Read Managalasi Joni 17 Bible Online

Joni 17 - Managalasi bible

Joni 17

¹Jesu uneunechake 'waravume paarejume Hu nia ahasirime akúpi 'ahi niri'i ijá 'wama Amo vea niroukúne A veje Harihu puni pinana 'urinama. Harihuni veju'e Oni pinana 'urinukúne.

²A Hu harura ea mapoka asitahuna mahana. 'Enajihuna'e A ea ka'ene Hu vajahajija Hu pu majama hihuna mihuna.

³Ikaho majama hihunijina. Pu A Godi ka'ene nikwinu'wi nimaa nimaiji hena kame 'ee Jesu Keriso ka'ene Ara ranavume roaji hena kahuna.

⁴Na iki mwe'i kaukara ka'ene A mihajaho nive paraju jihuna'e Oni pinana natohwa 'urinu.

⁵'Enakúne Amo veje Nuni pinana natohwa 'urinama. Nú no'o nitama mwe'akaho pa'ajiri vejume Nuni pinana 'urina ja'ina'e 'urinama.

⁶Ea ka'ene Ara Na mwe'i vajihajija Na A rone pu najahuta. Pu Oni ea kaivo A Na vajihajija pu Oni ira hena veju.

⁷Pu iviamaa niheju. Uneunecha ka'ene A vajihajaho Oni rene roara.

⁸Ara Oni ira ka'ene Na vajihajija Na pu 'waravu'e pu hena vejara. 'Ene pu ijí hejujaho nimaa nimaa Na Oni rena routa. 'Ee Ara Na ranamiume roujaho pu nimaa nimaa roju.

⁹Na puni siporua 'oju kaivo Na mwe'a kehuna pa'oju. Ea ka'ene A Na vajiha jihipuna'e 'oju. Ijihuni maijaho pu Oni eijihuna'e Na puni siporua 'oju.

¹⁰Nunijijahija maho'o One 'ee Onijijahija maho'o Nuna. Ijihuna'e pura veju'e Nuni pinana 'urinu.

¹¹Na iviamaa mwe'akaho kú'o pahihuna. 'Enakaivo pu pupuso iki mwe'i hi'eju'e Na Oni vu'u. Amo arimai ea ka'ene Ara vajihajija Oni iha 'ahi hami 'ajoha'amana. 'Ejakame Nú nikwinu'ini ja'ina'e pu 'u'o nikwinu'wi reja.

¹²Na pu pu'úmo hijuti veijino Na Oni iha 'ahi pu 'ajohauta. Ea ka'ene Ara vajihajija Na pu hami 'ajohauta. 'Ejume ea pina niho'o paranamia va'ana kaivo ea kwinu'wi sisemaa ijara va'ume pa'arenana 'Ejume Godoni irijarahara 'waramajaho ro nimaa'e renana.

¹³'Enakaivo Na iviamaa Oni vu'u. Vu'a ikejahija Na iki mwe'i 'waravu jihuna'e puni vajijaho Nú temarijara rarena parahuna.

¹⁴Na Oni ira pu ni'waravuta. Ijihuni hahi mwe'akaho pu senamu. Ijihuni maijaho pu mwe'a kehuna pana. 'Ene Na 'u'o areri mwe'a kehuna pana.

¹⁵A mwe'akino pu 'eka ani vahuna pa'waravu kaivo 'avena sisei ruara'enakúne 'ajoha'amana.

¹⁶Areria Na mwe'a kehuna pana. Ija'ina pu 'u'o mwe'a kehuna pana.

¹⁷Oni ira nimaakúne A Oni ira apena vena'e pu ea arira re'avara.

¹⁸Ara Na ranamiume Na iki mwe'i rouja'ina'e Na pu 'u'o mwe'a ikino irechamiu.

¹⁹Puni hahijihuna'e Na Nuni haha pu mihuta. Ijihuni maijaho Oni ira ka'ene nimaijino veje pu ea arira re'avara.

²⁰Na punaru siporua pa'oju kaivo pura raka ka'ene 'warave ea 'ahopo hene Na nimaa ronihunijihipuna 'u'o 'oju.

²¹'Enajihuna'e Na siporua 'ojukúne pu maho'o nikwinu re'avara. Amo pu nikwinu nú pu'úmo re'avara. Areri Ara Nuni vaji hiju'e Nara Oni vaji hijuja'ina'e pu 'u'o Núni vaji hihuna. 'Ejakame mwe'akaho Ara Na ranamiume rouji nimaa ro'avara.

²²Ara pinana ka'ene mihajaho Na pu nimihuta. 'Enajihuna'e pu nikwinu rehuna. Areri nú nikwinu'ina rejaja'ina'e rehuna.

²³Na puni vaji hiju'e A Nuni vaji hinu. 'Ejukame pu niho'o nikwinu rena para'avara. 'Ejakame mwe'akaho Ara Na ranamie 'ee oja ka'ene Na mihaja'ina'e A pu 'u'o oja mihujaho pu hena ka'avara.

²⁴Amo A pu Na vajihajaho Nara hi'ujino pu 'u'o hihuna ura reniu. 'Ejakame pu Nuni pinana ka'ene Ara mihajaho ka'avara. Nitama mwe'akaho mai'o pavejajiri A oja mihana.

²⁵O Amo A arimaa mwe'akaho A pahena pakamu kaivo Na A nihene kavura. Ara Na ranamiume roujaho ea ikipo niheju.

²⁶Na A ichá'inijaho pu najahuta. Na majama A rone najaha apena vahuni jihuna'e Ara Na oja ka'ene mihajaho puni vaja nave Na puni vaji hiuta 'wamana.