Read Managalasi Joni 13 Bible Online

Joni 13 - Managalasi bible

Joni 13

¹Pasova vea mai'o paape'eme Jesu henajaho Huni vea ka'ene kú'o Omahoni va'ika'i mwe'ake arehunijaho niroe apenana. 'Ena'omo Hu Huni ea Humaa ka'ene mwe'i hijuji oja miha apene va'u va'o va'e 'urí 'e'unana.

²Pu hine 'iruma i'eme 'avena siseijara Jutasi Isikariatiho Saimani oni harihi jihuni oja vaji Hu nahama 'warahuni vwiha niranamana.

³Amoho uneunecha mapoka Huni ija 'ahi irechame 'ee Hu Godi oni rena roana'omo Hu kú'o 'unama Godi oni vahunijaho nihena kamana.

⁴'Iruma i parane 'urine Huni ateha jahe'ika'i taverui 'ahi iramana.

⁵'Enarena Hu toa tevua vaji usearena Huni tisaiporu puni mumora somahi'i taverua ka'ene Hura 'ahi iramajino sirua 'umahana.

⁶'Enarena Hu Saimani Pita oni roume Pitara ijá 'wama 'Ú Natohwe A nuni mumora somi'ena? 'wamana.

⁷'Ejume Jesu eha vene ijá 'wama Nara veju kehuni maijaho a iviamaa pahenu. 'Ena'omo a túna'i hena kahuna 'wamana.

⁸Pita ijá 'wama A niho'o nuni mumora pasomihuna 'wamana. 'Ejume Jesura eha vene hu ijá 'wama Na oni mumora pasoma'ujaho a Nuni pwina pana 'wamana.

⁹'Ejume Saimani Pitara ijá 'wama Natohwe nuni mumoraru pana kaivo nuni ija 'u'o somihe 'ee húmata somi'amana 'wamana.

¹⁰'Ejume Jesu hu ijá 'wama Ea ka'ene toa nirúhi'inijija kú'o toa parúhura kaivo mumoraru sovura. 'Enakaivo ja chiha pa'ana kaivo ja ea maho'o ija'ina pana.

¹¹Ea ka'ene Hu nahamahunijaho Hu nihenana. Ijihuna'e Hu ijá 'iama Joni vaja kaji ea kwinu'wi chiha rukina 'iamana.

¹²Hu puni mumora somahume pa'arejume Hu Huni ateha apúsame va'e 'aiju 'ahi kú'o asuma hiji'i Hu ijá 'iama 'Ú Nara raka ka'ene vetiujaho ja nihena kavo?

¹³Jara Na natohwa 'wime 'ee Najuhi'ina 'wivujaho ja nimaa 'waravu Na ija'ina.

¹⁴Na joni Najahi'ine 'ee Natohwa. 'Ena'omo Na ja mumora somahuta. 'Enakúne ja 'u'o napuhu jopuni mumora soma'avara.

¹⁵Jara ija'ina ve'avarono Na ja najaha avajuta. 'Enakúne ja 'u'o Nara vejuja'ina ve'avara.

¹⁶Na nimaa nimai ja 'waravujaho pwea huni Natohwiji'i areri pana. 'Ena'omo ea ka'ene ranavu'e roujaho ea ka'ene hua'e ranavume roajaho paasimuna.

¹⁷Ja uneka kehi hena kime ve'avajaho ja teamanahuna.

¹⁸Na ja eaka mapokakaho parona 'waravu kaivo Nara iji pijihujaho Na nihena kivu. 'Enakaivo Godoni ira vaji ika'ina ka'ene 'waramajara roe nimaa renu.Ea ka'ene puretia Nuna'e inujara huni ateja tajahene Na ninamiana.

¹⁹Ike Na iviamaa 'waravukaho mai'o pareji'ina. 'Enakúne ijara reja ka'avajaho Na Hurana ronareje nimaa ro'avara.

²⁰Na nimaa nimai ja 'waravu. Ea irara ea ka'ene Nara irechamiuji 'eka'amajaho hu areri Na apenihu 'ee ea irara Naa'e apeni'amajaho hu Godi ka'ene Na ranamiume rouji apenu 'iamana. Jesura Hua Nahamahuniji Rona 'Waramajina

²¹Jesu ijí 'waramajino Hu oja tura'i 'ahaume Hu ijá 'iama Na nimaa nimai ja 'waravu. Ja ei pini Na nahamihuna 'iamana.

²²'Ejume Huni tisaiporua aneja vene kakaravi'i ijá 'wava Hu irá rone 'warumo? 'wavara.

²³Huni tisaiporua kwinu Jesura oja mahi'ina'omo hu Huni haha 'ahi mena hinana.

²⁴'E'eme Saimani Pita ea kaji iji 'warame ijá 'wama Hu ea irá rona 'warumukúne a maapoma hena 'wamana.

²⁵'Ejumakame ea ka'ene Jesuni 'ahi mina hina kajara irana va'e Jesu apoma ijá 'wama Natohwe ijaho ea irarane? 'wamana.

²⁶'Ejume Jesu eha vene ijá 'iama Ea ka'ene Nara puretia tuamareje apúsame mahunijina. Hu puretia kajaho tuame apúsame apene Jutasi Isikariati Saimani oni hariha mahana.

²⁷Hu puretia ape i'eme Setani hu ajimana. 'Ejume ijihuna'e Jesura ijá 'wama A raka ve'i 'aha'amajaho mamako vena 'wamana.

²⁸Ea ka'ene 'iruma ijuri 'aijua rori asuma hijajija Hu rakijihuna'e hu 'waramajaho pu puruva retiana.

²⁹Pu ea 'ahopo vwihajajaho Jutasira moni panika 'ajohu jihuna'e pura ahaja i'i vejajihuna'e 'iruma 'ime'amarono 'waramu rojara. 'Ee ea ka'ene uneunecha pa'ajihi vajihuna'e 'ime'amarono 'waramu rojara.

³⁰'E'eme hu puretia kajaho ape inarena na'imaa na'eme ni'aha kwinu samai va 'e'unana. Varapa Maiu'inijina

³¹Hu ma'ahi va 'e'u'eme Jesu ijá 'iama Iviamai Emaa Puni Harihijihuni pinana 'uri'eje Godoni pinana Huni vaji 'urinu.

³²Godoni pinana Huni vaji 'uri'amajaho Godira Jesuni pinana 'u'o veje Huni vaji 'urihuna. 'Eje ni'aha kwino Jesura Godi oni pinana 'unama 'urihuna.

³³Sesahu Nune Na ja pu'úmo ma'uako hinareje va'e ja Na pakima sarihuna. Nara Jua 'waravu ja'ina Na ja 'u'o 'waravu. Nara va'ukaho ja pavuhuna.

³⁴Na tamana maiu'ina 'u'o ja mihu. Oja ma'ara'avara! Nara ja oja mihuja'ina'e ja 'u'o oja ma'ara'avara.

³⁵'Ejakamareje ea mapoka hena ki'avajaho ja Nuni tisaiporua 'wahuna. Ja ojono oja ma'arava jihuna'e ea mapoka hene ki'avajaho ja Nuni tisaiporua 'wahuna 'iamana. Jesu Pitara Hemahuniji Rona 'Waramajina

³⁶Saimani Pitara Hu ijá 'wama Natohwe A ichihi va'o? 'wamana. 'Ejume Jesura eha vene ijá 'wama Na va'u kajaho a iviamaa pavuhuna kaivo túna'i a ijí vuhuna 'wamana.

³⁷'Ejume Pitara ijá 'wama Natohwe rakijihuna'e na iviamaa Ona pavuhune? Na niho'o Onijihuna'e kwahuna 'wamana.

³⁸'Ejume Jesu ijá 'wama 'Ú a nimaa Nunijihuna'e kwa'ena? Na nimaa nimaa a 'waravu a 'aha no'opisu Na pakimuna 'i'eje ijí túna'i 'u'ora 'umehuna 'wamana.