Read Managalasi Ruku 9 Bible Online

Ruku 9 - Managalasi bible

Ruku 9

¹Hu Huni tisaiporu 'umenaume harura ka'ene 'avena sisea siomahuna 'ee atama'e veje sonahihunijaho mihana.

²'Enarena Hu irechamiume pu va'e Godoni arijihuni maijaho ea mapoka'e ea 'aho'a najahe ea atama rukiniji veje sonahi'avarono va'ajivara.

³Jesura ijá 'iama Ja va'aji'avajaho uneunecha pa'eka va'avara. Pijuha ka'ene pijumojujaho pa'eka'avare joni tuja pa'eka'avare joni 'iruma pa'eka'avare joni monia pa'eka'avare 'ee setia 'aho'a pa'eka'avara.

⁴Ja va'aji'eje ea irahipo ja hami 'ajorave ki'avajaho puni sea kajiru hinuva'o ara kajaho are'i kaivo 'urine ara pini va'avara.

⁵'Enakaivo ea irahipo ja pa'ajorame vu'akake pahe'avajaho ara kajaho are'i kaivo joni mumora 'ahi túa ka'ene navujaho taireve ari'amana. 'Ejakame ijara pu namahuna 'iamana.

⁶Pu arename va'ajime arara kajino Godoni Ira mamaa kaji najahe 'ee ea atama 'uniravi'inijijahija vejume maraniara. Heroti Puruva Retiajina

⁷Heroti ka'ene 'ajoha'inijara uneka ka'ene renuji henajaho ea 'ahopo ijá 'wava Joni kú'o 'urinana 'wavuma henarena hu puruva rejumakame niho'o jumana.

⁸Ea 'aho'a ijá 'wavare Iraija kú'o 'unama roana 'wavume 'aho'a ijá 'wava Poropeti nitama 'waravi'inijara kú'o 'urina roana 'wavara.

⁹Herotira ijá 'iama Nara Joni oni húmata ahatumahuta kaivo Ea ka'ene iviamaa pinana 'uriju'e na hejukaho irarane? 'iamana. 'Enarena hu Jesu ka'i 'ahau'e niri'i hinuna. Jesura Ea Mapoka (5,000) Tuasamahajina

¹⁰'Enarena apasoru 'unama roe Jesu pura raka ka'ene vejajaho 'waravara. 'Ejume Hu pu aherame ara ka'ene Petasaita 'wavujino pu pusumano va'ajivara.

¹¹'Ejumakame ea mapoka kajipo henareja pu 'ararihia va'ajivara. Hu pu 'ajorame 'ee aneja vene Godoni arijihuni vu'a 'warame 'ee ea ka'ene venae maranihuna ura renajija vejume maraniara.

¹²Vea va'o'irono ve'eme Huni ea iropu ropu no'o roe ijá 'wava Ea ikija irechamie arara ijino va'e 'iruma sarame ine 'ee notua. Ijihuni maijaho ike kwaakaho savasakúna 'wavara.

¹³'Enakavi'i Jesura ijá 'iama Jara 'iruma vajihe ija 'iamana. Pu eha vene ijá 'wava Nú kija no'one 'ee puretia iropu ijano navu. A ura rena'amajaho nú va'e 'iruma 'imene roe ea kija vajihe ija 'wavara.

¹⁴Parua niho'o mapoka mapoka'e (5,000) hijara. Hu Huni tisaiporu ijá 'iama 'Warave pu nia ani ani ea mapoka (50) ruha pini hije vu ruha pini ea mapoka (50) hina apena va'a 'iamana.

¹⁵Huni tisaiporu Hura 'warama ja'ina'e vene 'waravume pu asuma hijara.

¹⁶Jesura puretia iropune kija no'o 'eke akúpi 'ahi nia niri'i Godiho teamani 'wa'i kaivo tuachame Huni tisaiporua vajihume pu 'eke ea kaji vajihara.

¹⁷Pu ijume tú'amana. 'Ejume pu pwina ka'ene tú'avume irechavajaho tuja iropu ropu no'o 'eke vejume itu'usahara. Pitara Jesu Rona 'Waramajina

¹⁸Na'ii pini Jesuho huhusu Huni tisaiporua pu'úmo hine siporua 'onana. 'Enuva'o Hu pu aporama ijá 'iama Ja vwihajujaho ea mapokakija Na ea irane 'wavure? 'iamana.

¹⁹Pu Hu ijá 'wava Ea 'aho'a A Joni Papitisitana 'wavume ea 'aho'a A Iraijana 'wavu'e ea 'aho'a A poropetia nitama hijajipo kú'o 'urine hinu 'wavura 'wavara.

²⁰'Enakaivo Hu pu aporama ijá 'iama Ja ichá'ina vwihajo? Ja Na irana rojo 'iamana. Pitara ijá 'wama A Keriso ka'ene Godoni rena roajina 'wamana. Jesura Ahia Apene 'Ee Kwahuniji Rone 'Waramajina

²¹'Ejume Hu rurame ea pa'wara'avarono 'waramana.

²²Hu pu ijá 'iama Ema Puni Harihijaho ea mama'ina 'ee Sikuraipia epo veje haha ni'ima'ura hiame 'ee pu pataaro'eja. 'Ene pu Hu 'anae kwame na'ia no'opisu namareje kú'o 'urihuna 'iamana.

²³'Enarena Hu pu ijá 'iama Ea irara Nuni túna'i ro'i ve'amajaho hu huni oja makame mwe'a kakino huni uneunecha mapoka maki'i kaivo hu huni korosia apene Nuni túna'i ro'amana.

²⁴Ea irara huni hiiji ori ni'ajara'amajaho huni hiijaho ranahuna. 'Ene ea irara huni hiiji Nunijihuna'e Godoni vu'a mai maiu'ini jihuna'e rana'amajaho hu huni hia 'unanahuna.

²⁵Ei pini uneunecha ka'ene mwe'aka kehunijaho huna rerana'eje hia nimaa nimai ijí asina'ipisa hu maa iraka apeja'e?

²⁶Ea irara Nunijihuna'e Na pataarorihe 'ee Nuni ira pataaro'amajaho vea ka'ene Emaa Puni Harihijara Huni harura 'ee 'ona oji'ina arira maijihipuni harura 'ee Amoni harura vaji ro'amajaho hu 'u'o pataarohuna.

²⁷Na nimaa nimaa ja 'waravu. Ea ka'ene ja ike namijukija 'aho'a mai'o pakwamasa'eje Godoni Ara roe kahuna 'iamana. Ta'arohe Ani'ina Renajina

²⁸Hura 'waramajaho na'ia iropu no'opisu pa'are'eme Jesura Pita ho Joni ho 'ee Jemisi ho ijano aherame huri'a 'ahi siporua'e 'o'i 'ahaume va'ana.

²⁹Hu hine siporua'e 'o'eme Huni niura niho'o ta'arohe ani'ina rene 'ee Huni ateha niho'o sajasa'ina'e 'ee hanaji'ina'e renana.

³⁰Ni'aha kwino ea no'ohe'i pu pu'úmo namine vu'a 'wavara. Ea kajija Iraija'o Mosisi una.

³¹Pu niho'o hanana para'eme namine Hu hu'úmo Hura raka ka'ene mai'o Jerusaremi venareje vahunijihuni vu'a 'wavara.

³²Pita ho napuhwa pu'úmo nii vahivume notuara'omo 'urine nia niriuni'eme Huni hanaji'ina 'ee ea no'ohe'i pu pu'úmo namijajija kivara.

³³Ea kajija Hu raname va'eju'e Pitara Jesuho ijá 'wama Natohwe nú mamaa vena ro hijara. Nú ara vene pina One pina Mosisi one pina Iraija ona'e vehuna 'wamana. 'Enakaivo hu nimaa raka ka'ene 'waramajaho pavwihaji'i 'waramana.

³⁴Hu ijí 'wara'eme 'imiti puni huri saturihume Huni pwehija niho'o tea junamana.

³⁵'E'eme ijí 'imitia vaja kajino ira rena rouma he'eme ijá 'iama Ikaho Nuni Hariha ka'ene Nara iji pijahujinakúne Huni ira he'avara 'iamana.

³⁶'E'eme vu'a ka'ene hejajaho pa'are'eme Jesuho Huhusu ijí naminana. Ijihuna'e pu irano'a areme ira parasahareja uneka ka'ene vea kajino pu kavajaho ea 'aho'a pa'waravara. Jesura Paruisea 'Avena Sisei Rosamaji Vejume Maranajina

³⁷Ijihuni sú'uha kajino huri'a are'i kaivo arihe ro'eme ea mapoka kajipo roe Hu piunavara.

³⁸Heha! Ea pina ea rira kajino namine ijá 'umena Najuhi'ine na A jariravukúne nuni hariha ike kama. Hu nuni hariha nikwinu'wina.

³⁹Ike kama! 'Avena sisei kajara ajivu'e emaavaji'i 'unama apene onavu'e mwe'i 'one kuchikuchivi'i ira sapa ani re'eju'e namuna. Hu majamano veju'e hu hiamuna kaivo na'ia kwinu kwino paajima rurahuna.

⁴⁰Na Oni tisaiporua jarirame pura veje use'avarono 'waravura kaivo pu areri pavejara 'wamana.

⁴¹Jesura eha vene ijá 'iama Panimaa roji'ina ka'ene ea sisemaakije panimaa rojo? Na na'ia icharu ja pu'úmo hi'ejo? 'Ene Na na'ia icharu ja najaha apene va'ejo? 'iamana. 'E'ikaivo vu iji'a ea kajaho ijá 'wama Oni hariha ikino ahema roa 'wamana.

⁴²Hu sesamaa kajaho ro'eme 'avena sisea kajara 'anaa pi'onavume mwe'i 'one kuchikuchimana. 'Ejume Jesura 'avena sisea kajaho 'waravume 'ariha va'ume sesamaa kajaho marajumakavi'i omaha mahana. Jesura Kwahuniji Kú'o Nahama 'Waramajina

⁴³Ea kajipo ijí Godoni harura natohwa kaji kavajaho oja hwa'usahana. Pu ea mapoka ijí Hura uneunechaka mapoka ka'ene venaji kamareja oja hwa'usaha'eme Hu Huni tisaiporua ijá 'iama

⁴⁴Nara 'waravujaho niho'o parunami'avara. Emaa Puni Hariha apena ea 'ahopuni ija tahi ranahuna 'iamana.

⁴⁵'Enakaivo Hura 'warama jihuni maijaho mai'o pahejara. Pura hehunijaho vaji namujara juvumakame pu pahejara. 'Enakaivo pu tea junavume paapovara. Irara Natohwane?

⁴⁶'Enarena Huni tisaiporu puni vaja kajaho ea irara ni'ina 'wamareja hine nakaravara.

⁴⁷Jesura pu iraka ka'ene vwihajujaho kimarena sesamaa pina apena roe Huni rori ranavume nami'eme ijá 'iama

⁴⁸Ei pini Nunijihuna'e sesamaa ikera'ina hami 'aha'amajaho hu Naa'e hami 'ahihuna. 'Ene ea irara Naa'e hami 'ahi'amajaho Godi ka'ene Naa'e ranamiume rouji 'ajome hami 'ahaa avahuna. Ea irara ma'u'ua rena joni vajakino hi'amajara ea natohwa rehuna 'iamana. Ea Irara Ja Pu'úmo Paninakaramujaho Jona

⁴⁹Jonira eha vena ijá 'wama Natohwe nú ka'eme ea pina Oni ihi 'urahi'i 'avena sisea siomahume nú hu are'amarono 'waravara. Ijihuni maijaho hu nú pu'úmo pa'urahe onuna 'wamana.

⁵⁰Jesura hu ijá 'wama Ja paki'eje tanu'ura'ava. Ijihuni maijaho ea irara ja pu'úmo paninakaramujaho hu ja pu'úmo renuna 'wamana. Sameria Vaji Ara Pini Jesu Pataarohajina

⁵¹Hura vahuni vea nitura'eme 'urine aneja vene Jerusaremi vahuna vwihaji'i hinana.

⁵²Hu ijí va'amarono ea nimako irechamiume pu va'e Sameria opuni ari uneunecha 'eke amairi'irono va'ajivara.

⁵³'Enakaivo ara kaji'urijija pataarohara. Ijihuni maijaho Hu Jerusaremi va'ujihuna'e pu pataarohara.

⁵⁴'Ejume pu ijí kamareja Huni tisaiporu Jemisi'o Joni'o ijá 'wava Natohwe A ura rena'amajaho nú 'warave vena kahi akúpa 'ahi rena ariha roe pu rena'ena 'wavara.

⁵⁵'Ejume Hu aromakivi'i pu 'uraraha ijá 'iama 'Avena iraka sa'inijara avanujaho ja mai'o pahena pakavu?

⁵⁶Ijihuni maijaho Ema Puni Harihijara roajaho emaa puni hia patiraku'i 'ahaume roana kaivo emaa'e ni'aji'i roana 'iamana. 'Enareja pu ari pini va'ara. Jesu Pa'arariha'iro 'Unama Savujina

⁵⁷'Ejume pu 'unama toi va'eme ea pini Jesu ijá 'wama Kwaa ichihichihi va'amajaho na A hu'úmo vuhuna 'wamana.

⁵⁸'Ejume Jesura ijá 'wama Achi'a mwe'i vaji ahejure 'ee uka nesa rukina kaivo Ema Puni Harihijara ruha ka'ene nene 'ee siheria vena hihuna pa'ana 'wamana.

⁵⁹'Ejume Hu ei pina ijá 'wama 'Ararihie roa 'wamana. 'Enakaivo hu ijá 'wama Natohwe ijinakúne asinamie na marako va'e nuni oma apene kwananavuma 'wamana.

⁶⁰'Enakaivo Hu ijá 'wama Ea ka'ene kwavi'ina kajaho maka'eje kwamasahuna kajipo apena va'e ranava kaivo a va'e Godoni arijihuni vu'a ea 'aho'a 'wara'amana 'wamana.

⁶¹'Ejume ea pina 'u'o ijá 'wama Natohwe na 'arariha'ejakúne 'wive na va'e kachihu nuna marako'a 'ajorame rouma 'wamana.

⁶²'Ejume Jesura ijá 'wama Ea irahipo aneja vene juara meji'i hine majamano aroma niriujija niho'o Godoni 'unamijino vahuna areri pana 'wamana.