Read Managalasi Akisi 1 Bible Online

Akisi 1 - Managalasi bible

Akisi 1

¹Tiapirasi ese. Nimarako pasia pina ka'ene na vejujaho Jesura raka ka'ene aneja vene 'ee ea najaha

²apene va'u va'o va'e vea ka'ene Hura kahi akúpa 'ahi va'aji va 'e'ujuta. Hu va'amarono Godoni 'Aveni vaji Huni apasorua ka'ene Hura iji pijihajija raka ka'ene pu vehunijaho 'waramana.

³'Ene Hu kwama 'urinarena na'ia mapoka (40) Huni haha 'ahi ichá'ina renaji pu najahana. Hu nimaa 'urinana ro'avarorena 'unama ani ani veji'i Godoni ariji rona najaha 'waramana.

⁴'Ene pu ahuma hi'eme Hu ijá 'iama Ja niho'o Jerusaremi paareme va'avara kaivo ijí 'aja'eje Amora raka ka'ene ja mi'iro nahama 'waravume Na 'waravujaho mihakama'e iji'a va'avara.

⁵Ijihuni maijaho Joniho ja toi vaji samaume 'urijara kaivo na'ia josu'a pare'eje ja Godoni 'Aveni samahuna. Jesura 'Urina Akúpa 'Ahi Va'ajina

⁶'Ejume pu roe ahuma hiji'i apoma ijá 'wava Natohwe A vea kajino kú'o kwaa kakaho Isureri ora mi'ena? 'wavara.

⁷'Ejume Hu pu ijá 'iama Amora ijí vea kajaho Hu henu 'ee Huni harurijino irechamana kaivo ijihija'e jara hena kahuna pana.

⁸'Enakaivo Godoni 'Aveni roe ja samahakame ja harura apenareja'e iji'a Jerusaremi 'ee Jutia 'ee Sameria Na rone najahuna. 'Ene ike mwe'akaho maho'o najahuna.

⁹Ijija 'waravume pa'are'eme pu ijá kavi'i nami'eme Hu apene 'imita vaji va'ume 'imiti tanu'urihume pakavara.

¹⁰Heha! Hura va'ukame pu nia ka'ene akúpi 'ahi nirinamie nava kajaho pa'are'eme ea no'ohe'i ateha sajasa'ini savajija ijá puni rori namijara.

¹¹'Enareja ea kajipo ijá 'iava Karari orakije ja raka vene namina hine akúpa 'aha nirinama navo? Ijí Jesuho iki joni rene apene akúpi 'ahi va'ukaho Hu kú'o 'unama ro'amajaho 'unama nikwinu'ina ka'ene jara Hu ka'eju'e va'u kaja'ina rohuna 'iavara. Jutasi Oni Tini apenajina

¹²'Ejume pu huri'a Arivi rene Jerusaremi roara. Arivi rena roe kamino Jerusaremi usevujaho na'ia kwinuna kwaa jora pana.

¹³Pu ijí Jerusaremi roareja pura seaka huri hijujino va'ara. Pita ho Joni ho Jemisi ho Enituru ho Piripu ho Tomasi ho Pataramiu ho Matiu ho Jemisi ka'ene Apiasi oni harihijaho 'ee Saimani ka'ene Jerati 'wavujaho Jutasi ka'ene Jemisi oni harihijaho ijá va'ara.

¹⁴Pu ijí rira kwino napara 'ee Meri ka'ene Jesuni ohijaho 'ee Huni 'u'uhijijihi pu'úmo ahuma vwiha kwisu rene siporua 'oji'i hijara.

¹⁵Ijá vejari veijino ea ka'ene Godi nimaa rojujijahija mapoka (120) ahuma hi'eme Pitara puni rira kaji 'urine arini namiji'i ijá 'waramana.

¹⁶Vwehu nune Godoni 'Avenijara Teviti oni ira vaji Jutasi rone 'waramajaho ivi'a Godoni irijaho nima'e renana. Jutasira ea aherama roe najahume Jesuho apejara.

¹⁷Hu nú pu'úmo hinone 'ee kaukara ka'ene núra vejukehuni pwinana'a renana.

¹⁸Ike ea ikaho monia ka'ene sisea veju'e vajahajino apena mwe'a sisa pina 'imenana'omo ijí una'i 'one huni tea jahausahume kwamana.

¹⁹Ijihuna'e ea mapoka ka'ene Jerusaremi hijujija kwaa kajaho iha Hakeratama 'wavura. Puni iri Hakeratama 'wavujihuni maijaho 'Aa Mwe'a 'wama avajura.

²⁰Godoni ira ka'ene Samusi vaji ika'ina'e vejara. Veje huni ara kwaa savasa'e renama. 'Eje ea pina pahinama 'ee huni kaukara ijaho ei pini huni tinia apena venama 'úmana.

²¹Ijihuni hahi nú ea pina ka'ene na'ia mapoka'e núni Natohwa Jesui pu'úmo 'ajúha oji'iniji apehuna.

²²Ijaho vea ka'ene Jonira ea toi samajino rene rou va'o Hu apena va'aji 'e'unaji ea pina apejakame Hura kwama 'urinaji ronareje ea 'aho'a 'waravi'ina'e rehuna.

²³'Ejume pu Josapi ka'ene Pasapasi ka'ene Jasitasina 'wavuji'o Mataiasi'o 'eka roajivara.

²⁴'Ena'omo pu siporua 'one ijá 'wava Natohwe A eaka mapoki jihipuni oja vaja nihenunakúne Ara ea ka'ene iji pijahaji najuha.

²⁵'Ejakame hura kaukara ikehuni vaja tinia apene 'ee apasoru huni kaukara ka'ene Jutasira are'i huni ruhi va'ajaho venama 'wavara.

²⁶'Enareja ijihuni túna'i pu pipia venareje Mataiasira tinia apenana. 'Ejumakame hura apasoru iropu ropu kwinu ijihi ni'ajinamiana.