Read Managalasi Joni 4 Bible Online

Joni 4 - Managalasi bible

Joni 4

¹Vea ka'ene Natohwijara he'eme Parasiapo Jesura tisaiporua mapoka vene 'ee toi samaujara Jonira samajaho 'asimaji hejajaho henana.

²'Enakaivo Jesuho Hu ea toa pasamaana kaivo Huni tisaiporuepo samaara.

³Iji'a Hu ijí Jutia are'ikaivo kú'o 'urine Karari va'ana.

⁴'Ene Hu va'e Sameria 'e'une va'ana.

⁵'Enarena Hu roe Sameria puni ara ni'ina ka'ene Saika 'wavujino mwe'a ka'ene Jekapira hariaha Josapi mahajihuni rori va'ana.

⁶Ijí 'unama kajaho jopatu'ura'omo Hu ro'eme haha sevume roe Jekapi oni toúja rora'omo ijí 'ojuta hwe'eme vea rira renana.

⁷Napara pina Sameria ora toa kaji 'e'i roana. 'Ejume Jesu ijá 'wama Toa 'e mihe Na ijuma 'wamana.

⁸Ijihuni maijaho Jesuni tisaiporu Hu raname ari natohwi 'iruma 'ime'i va'ara.

⁹Sameria napara kajara Jesu ijá 'wama Na Sameria ore A Jua kaivo A irakijihuna'e toa na ma'urono jaririmo? 'wamana. Napara kajara Hu 'warama jihuni maijaho Jua Sameria'o pu'úmo uneunecha paahuma vejura.

¹⁰Jesura eha vene hu ijá 'wama A Godira ea'e swara ka'ene mihaji hene 'ee ea irara a toa jarirame toa miha 'wamuji hena ka'ipisa a Hu toa jarivakame Hu toa ka'ene majama hihunijaho maha'a 'wamana.

¹¹'Ejume ijí napara kajara Hu ijá 'wama Ijihuni maijaho toa újakaho vamaijihuna'e Ara toa 'ehuna areri pana. 'Ú A ichihi toa ka'ene majama hihunijaho 'ehune?

¹²'Ú A nuni oma Jekapi asimane? Ijaho hura toa úja núa múhana. 'Enare'e hu ori'ina 'ee harihwaha 'ee huni purumakaua ijipo ijara 'wamana.

¹³'Ejume Jesura eha vene hu ijá 'wama Ea irara toake i'amajaho hu kú'o huahuna.

¹⁴'Enakaivo ea irara toa ka'ene Nara mahuji i'amajaho hu kú'o toa pahuahuna. Ijí toa ka'ene Nara hu ma'ujara huni oja vaji namareje toa úja ajime arihareje ijara vejakame majama hihuna 'wamana.

¹⁵'Ejume napara kajara Hu ijá 'wama Nimaakúne toa kaji mi'irakúne na toa pahuanive pa'unama roe toakaho 'e'ejukúne 'wamana.

¹⁶Hu napara kají ijá 'wama A va'e paruuna 'umenareje iki kú'o 'unama ro'amana 'wamana.

¹⁷'Ejume napara kajara eha vene ijá 'wama Na parua pa'ana 'wamana. 'Ejume Jesura hu ijá 'wama A nimaa 'warimare'e na parua pa'ana 'wimu.

¹⁸'Enakaivo a parua iropu venana. 'Enavo ea ka'ene iviamaa a hu'úmo nenujaho oni parua pana'omo a nimaa 'warimana 'wamana.

¹⁹'Ejume napara kajara Hu ijá 'wama Na kavujaho A nimaa poropetia.

²⁰Emahu núna Godiho ike huri'a 'ahakino oja mahe ta'arohura. 'Enakaivo jara 'waruvujaho Godiho Jerusaremi oja mahe 'ee ta'arohuna 'úvura 'wamana.

²¹'Ejume Jesu hu ijá 'wama Naparakere Na nimaa veti'amana. Vea mai'o rouna'omo rosa'eje ja Amoho ike huri'a 'ahakaho 'ee Jerusaremiru paoja mahe 'ee ta'arohuna.

²²Ja raka ka'ene oja mahe 'ee ta'arohujaho ja pahejura kaivo nú raka ka'ene oja mahe 'ee ta'arohujaho nú hejura. Ijihuni maijaho ea ni'ajihi'inijaho Jua puna'i rena rou.

²³Vea rouna'omo rosa'ena iviamaa vea ikaho ea Amo nimaa oja mahe ta'arohunijipo Amoho oja 'Avena 'ee nimaijino oja mahe ta'arohuna. Ijihuni maijaho Amoho ea ijakajipo oja mahe ta'aro'avarono saramu.

²⁴Godiho 'Aveni jihuna'e ea irahipo Hua'e oja mahe ta'aro'avajaho oja 'Avena 'ee nimaijino oja mahe ta'arohuna 'wamana.

²⁵'Ejume napara kajara Hu ijá 'wama Na hejujaho Masaiaho rohuna. Huni iha Kerisona. Vea ka'ene ijara ro'amajaho Hu uneunecha mapoka maho'o nú najuhuna 'wamana.

²⁶Jesura ijá 'wama Ea ka'ene ara rone 'warimujaho Nana 'wamana.

²⁷Hu ijí napara kaji 'wara'eme Huni tisaiporu ro useme kamareja pu niho'o oja hwa'usunahara. 'Enakaivo ea pina Hu paijá 'wama A raka samo? A rakijihuna'e hu hu'úmo hine vu'a 'wavi'i hino pa'waravara.

²⁸'Ejume napara kajaho toata huna ijí rana'ika'i va'e parua ka'ene ari hijajija ijá 'iama

²⁹Roe ea pina nara raka ka'ene maho'o vejujihija'e nahama 'warimaji kaha! Vi ea kajaho Kerisona rakakúne 'iamana.

³⁰'Ejume pu ni'aha kwino ara natohwa are'ikaivo Huni roara.

³¹'E'eme ijihi'a kajano Huni tisaiporuepo 'iruma i'iro 'ejahae ijá 'wava Najuhi'ine 'iruma ina 'wavara.

³²'Enakaivo Hu ijá 'iama 'Iruma ka'ene Nara ihunijaho ja pahene pakivura 'iamana.

³³'Ejume pu pira'arame apenoji'i ijá 'wava 'Ú ea 'aho'a vi 'iruma 'eka roahare? 'wavara.

³⁴Jesu ijá 'iama Nuni 'irumijaho Godi ka'ene Na ranamiume roujihuni uriji vene 'ee Huni kaukara ijí veje parahuna.

³⁵Ja 'warivujaho masapa no'one no'o ijá pa'are'eje juara sama ihuna 'warivu kaivo ike heha! Iviamajaa ja rora rora ikine nia ahasirime kiha! Iviamai juara nituma sahe areri rena navu.

³⁶Ea ka'ene va'e juara samujaho eha niapenana 'ee hu 'ina majama hihuna'e nianae irechamu 'ee ea ka'ene ijí soa samujine 'ee ea ka'ene ijí juara samaji'o ahuma teamarasahuna.

³⁷Ijihuni hahi ika'ina 'úvujaho nimaa ei pini soa savu'e 'ee ea pini juara samuna.

³⁸Na ja juara sa'avarono irechamiukúne va'ajime juara ka'ene ja soa pasavaji sa'avara. Ea 'ahopo ni soa savarakúne ja mava'e ijí uramara'avara 'iamana.

³⁹'Ejume ea mapoka ka'ene Sameria ora kajijahija Hu nimaa rojara. Ijihuni maijaho napara kajara raka ka'ene venaji Hu nahama 'warama jihuna'e pu nimaa rojara. Hu uneunecha mapoka ka'ene nara vejujaho nahama 'warimana.

⁴⁰Hu ijí hi'eme Sameria opo roajime jarima pu pu'úmo hi'amarono 'wavara. 'Ejume Hu pu pu'úmo na'ia no'o hinana.

⁴¹'Eji'i ea 'aho'a mapoka 'u'o Hura ira ka'ene 'waramaji henareja nimaa rojara.

⁴²'Ejume pu napara kají ijá 'wava Ara raka ka'ene 'warumajaho pana kaivo nú nimaa rojujihuni maijaho nú onúno Hura raka ka'ene 'warumaji hejajihuna'e nimaa roju. Nú nihejujaho Hu nimaa eaka mapokakihi Ni'ajihunijina 'wavara. Jesura Natohwa Pihuni Hariha Vejume Maranajina

⁴³Na'ia no'o pa'are'eme iji'a Hu ijí rene Karari va'ana.

⁴⁴Jesura ori hena kamajaho poropetia huni ara kwaa ijaho huni hura pavejura 'iamana.

⁴⁵'Ejume Hu Karari roume Karari opo Jerusaremi Pasova veijino uneunecha mapoka ka'ene Hura vejume pu kavajihuna'e hami apejara.

⁴⁶'Ejume Hu kú'o va'e Kena Karari vaji Hura toa vejume 'wainia renaji va'ana. 'E'eme Kapeniami ea natohwa pipuni hariha atami 'unamana.

⁴⁷'Ejume hu henajaho Jesu Jutia rene Karari roume ijí Huni va'e jarima 'warave ro arihe huni hariha veje sona'amarono va'ana. Ijihuni maijaho hura kwahuna niho'o nitu'u renana.

⁴⁸'Ejume Jesu ijihuna ijá 'wama Na aacha pina ani'ina ja panaja'ipisa ja unenu pina nimaa paroja'a 'wamana.

⁴⁹'Ejume ea natohwa kajara Hu ijá 'wama Nuni harihi kwama ve'enakúne maraku roa 'wamana.

⁵⁰Jesura hu ijá 'wama Oni hariha pakwamu kaivo mai'o hinukúne va'a 'wamana. 'Ejume ea kajaho Jesuni ira nimaa venarena aneja vene va'ana.

⁵¹Hu mai'o va'eme huni pwehipo roe piuname ijá 'wava Oni hariha ni'urina hinu 'wavara.

⁵²'Ejume hu pu aporama ijá 'iama Hu vea oma raki 'urinane? 'iamana. 'Ejume pu ijá 'wava Niari vea karaa tahunana'eme huni haha uhoa pa'arenana 'wavara.

⁵³'Ejumakamarena omahi henajaho vea oma ka'ene Jesura hu 'waramarene Oni hariha mai'o hinukúne 'wamani vea omiji henana. 'Enarena Hua 'ee huni kachi'ina maho'o nimaa rojara.

⁵⁴Jesu kwaa Jutia rene Karari roajino Huni aacha pinakaho kú'o ea najahana.