Read Managalasi Akisi 11 Bible Online

Akisi 11 - Managalasi bible

Akisi 11

¹'Ejumakame apasorua 'ee vwehwaha 'aho'a ka'ene Jutia hijajipo hejajaho Jenitarua 'u'o Godoni vu'a hena apejajaho hejara.

²'E'eme Pitaho 'uname Jerusaremi va'ume Jua mapoka sisa 'uhuahi'inijipo hu namaha 'urarahara.

³'Enareja pu hu ijá 'wava A va'e ea ka'ene sisa pa'uhuai'inijihi pu'úmo 'iruma inana 'wavara.

⁴Pitaho aneja vene hami nirisame 'waramana.

⁵'Enarena ijá 'iama Na kwaa Japa hine siporua 'oji'i visoni ka'eme unenu'u pina ateha sa'ina kajaho kahi akúpi 'ahi rene nupia nupiijino 'una'eme arihe nuni roana.

⁶Ijihuni vajijaho hanuha ani ani'ina mwe'i namine ojura 'ee tirohe ojura 'ee uka ka'ene ichutoi jaijasahe ojura. Ijihuni toi ani rene namana.

⁷'E'eme na ira he'eme ijá 'warimana Pita 'urina 'anie ina 'wimana 'iamana.

⁸'Ejume na ijá 'wavo Natohwe niho'o pana. Na uneunecha chiha rukina mapoka paine 'ee pasovi'ina nuni ira vaja pava'e arihura 'wavuta.

⁹'Ejume kú'o ira kahi akúpi 'ahi rene roe ijá 'wima Uneunecha ka'ene Godira veju'e mamaa rejujija a paka'eje sisea ro'ama 'wimana.

¹⁰Ijaho 'aha no'opisu renarena kú'o apene ichutoi va'ara.

¹¹'Ene heha ijiha kajano ea no'opisu Sesaria rena irechamiume na'e aheri'i roe sea ka'ene núra hijajino usevara.

¹²'Ejume Godoni 'Aveni 'warimarena ijá 'wima A unenu'u pina pavwiha'amana kaivo va'amana 'wivume ea iropu kwinu vwehu nú pu'úmo roe Sesaria ea kajihuni sei va'ara.

¹³'Ejume hu 'warumajaho hu Godoni 'ona oji'ina ka'eme ijara ijá 'wama A ea 'aho'a irechamie pu va'e Japa Saimani ka'ene Pitana 'wavujaho aheme roa.

¹⁴'Eje hura vu'a 'warave a 'ee oni kachi'inijihija maho'o maraniama 'wamana 'iamana.

¹⁵Na ijí vu'a kaji aneja vene 'wara'eme Godoni 'Avena ariha roe pu samahana. Areri amura'e nú samuha ja'ina'e samahana.

¹⁶'E'eme na Natohwijara raka ka'ene 'warumajaho vwihajuta. Joniho hu ja toa vajaru samaume 'urijara kaivo ja Godoni 'Aveniji'i samahuna 'úmajaho vwihajuta.

¹⁷'Ejume nú Natohwa ka'ene Jesu Keriso nimaa rojumakame Godira swara ka'ene nú múhaji pu nikwinu'ina kaji mi'amajaho na ea irana'omo Huni 'unama tanu'ejo? 'iamana.

¹⁸Pu vu'a kaji henareja pu iruno'a are'i kaivo mataume Godi ta'arohi'i ijá 'wava Oo nijina Godira vejume Jenitaru 'u'o puni sisea are'i kaivo taarohe majama hihuna apehuna. Enitioki Sosijina

¹⁹Nimarako Sitivini 'anaume kwa'eme ea 'aho'a ka'ene nimaa roji'inijija pu sise'i 'ahiume juhaha va'e Ponisia va'e 'ee Saiparasi va'e 'ee Enitioki va'ara. 'Enakaivo pu vu'a kajaho ea 'aho'a pa'waravara kaivo Juaru 'waravara.

²⁰'Enakaivo ea nimaa roji'ina 'aho'a Saiparasi ore 'ee ea 'aho'a Sairini ora'omo pu va'e Enitioki roe aneja vene Kuriki 'u'o Jesu ka'ene Natohwi jihuni vu'a maa najahara.

²¹'Ejume Natohwi jihuni harura pu pu'úmo navumakame ea mapoka nimaa ronareja ta'arohe Natohwi jihuni roara.

²²'Ejume ijí vu'a kajara rena roe Jerusaremi sosiji rouma henareja pu Panapasi ranavume Enitioki va'ana.

²³'Enarena hu ijí va'e'uji'i Godoni maiji vwihaniiniji kamajaho niho'o teamama parajume hu pu ni'ajihe ijá 'iama Natohwiji nimaa roji'i hi'avara 'iamana.

²⁴Hu ea mamae 'ee nimaa roji'ine 'ee Godoni 'Aveni ruha apena paraji'ina'omo ea mapoka Natohwi jihuni ea rejara.

²⁵'Ejume Panapasiho va'e Tarasasi Soru sama va'ana.

²⁶'Enarena hu va'e kame ahema apene Enitioki va'ana. 'Enarena pu no'o juara kwino ijí hijara. 'Ene ijino sosia epu'úmo piuna'arame ea mapoka najahara. 'E'eme tisaiporu ijija amura'e Enitioki Keriso oni ehija 'wavara.

²⁷'E'eme ijihuni vea kajino poropetia 'aho'a Jerusaremi rene kami Enitioki va'ara.

²⁸'E'eme poropetia pina huni iha Akapasiho Godoni 'Aveni ni'ajahumakame hu 'urine nami'i kaivo mwe'a kakino 'oravea natohwa rehuna 'waramana. 'Ena'omo túna'i Karautiasira 'ajohani veijino 'oravea renana.

²⁹'Ene tisaiporu ura renajaho pu ea kwino kwino Jutia vwehwaha ka'ene hijujihi ni'ajihe uneunecha 'aho'a irechamihe va'avarono ura renaara.

³⁰'Ejume pu ijá venareja Panapasi'o Soru'o puni ija tahi irechavume pu 'eka va'e eruta vajihara.