Read Managalasi Joni 10 Bible Online

Joni 10 - Managalasi bible

Joni 10

¹Na nimaa nimaa 'waravu. Ea irara sipi epuni vwichi paaru'ikaivo ani ajima arihujaho hu areri nesa apeji'ina.

²'Enakaivo ea ka'ene vwichi arume va'ujija pu sipi 'ajohi'ina.

³'Eju'ukame ea ka'ene vwicha 'ajohi'ina kajara vwicha tirasa'eju'e hu huni sipi ihi 'uriha 'umenau'e pu huni ira hene kavukivi'i hu aherame samaumai va'una.

⁴'Ejukivi'i hu huni sipia irechavu'e usevukivi'i hu urane va'eju'e huni sipia huni ira hene 'ararihaura.

⁵Pu niho'o ea ani'ina puni túna'a pa'ararihie va'ura kaivo pu juhama juhaha va'ura. Ijihuni maijaho pu ea 'ani'inijihipuni ira paheju jihuna'e avajura 'iamana.

⁶Jesura haa ikaho 'waramana kaivo Hu raka ka'ene 'waramajaho pu pahejara. Jesuho Sipia 'Ajohi'ina Mamaa

⁷'Ejumakame Jesu kú'o 'waramarena ijá 'iama Na nimaa nimaa 'waravu Na sipia epuni vwicha.

⁸Ea maho'o ka'ene nimaraku roajija nesa apeji'ini jihuna'e sipi puni ira pahejura.

⁹Na vwicha'omo ea irara roe Nuni vaji aru'amajaho Na hu ni'ajahuna. 'Ejakame hu roe arume 'ee va 'e'uji'i 'iruma piunihuna.

¹⁰Ea nesa apeji'inijara roujaho hu nesa ape'i roe 'ee ea 'anie kwamasahe karokaha vehunijiru roana kaivo Na iviamaa roujaho majama hihuna apena routa. Ea niho'o nimaa nimaa majama hina vahuna areri rena paranihuna.

¹¹Na niho'o sipi 'ajohi'ina mamaa. Sipia 'ajohi'ina mai huni oja sipia kajihi mihujihuna'e ijí sipia kajihipuni jihuna'e Hu kwa'ena.

¹²Ea hu eha apehunijiru vwihaji'i kaukara venujaho hu sipia pa'ajohi'ina'e 'ee hu sipia anesura pana. 'Ena'omo 'ua neapo roajivu'e kimujaho hu aseha va'ika'i sipia irechamiu'e 'ua kajipo sipia kajija mwatumiu'e juhaha ani ani va'ajivura.

¹³Ea eha apehunijiru vwihaji'i kaukara venujihuna'e hu sipia puni oja hami pavwihanuna kaivo aseha va'una.

¹⁴Na sipia 'ajohi'ina mamaa 'ee Na Nuni sipia hena kivu'e pu Na hena kivura.

¹⁵Areri Amora Na hena kimuja'ina'e Na Amo hena kavura'omo Na sipia punijihuna'e kwahuna.

¹⁶'Ee Nuni sipia 'aho'a ka'ene iki mai'o pahijujaho 'u'o Na aherama roakame pu Nuni ira hehuna. 'Ejakame pu ahuma hije sipia 'ajohi'ina kwinu rehuna.

¹⁷Na Nuni haha ranave pa'arejakavi'i kú'o 'unama apehuni jihuna'e Amo Na oja mihu.

¹⁸Ei pini Na apenie va'a 'anihuna pana kaivo Na Nuni ura ijino pu mihakame pu 'anihuna. Nuni harura areri namuna'omo Na pu mihe 'anihuna kaivo Nuni harura areri namujihuna'e Na kú'o 'unama apehuna. Ike vu'akaho Amouna'i apejuta 'iamana.

¹⁹Ijí Huni vu'a kaji henareja Juapuni vaja kú'o ahaamana.

²⁰Ea mapoka pu ijá 'wava Hu 'avena sisei ajivukame nanamu. Rakijihuna'e ja Huni vu'a hejo? 'wavara.

²¹'Enakaivo ea 'ahopo ijá 'wava Ea ka'ene 'avena sisei ajima'inijija vu'a ija'ina areria pa'waruvura. 'Ú ea ka'ene 'avena sisei ajima'inijija ea ka'ene nia supama'inijija areria venau'e maraniure? 'wavara. Jesu Pataarohajina

²²Ijí vea kajaho Jerusaremi sosi vea renana.

²³'Ene atuatahuni vea re'eme Jesuho Temiporu ka'ene Saramani oni 'urotiji 'urahonana.

²⁴'E'eme Juapo roe outihe nami'i kaivo ijá 'wava A vea icharo nú pisimúe A rane pa'úmo? 'Ú A Keriso re'amajaho nahama samai 'waruma 'wavara.

²⁵'Ejume Jesu eha vene pu ijá 'iama Na ja ni'waravuta kaivo ja niho'o panimaa roju. Uneunechaka Nara Nuni Omijihuni iha toi vejujipuhipo Na Ea iraho najahu.

²⁶'Enakaivo ja panimaa rojujihuni maijaho ja Nuni sipi pa'ajihuna'e avaju.

²⁷Nuni sipia Nuni ira hejura. 'Eju'e Na pu heju'e pu Nuni túna'i 'ararihie ojura.

²⁸Na pu majama hihuna vajihu jihuna'ee pu papa'arehuna. 'Ee pu Nuni ija tahi hijujihuna'e ea 'ahopo 'etujihuna areria pana.

²⁹Ijihuni maijaho Amora pu Na vajiha jihuna. Hu niho'o harura rukina'omo ea pina Hu niho'o paasimana. Ea ka'ene Amoni ija tahi hijujijahija niho'o ei pini areri pa'etujahuna.

³⁰Na Amo'i nikwinuna 'iavume Juapo muni 'eke kú'o Hu 'ana'i vejara.

³²Jesu eha vena ijá 'iama Amouna'i uneunecha mapoka mavarasa'i rena roume Na najahuta kaivo uné rakijihuna'e ja Na muni 'ani'iro vejo? 'iamana.

³³'Ejume Juapo eha vena ijá 'wava Nú A uneunecha mamai ka'ene venajihuna'e nú muni 'ana'i vehuna pana kaivo A emaa kaivo A Godi 'úmujihuna'e avaju 'wavara.

³⁴Jesu eha vena ijá 'iama Joni tamana vaji ika'ina vejara Na ja godia 'iavute? 'iamana.

³⁵Hu pu godia 'ia'amajaho Godi oni Ira pununa'i rena roajihuna'e Godi oni Ira areri paruarahuna.

³⁶Ja Ea ka'ene Amora iji pijaharena ranavume iki mwe'i roaji 'ijaha avajo? Ijihuni maijaho Na Godoni Hariha 'iavu jihuna'e avajo?

³⁷Na Nuni Omijihuni kaukara paveja ki'avajaho ja Na panimaa ro'avara.

³⁸'Enakaivo Na Huni kaukara veja ki'avajaho ja Na panimaa ro'avajaho nijina kaivo kaukara mapoka ka'ene Na vejujaho hene kimareje nimaa ro'avara. 'Enareje Amoho Nuni vajine Na Amo oni vajijaho hena kiha 'iamana.

³⁹'Ejume ijihuni hahi pu kú'o apene 'ana'iro vejara. 'Enakaivo pu Hu ape'i vejumakivi'i puni vaja kaji naminu va'o asitaha va'ume niho'o pakame paape'eme 'e va'ana.

⁴⁰'E'ikaivo kú'o va'e Jotani toa ona kara'i ruha ka'ene Jonira ea maraku toi samaajino va'e hinana.

⁴¹'E'eme ea mapoka Huni roara. 'Eji'i ijá 'wava Joni uneunecha ani'ina ika'ina pavenana kaivo Jonira Ea kake rona 'warumajaho nimaa nimaa 'úmana 'wavara.

⁴²'Ene ea mapokaka ijí hijajija nimaa rojara.