Read Managalasi Joni 18 Bible Online

Joni 18 - Managalasi bible

Joni 18

¹Jesu ikaho 'waravume pa'arejume Hu 'urine va'e Kitironi isoha ona kara'i juasi'a'omo Huni tisaiporue pu'úmo ijí va'ara. Noin

²Jutasi ka'ene Hua nahamahunijaho hu ruha kajaho nihena kamuna. Ijihuni maijaho Jesu na'ia mapoka Huni tisaiporu pu'úmo ijí va'ura.

³Pirisiti mama'ina 'ee Parasi ijipo Jutasi Romu puni sorutia 'ee hirisima vajahume aherame naheha 'ee tosia 'ee juha hajaa vene roara.

⁴'Ejumakame Jesu uneunecha maho'o ka'ene Hu re'iro vejajaho nihenana. 'Enarena Hu ro 'e'une va'e pu ijá 'iama Ja irá savo? 'iamana.

⁵'Ejume pu eha vene Hu ijá 'wava Jesu ka'ene Nasareti ora nú savu 'wavara. 'Ejume Hu ijá 'iama Ijaho Nana 'iamana. 'Ejume Jutasi ka'ene Hu nahama 'waramajaho pu pu'úmo naminana.

⁶'Ejume Jesu ijá 'iama Ijaho Nana 'iavume pu henarame hiru'o'usaha kahakaro va'ika'i mwe'i arihara.

⁷Jesu Hu kú'o aporama ijá 'iama Ja irá sama ojo? 'iamana. 'Ejume pu ijá 'wava Jesu ka'ene Nasareti orijina 'wavara.

⁸Jesu eha vene ijá 'iama Na Huna 'iamana. 'Enajihuna'e ja Na sari'avajaho eakija irechamie va'a 'iamana.

⁹Godoni iri nitama marako 'waramajaho iviamaa roe nimaa renu 'wa'ika'i ijá 'wama Ara ea ka'ene Na vajihajijahija pina ani ani pava'ara 'wamana.

¹⁰Saimani Pita so'wa rukina'omo Marakasiho pirisiti natohwijihuni pwea'omo so'wi 'anaume mana'inija'i ataa 'uhu'usunahana.

¹¹'Ejume Jesura Pita ijá 'wama Oni so'wa suta vaji ranama. 'Ú Na kapusia ka'ene Amora mihajaho pai'ejo? 'wamana. Jesu Aheme Anasi Ka'ene Pirisiti Jihuni 'Una'i Roajina

¹²Romu puni sorutia 'ee puni mama'ina 'ee Jua puni hirisimapo Jesuho 'uname ija kamovara.

¹³Marako'a pu Hu apena va'e Anasi oni va'ara. Ijihuni maijaho Anasiho Kaiapasi oni jurijihuna'e. Juara kajihuni vajijaho Kaiapasira pirisiti ni'ina renana.

¹⁴Kaiapasiho ea ka'ene Jua ea mapoka marako'a ika 'waramajina Ea kwinu ea mapoka punijihuna'e kwahuna. Ijaho niho'o mamaa vena avahuna 'iamana. Pitara Jesu Hemahajina

¹⁵Saimani Pita kaivo tisaiporu pina'i Jesu 'ararihae va'ara. Tisaiporu pina kajaho pirisiti natohwijaho hu nihena kavi'ina'omo hu Jesu'i ahuma va'e pirisiti natohwijihuni sei va'ana.

¹⁶'E'eme Pitaho vwicha jiami nami'eme tisaiporu pina kajaho pirisiti ni'inijaho hena kavi'ina 'omo hu Pita ahema ro'irono napara ka'ene vwicha 'ajohajaho 'wara'ika'i ahema vaji roana.

¹⁷'Ejume napara ka'ene vwicha 'ajohajara Pitaho ijá 'wama 'Ú a ea karehuni tisaiporu pina raka? 'wamana. 'Ejume hu napara kajaho ijá 'wama Na pana 'wamana.

¹⁸'E'eme pwea 'ee hirisima 'aho'a atuatavume vena jae iruhe hijara. 'E'eme Pita 'u'o ijí pu pu'úmo namine vena iruana. Pirisitia Ni'inijara Jesu Apomajina

¹⁹Pirisiti ni'inijara Jesuni pwehija rone Jesu apome 'ee Hura raka ka'ene najahuji rone apomana.

²⁰'Ejume Jesu hu eha vene ijá 'wama Na samaumai ea mapoka vu'a 'waravuta. Sinakoku 'ee Temiporu vaji Jua ahuma hi'eju'e Na najahura. Na niho'o vu'a pina nesa pa'waravuta.

²¹'Enakaivo rakijihuna'e a Na aporimo? Ea ka'ene Na 'wara'eju'e hejujihija'e aporame hena. Na raka ka'ene 'waravujaho pu nihejura 'wamana.

²²Hu ijá 'wara'eme hirisima kwino Jesuni rori naminana'omo ijara Hu tahijahi'i ijá 'wama 'Ú 'unama ija'ina pirisiti ni'inijaho 'wara'eja? 'wamana.

²³'Ejume Jesu ijá 'wama Na vu'a sisea 'waravuta re'amajaho a ivi'a kú'o 'wariva hejuma. 'Enakaivo Na vu'a maa 'waravuta re'amajaho a ichá vene 'anio? 'wamana.

²⁴'Ejume Anasira Hu kamoma ranavume Kaiapasi pirisitia ni'ini jihuni va'ana. Pitara Jesu Kú'o Hemahajina

²⁵Saimani Pitaho vena irua nami'eme pu ijá 'wava 'Ú a Huni tisaiporu pina raka? 'wavara. 'Ejume hu hema ijá 'wama Na niho'o pana 'iamana.

²⁶Pirisiti ni'ini jihuni pwea ka'ene Pitara 'anaume ataa 'uhu'usunaha jihuni ea pini ijá 'wama 'Ú a Hu hu'úmo juasi'i kavute? 'wamana.

²⁷'Ejume Pita kú'o he'eme ni'aha kwino 'u'ora 'umenana. Jesu Apene Pairati Oni Una'i Roajina

²⁸Sú'u vea ka'ene uka 'umenajino pu Jesuho apene Kaiapasi oni sei va'e 'otua vejuri sei va'ara. Jua pu 'otua vejuri sea vaja pava'ara kaivo ma'ahi namijara. Ijihuni maijaho pu puni tamana ruarahareje Pasova'e paihuni jihuna'e 'otua vejuri sea pava aruvara.

²⁹'Ejume Pairatira va'e pu ijá 'iama Eakaho iraka'e ja namahareja apene roare? 'iamana.

³⁰Pu eha vene hu ijá 'wava Ea ikaho Hu sisea paveji'ina re'ipisa nú ija'ina paapena roa maha'a 'wavara.

³¹'Ejume Pairati ijá 'iama Ja joni tamani jihuni 'unamijino Hu 'otua veti'avara 'iamana. 'Ejume Jua kajipo ijá 'wava Varapi jihuna'e nú ea pa'anie kwamasahuna 'wavara.

³²'Enajihuna'e Jesura ichá'ina'e kwahuna ka'ene nimarako 'waramajara roe nimaa'e renana.

³³'Ejume Pairati kú'o 'unama va'e 'otua vejuri ari va'e Jesu 'umena ijá 'wama 'Ú A Jua puni Kinie? 'wamana.

³⁴'Ejume Jesu eha vene ijá 'wama 'Ú a ikaho oni vwihai vwihana 'warimu 'uho ea 'ahopo Na rone 'waravara'e 'warimo? 'wamana.

³⁵Pairati eha vene ijá 'wama 'Ú na Jue? Oni ehija 'ee pirisitia mama'inijipo A apene roe na mihara. Ijaho A raka vejumakame pu A apena roe na mihare? 'wamana.

³⁶'Ejume Jesu eha vene ijá 'wama Nuni ara kwaa ikaho mwe'a pana. Nuni ara kwaa iki mwe'i re'ipisa Nuni pwehija pu areri ajira veja'a. 'Ejakamareje pu Juakija Na niho'o paapenia'a. 'Enakaivo Nuni ara kwaa ikaho panamu 'wamana.

³⁷'Ejume Pairati Hu ijá 'wama 'Ú A Kinie? 'wavume Jesu ijá 'wama A Na Kinia 'wimujaho Na ijí rehuna'e naheniara. 'Ee ijihuna'e Na iki mwe'i routa. Na iki roujihuni maijaho ea mapoka ka'ene iki mwe'i hijujihija'e raka ka'ene nimaa nimaiji 'wara'iro routa. Ea ka'ene nimaijihunijija Nuni ira hejura 'wamana. Jesu 'Anaa Kwahuna Nimai Vejajina

³⁸'Ejume Pairati Hu ijá 'wama Nimaa nimaijaho irake? 'wa'ika'i hu 'uroti va'e Jua kú'o ijá 'iama Na Ea ikehuni vaja sisea pina pakavu.

³⁹'Enakaivo joni tamana ja Pasova vea reju'ukivi'i na ea ka'ene tipura hijujaho pina ranavu'e va'ura. 'Ena'omo na Eake Jua puni Kinia ranahuna ja ura renao? 'iamana.

⁴⁰'Ejume pu ira ajira ijá 'umeja Ea kajaho pana vo Parapasi ranama 'umejara. 'Enavo Parapasiho hu nesa apeji'inijina.