eakaho nimaa nimaa'omo Ara hu ni'aja'ipisa A mamaa veja'a.

⁵Hu ehu núna oja miharena huhuso Sinakoku núna venuhana 'wavara.

⁶'Ejume Jesuho aneja vene pu pu'úmo va'ana. Hu ara rori samatu'u re'eme ijí sorutia natohwa kajara napuhwaha 'aho'a irechamiume roara. Pura roe Hu ijá 'wava Natohwe haha paahina'amana. Ara nuni sei rohuna areria pana.

⁷Ijihuni hahi na vwihajujaho na ea sisea'omo nara Oni vuhuna areria pana. Ara ma iraru 'warave nuni pwea kajaho maranama.

⁸Na 'u'o harura rukina'omo sorutia 'aho'a nuni harura hari hijura. Nara ea 'aho'a ijá 'iavure Va'a! 'iavu'e pu va'ura. 'Ene pina Roa! 'wavu'e hu rouna. Na nuni pwea ka'ene kaukara veji'inijaho ike vena 'wavujaho hu venuna 'wama 'wamana.

⁹Jesura ijí henajaho oja hwa'usahume aroma ea mapoka kajija ijá 'iama Eakara nimaa ronuja'ina'e ike Isureri opuni kwaa vajakaho ea hua'ina papiunavuta 'iamana.

¹⁰Ea ka'ene ona apena roa kajijahija sei 'unama vai'i kavajaho huni pwea ka'ene atami 'unamajaho nimaranana. Jesura Amunijihuni Hariha Vejume 'Urinajina

¹¹Ijihuni túna'ijino Jesuho ara iha Naini va'eme Huni tisaiporua 'ee ea mapoka pu pu'úmo va'ajivara.

¹²Hu ijí ara kajihuni vwichajiami va 'e'u'eme pu ea'e kwanana'i 'ahiume apena roara. Ijí ea ka'ene kwamajaho amuna pipuni hariha kwinuna'omo ijara kwavume ea mapoka pu pu'úmo roajivara.

¹³'Ejume vea ka'ene Natohwijara hu kamajaho Hu niho'o temuvume ijá 'wama Niramujaho arema 'wamana.

¹⁴'Enarame hu va'e ea ka'ene suhi mwavi'inijaho iji 'unavume ea ka'ene kima va'ajaho arema namijara. 'Ejume Hu ijá 'wama Kivasakera Na 'waravukúne 'urina! 'wamana.

¹⁵'Ejume ea ka'ene kwama kajaho kú'o 'urine asuma hiji'i vu'a 'waravume Hu apenapi kú'o oaha'e mahana.

¹⁶Ea mapoka niho'o tea junavume pu Godiho ta'aroha ijá 'wava Núni vajakino poropetia ni'ima'ura núni roana 'ee Godiho ehwaha ura veti'i roana 'wavara.

¹⁷'Ejume ike Huni pinana kajaho 'wama apene va'e Jutia useme 'ee ijí ara rora kajaho he parajara. Joni Papitisita Oni 'Ona Apena Roara

¹⁸Joni oni tisaiporuepo uneunecha mapoka ka'ene rejume pu kivajaho Joni ni'wara parajara.

¹⁹'Ejume Jonira huni tisaiporua no'ohe'i 'umenaume roume irechamiume Natohwiji apoma he'i va'ara. Pu va'e ijá 'wava 'Ú A ea ka'ene rohuna'e 'waruvajina ho nú ea pina'e sa'eja? 'wavara.

²⁰Pu roe Jesuho piuname apoma ijá 'wava Joni Papitisitara irechamúume nú apora'i 'ahúume roara. 'Ú A ea ka'ene Jonira rohuna'e 'warumajina ho nú ea pina 'ajahe hi'eja? 'wavara.

²¹Vea ijiha kajaho Hu ea mapoka vejume atama sonahie 'ee haha hianavi'ina vejume sonahie 'avena sisea siomahe 'ee ea mapoka vejume nia niriara.

²²'Ejume Hu eha vene ijá 'iama 'Unama va'e uneka ka'ene ja kime 'ee hejajaho Joni 'wara'avara. Ea ka'ene nia supavi'ina nia niriu'e 'ee irima'ina namina oju'e 'ee ea reporosia rukina maraniu'e 'ee ataa pa'ana veju'e maraniu'e 'ee ea ka'ene kwamasahi'ina veju'e 'urina hiju'e 'ee Godoni vu'a mamaa ka'ene ea pivusahi'ina najahuji 'wara'avara.

²³Ea irara Nuni hahijihuna'e paju'amajaho niho'o hu merajahi'ina 'iamana.

²⁴Joni oni tisaiporu va'umakivi'i Hu Joni ronarena ea mapoka kajija 'waramana. Hu ijá 'iama Vea ka'ene ja nechi'i va'ajivajaho ja iraka'e ka'i va'are? 'Ú kurika asiasia 'anae varivarimuji ka'i va'are?

²⁵Ja ijaho iraka'e ka'irono va'are? Ea pini uneunecha mamaa sama hija ka'i 'ahiume va'ara raka? Heha! Ea ka'ene ija'ina'e hijujija ateha mavarasa'ini same 'ee ara mamaa ka'ene kiniepo hijujino hijura.

²⁶Ja ijino va'ajaho iraka'e ka'irono va'are? 'Ú poropetia kavare? Kaena. Na ja 'waravu. Hu poropetia asitaha hunanuna.

²⁷Hua ronarena heha vaji ika'ina'e vejara.Heha! Na nuni 'ona oji'ina ranave hu mako Oni una'i va'e Oni 'unama amairi'ena 'úmana 'iamana.

²⁸Na niho'o nimaa nimaa ja 'waravu Ea ka'ene napapo nahenaari vajijaho ei pini Joni asihuna areria pana. 'Enakaivo ea ka'ene iviamajai Godoni ari ma'u'ua renujara niho'o Joni asima paranuna 'iamana.

²⁹Ea ka'ene takisia'e apeji'ina 'ee ea mapoka kajija Godoni 'unama mamaa aririji hene vejume Jonira ija 'unirame toa vaji samahana.

³⁰'Enakaivo Parasia 'ee roia Godoni maiji pataarohume Joniho toa pasamana.

³¹Jesu ijá 'iama 'Ú Na ea ka'ene iviamaa urijakihija iraki manura vene pu ea ichá'inijaho ki'ejo?

³²Pu areri sesamaapo maketi vaji hine uma'aravi'i hijuja'ina. Pu ijá 'umejure Nú hurisia jona'e hwasihajaho ja pajavavara. Nú virisia vejura kaivo ja paniravura.

³³Joni Papitisita roe 'iruma 'aura areme 'ee toa kisina paijume ja kame ijá 'wava 'Avena sisei ajimana 'wavara.

³⁴'Ejume Emaa Puni Hariha roe 'iruma ine 'ee toa iju'e ja ijá 'wavo Ea ike kaha. Hu 'iruma huhuso maha puna'i ine 'ee toa kisina mapoka ina nanamuna 'ee ea ka'ene takisia'e apeji'inijija 'ee ea sisesa pu'úmo napura venuna 'wavu.

³⁵Na nimaa nimaa'e vwihanare'i 'waravu. Ea ka'ene hena vwiha rukinijija pura ichá'ina vejujara najahujaho pu hena kavi'ina 'iamana. Jesura Saimani Ka'ene Parasi Ijihuni Sei Hinajina

³⁶'Enakaivo Parasia pini Hu va'e huni sei 'iruma i'amarono 'wamana. 'Ejume Hu Parasi ijihuni sei 'iruma i'i 'ahaume va'e asuma hinana.

³⁷Ijí ara natohwa vaja kajino napara pina sisea veji'i hinuna. Hu hejume Jesuho roe Parasia kajihuni sei 'iruma inu 'wavume henarena senisia kavapwa rukina apene roana.

³⁸'Ene roe Jesuni túna'i mumora rora Hunijino namine niravi'i Huni mumora 'aha huni nitua ariha 'aruvume huni húmata sapasa kajikano ijaho ukunahi'i Huni mumora tituhi'i senisia 'onahana.

³⁹'Ejume Parasia ka'ene Jesuni ona vejume roajara kamarena ijá rona Eakaho poropetia re'ipisa Hu naparakaho irane 'ee ea ichá'inijara Hu 'unamujaho hena kava'a. Ijihuni maijaho hu ea sisea veji'ina ronana.

⁴⁰Jesura ijá 'wama Saimani Na ura unenu'u pina a 'wara'i 'ahiu 'wamana. 'Ejume hu ijá 'wama Najahi'ine 'warima 'wamana.

⁴¹Jesura ijá 'wama Ea no'ohe'i ea monia'e vajihi'ini jihuni monia 'ekara. Ea pina monia mapoka (K100) 'ekume 'ee pina monia mapoka (K10) 'ekana.

⁴²Pu no'o ijí monia kajaho eha areria pavenahume hu pu ni'ajihe 'waravume pu eha pavajahara. 'Ú ea iraka sa'inijara hu oja niho'o natohwa'e mahane? 'wamana.

⁴³Saimanira eha vene ijá 'wama Na vwihajujaho ea ka'ene monia natohwa'e 'ekajarana 'wamana. 'Ejume Hu ijá 'wama Oni eha ijaho nimaa 'wamana.

⁴⁴'Ejume Hu aroma napara kaji kavi'i Saimani ijá 'wama 'Ú a naparakaho nikamo? Na oni sei routa vo a Nuni mumora kehuni toa pamihana kaivo hu huni nitui Nuni mumora some 'ee huni húmata sapasi Nuni mumora sirua ukunana.

⁴⁵A Na pa'ajorime ura manura veniana kaivo Na iki rouji rene hu hine Nuni mumora tituhi'i hinana.

⁴⁶A senisia paapena Nuni húmatakaho onihana kaivo hu Nuni momora senisi'i 'onihana.

⁴⁷Na nimaa nimaa 'waravo Huni sisea mapokijaho niho'o vwihajume pa'arenana. Ijihuna'e hu Na oja natohwa'e mihana. Ea irahuni sisea ma'uako pa'arenajaho hu ma'uaku'wi oja mihuna 'wamana.

⁴⁸'Ejume Jesura napara kajaho ijá 'wama Oni sisea vwihane arevu 'wamana.

⁴⁹'Ejume ea 'aho'a ka'ene ijí asuma hija kajipo kosarame ijá 'wava Eakaho irana'omo sisea 'u'o vwihane aremo? 'wavara.

⁵⁰'Enakaivo Jesura napara kajaho ijá 'wama Ara nimaa ronujara vejume maranaanakúne matauma va'a 'wamana.