Read Managalasi Joni 20 Bible Online

Joni 20 - Managalasi bible

Joni 20

¹Hura natohwi sú'u sú'o vea mai'o paahara sa'eme Meri Matarini ijí mutita kaji vai'i kamajaho muna ka'ene vwicha kunavajaho tatiraha apene ruvaara kamana.

²'Enarena hu ninuma va'e Saimani Pitaho 'ee tisaiporu pina ka'ene Jesura oja mahuji'i puni va'e ijá 'iama Pu núni Natohwijaho mutita vaja niapene ani ranavara'omo pu ichihi ranavajaho nú puruva renu 'iamana.

³'Ejume Pita'o Huni tisaiporu pina kaji'o mutita kaji va'iro va'ara.

⁴Ea no'o ninukujahara kaivo tisaiporu pinijara Pita ninuma asima urana va'e marako mutita rora kaji 'e'unana.

⁵Hu va'e aruha amanena niriajaho ateha ijí navara kaivo hu vaja paaruma va'ana.

⁶'E'eme Saimani Pita 'u'o túna'i va 'e'unarena ijí mutita vaji aruma va'i kamajaho ateharu navara.

⁷'Enakaivo ateha pina ka'ene Jesuni húmata mwavajaho ateha 'aho'apo navajaho panamana kaivo hunano mwama va'e namana.

⁸'Ejume tisaiporu pina ka'ene urana mutiti roaji 'u'o ijí aruma va'e ateha kajaho kime nimaa ronana.

⁹'Enakaivo pu Godoni vu'a ka'ene Hu kwama 'urihunijaho pu mai'o majaa pahejara.

¹⁰'Enareja tisaiporu kajija 'uname puni ari va'ara. Jesura Meri Matarini Oni Una'i Samaahiramajina

¹¹'E'eme Meriho ijí mutita rori namine niravi'i aruha arihe mutita vaja kaji niriana.

¹²'Eji'i kivume 'ona oji'ina no'ohe'i ateha sajasa'ini same Jesu ranavari tinijino pina húmana'i asuma hijume pina mumona'i asuma hinana.

¹³'Ejume pu hu ijá 'wava Napara karera a raka vene niramo? 'wavara. 'Ejume hu ijá 'iama Erapo nuni Natohwa apena va'e ani ranavukame na puruva reniu'e ijihuna'e avaju 'iamana.

¹⁴Hu ijá 'wara'ikaivo ura ta'arohi'i kamajaho Jesuho ijá naminana kaivo Jesura naminu paronana.

¹⁵'Ejumakamarena Jesura hu apoma ijá 'wama Napare A rakijihuna'e niramo? A irá samo? 'wamana. 'Ejume hu vwihanajaho Hu juara anesura ro'ikaivo ijá 'wama Ara reha Hu apena va'e ani ranamana'e re'amajaho a ichá ranamajaho 'warive na va'e Hu apejuma 'wamana.

¹⁶'Ejume Jesu ijá 'wama Meri 'wamana. 'Ejume hu ta'arohi'i Jua puni iri ijá 'wama Raponai 'wamana. Ijihuni maijaho Najuhi'ine 'wamana.

¹⁷Jesu ijá 'wama A Na pa'uniri'amana. Ijihuni maijaho Na mai'o Amo oni pavai'inakúne a va'e vwehu Nuna 'wara'amana. Na Nuni Oma 'ee joni Oma Nuni Godi 'ee joni Godi ijihuni va'u 'i'ama 'wamana.

¹⁸'Ejume Meri Matarini roe hura núni Natohwiji kamajaho Huni tisaiporua 'waramana. 'Ene Hura vu'aka 'warama kaji 'u'o 'waramana. Jesura Huni Tisaiporu Puni Una'i Samaahiramajina

¹⁹Hura Natohwa nusirei tisaiporu mapoka ahuma sei vaji vwicha kume hijara. Ijihuni maijaho pu Jua juhamareja avajara. 'E'eme Jesuho roe pura ahuma hija kaji rira mu'oi nami'i kaivo ijá 'iama Matauvi'inijaho ja pu'úmuna 'iamana.

²⁰Hu ijá 'waramarena iji'a Huni ija najahe 'ee iana 'u'o najahana. 'Ejume Huni tisaiporua Natohwiji kamareja teamanama parajara.

²¹'Ejume Jesu kú'o ijá 'iama Matauvi'inijaho ja pu'úmuna. Amora Na ranamia ja'ina'e Na 'u'o ija'ina'e ja irechamiu 'iamana.

²²Hu ijá 'waramarena Hu iruhoa vetie ijá 'iama Godoni 'Avena apeha 'iamana.

²³Ja ea 'ahopuni sisea vwihanie are'avajaho puni sisea vwihana arevume paranana. 'Enakaivo ja ea 'ahopuni sisea pavwihanie are'avajaho puni sisea mai'o paparanana. Jesu'o Tomasi Puni Vu'ijina

²⁴'Enakaivo Tomasi ka'ene Titimasiho ea iropu ropu no'o ijihi puni ea pina'omo vea ka'ene Jesura roajaho hu ijaho pahinana.

²⁵'Ena'omo tisaiporu 'ahopo hu ijá 'wava Nú Natohwijaho nikavara 'wavara kaivo hu pu ijá 'iama Na nuni nii Huni ija ka'ene nerui 'aniajija kime 'ee nuni ija ranave nerui va'ani 'unamiji va'e 'ee nuni ija Huni iana hari rana'ujiana vo na panimaa roju 'iamana.

²⁶Na'ia iropune no'upisu pa'are'eme Huni tisaiporua vwicha kume vaji Tomasi'i pu'úmo hi'eme Jesuho kú'o roe puni rira mu'oi namiji'i ijá 'iama Matauvi'inijaho ja pu'úmuna 'iamana.

²⁷'Enarena Hu Tomasi ijá 'wama Oni ija miha. 'Ene Nuni ija kiama. Oni ija miha. 'Enareje iana hari isama. Panimaa ronujaho are'ika'i nimaa rona 'wamana.

²⁸'Ejume Tomasi eha vene ijá 'wama Nuni Natohwe 'ee nuni Godi 'wamana.

²⁹'Ejume Jesu ijá 'wama A Na kimajihuna'e nimaa ronu kaivo ea ka'ene Na paki'eja vo nimaa rojajaho Na merajihuna 'wamana. Ike Puka kehuni Maijina

³⁰Jesu aacha 'aho'a ea areri pavejura Huni tisaiporu puni una'i vejume kavara kaivo ike puka vajakaho pavejara.

³¹'Enakaivo vu'a ike vejajihuni maijaho Jesuho Kerisone 'ee Hu Godoni Harihijina 'omo ijí nimaa ro'avajaho Huni iha 'ahi majama hihuna apehuna.