Read Managalasi Joni 5 Bible Online

Joni 5 - Managalasi bible

Joni 5

¹Uneunecha ikeja vejume pa'are'eme ijihuni túna'i Jua puni vea natohwa rejume Jesu Jerusaremi va'ana.

²Ijí Jerusaremi sipia maketia vejuri vwicha jiami toa pina nahúna namuna. 'Ena'omo ijí Hipuru opuni iri 'urahujaho Patesita 'wavura. Ijihuni rora ruha iropu navura.

³Ijí sea kajihipuni urotijino ea atami 'uniravi'ina mapoka ijí hiju'e ea nia pa'ana mumora sisea 'ee 'aho'a ija mumora irima'ina ni'aha kwino toa kajara sisupa tuava ka'i 'ahiu'e 'ajaha hijura.

⁴Na'i 'aho'i Natohwi jihuni 'ona oji'ini vea ape'eju'e ijí toa vaja kaji va'e arihare'e veju'e nivavukavi'i ea pina ka'ene toa vaja kaji marako urane va 'onajaho maraju'e roe ajimuna.

⁵Ea pina atami 'unavume na'ejume juara mapoka (38) pa'arenana.

⁶'Ena'omo Jesura kamajaho hu ijí namana. 'E'eme Hu henajaho ea kajaho atama majama namuna'e henana. 'Enarena Hu ijá 'wama 'Ú a atama kajaho sonahahuna ura renao? 'wamana.

⁷'Ejume ea ka'ene atakina kajara eha vene ijá 'wama Toakara nivamuni veijaho ea ka'ene na apenia va'e toa vaja kaji apúsamihunijaho pana'omo na 'urina va'eju'e ei pini marako tatiha 'oju'e na arema hijura 'wamana.

⁸'Ejume Jesu ijá 'wama 'Urine oni suha apene namina va'a 'wavume

⁹ni'aha kwino ea kajaho sonajume hu 'urine huni suha apene aneja vene namina va'ana. Ijí vea kajaho Sapati avanana.

¹⁰'Ejume Juapo ea ka'ene maranaji ijá 'wava Iviasa Sapatia'omo ija'ina pavehune sa'ina'e a raka vene oni suha apena va'o 'wavara.

¹¹'Enakaivo hu eha vene ijá 'iama Ea ka'ene na veniume sonahiajara ijá 'wima A 'urine oni suha apene va'a 'wivume na ijihuna'e 'urine nuni suha apene rou 'iamana.

¹²'Ejume pu hu apoma ijá 'wava Ea iraka sa'inijara a oni suha apene 'urina va'amarono 'wamane? 'wavara.

¹³'Enakaivo ea kajaho irara hua vejuma sonanajaho puruva renana. Ijihuni maijaho Jesuho eaka mapoka kajihipuni taurura kajino va'ana.

¹⁴Túna'i Jesu ea kajaho Temiporu vaji piunamarena ijá 'wama Hena! A ivi'a maranaanakúne a kú'o sisea pave'amana. 'Ejakame unenu pina sisemaa kú'o oni haha 'aha parena'amana 'wamana.

¹⁵'Ejume ea kajaho va'e Jua ijá 'iama Jesura vejume maraniana 'iamana.

¹⁶Jesura Sapati vei ea vejume sonana jihuna'e Juapo Jesuho sise'i 'ahae ruarahara.

¹⁷'Ejume Hu eha vene pu ijá 'iama Nuni Omijaho na'ia mapoka'e kaukara venujihuna'e Na 'u'o veju 'iamana.

¹⁸Ijí Hu ijá Noin'warama jihuna'e Jua Hua 'ana'i 'ahiara. Hura Sapati vea ka'ene paakumajiru pana kaivo Godi Huni oma 'iame Hu areri Godia 'iamajihuna'e pu Hu 'anae kwa'amarono 'unama savara. Harihijihuni Harurijina

¹⁹'Ejume Jesu eha vene ijá 'iama Na nimaa nimai ja 'waravu. Godoni Hariha Hu Huni vwiha ijaho niho'o pavenu kaivo raka ka'ene Hu ka'eju'e Omahi venujiru venuna. Uneunecha mapoka ka'ene Omahi venujaho Hariaha 'u'o ija'ina venuna.

²⁰'Ena'omo Omaha Hariaha oja mahare'e Hura uneunecha mapoka ka'ene venujaho nahuna. 'Enare'e uneunecha mama'ina ka'ene vehunijaho nahuna. 'Ejukame ja ijí kame oja hwa'usahau.

²¹Areri Omahi vejume kwamasahi'ina hijuja'ina'e Hariahi ea ka'ene Hu ura renujija 'u'o majama hihuna mihuna.

²²Ijihuni maijaho Omaha 'otua pavetihuna kaivo Hu Hariahi ea 'otua vetihuni harura maho'o mahana.

²³'Ejakamareje ea mapoka Omaha ta'arohu ja'ina'e Hariaha 'u'o ta'arohuna. Ea irara Jesu paaromahujaho Hu Omaha ka'ene Hua ranavume roajaho pata'arohu.

²⁴Na niho'o nimaa nimai ja 'waravu. Ea irara Nuni ira hene nimaa rone Godi ka'ene Na ranamiume rouji nimaa ronujaho hu majama hihuna niapenana. Ijihuna'e hu 'otua pavehuna kaivo Hu kwahunijaho niare'ika'i majama hihuni ruhijino roana.

²⁵Na nimaa nimai ja 'waravu vea mai'o rou kaivo iviamaa nitu'u renu. 'Ena'omo ea ka'ene kwamasahi'inijija Godoni Harihijihuni ira he'avajaho kú'o 'urihuna.

²⁶Ijihuni maijaho Omahi majama hinuja'ina'e Hariaha 'u'o majama hihuna mahana.

²⁷'Ene Hu Emaa Puni Harihijihuna'e Hu harura ka'ene ea 'otua vetihunijaho mahana.

²⁸Ja ike he'avajaho oja pahwa'usunaha'amana. Ijihuni maijaho vea mai'o roujihuna'e ea kwamasahi'ina ka'ene euchi navujaho Huni ira hehuna.

²⁹'Ejakame pu ijí euchi rene 'urihuna. 'Enareje ijí ea ka'ene mamaa veji'inijija 'urina majama hihuna. 'Enakaivo ea ka'ene sisea vejujija 'urinareje 'otua vehuna. Jonira Nimai Venajina

³⁰Na Nuni vwiha ijaho majikaria unenu pina pavehuna kaivo Na hejuja'ina'e Na ea eha mihura. 'Ene Nara eha ka'ene mihujaho niho'o arira. Ijihuni maijaho Na Nuni ura ijaho pavejura kaivo Godi ka'ene Na ranamiume roujara ura renujiru vejura.

³¹Na onuno raka ka'ene vejuji rone 'wara'ujaho nimaa pana.

³²Ea pini Na rona 'waramujaho Na niheju. Hu Na rona 'waramujaho nimaa nimaa.

³³Ja ea irechavume va'e Joni apovumakame Na iraho Hu nimaa nimai nahama 'waramana.

³⁴'Enakaivo Nara emaa puna'i hejuta'e 'warahuna pana. 'Enakaivo Na uneunecha ike 'waravujaho jara hene nimaa rone marani'amarono 'waravo.

³⁵Hu ira ka'ene rena ea hananiajina. 'Ejume ja ura rena'eme temarasahi'i huni hanaji'ina vaji hijara.

³⁶'Enakaivo Jonira raka ka'ene Na rone ja 'waravume hejajaho Nara uneunecha ka'ene ve'ujarahara ijaho asihuna. Kaukara ka'ene Na ve'urono Amora vajihajaho Na ijí veje ja kime nimaa nimaa Amora ranamiume routa 'wahuna.

³⁷Amo ka'ene Na ranamiume roujara Huhusumano Na rona 'waramana. 'Enakaivo ja Huni ira niho'o pahejure 'ee Hu ichá'inijaho pakavura.

³⁸'Enajihuna'e Huni Ira joni oja vaja panamu. Ijihuni maijaho Ea ka'ene Hu ranavuma roajaho ja panimaa roju.

³⁹Ja Godoni Ira tahe saravu jihuni maijaho ja vwihajujaho ijihuni vaji majama hihunijaho ape'eja roju. 'Enakaivo ijí ira kajaho Naa'e rone 'waramuna.

⁴⁰'Enakaivo ja Nuni roareje majama hihuniji apehunijaho ja ura parenau.

⁴¹Emapo Nuni pinaniji 'unama ahasirivujaho Na panimaa vetiu.

⁴²'Enakaivo Na ja nihena kivu. Godoni oja ka'ene ea oja mihujaho joni vaja mai'o panamu.

⁴³Na Nuni Omijihuni iha 'ahi roujaho ja Na paapeniu vo vu ea pini huni iha toi ro'amajaho ja hu hami apehuna.

⁴⁴Ja ojono ta'arosara'i kaivo Godi ka'ene nikwinu'wi maijara ja ta'arorahunijaho pasara'avajaho ja ichá'ina'e nimaa ro'eja?

⁴⁵Nara Amo oni una'i namahuna pavwiha'avara. Ja Mosisi nimaa rojujihuna'e ea ja namahuna.

⁴⁶'Enakaivo ja Mosisi nimaa ro'ipisa ja Na 'u'o nimaa roja'a. Ijihuni maijaho hu Na rone heha 'ahi vena najahana.

⁴⁷'Enakaivo ja Mosisira heha 'ahi vena najahaji panimaa rojajaho vu ja ichá'ina'e Nuni vu'ijija nimaa ro'eja? 'iamana.