Read Managalasi Akisi 12 Bible Online

Akisi 12 - Managalasi bible

Akisi 12

¹Ijihuni vea kajino kini Heroti ea 'aho'a ka'ene sosi kaji hijujihija niho'o ni'ina'e sise'i 'ahiuna.

²'Ene hu Jemisi ka'ene Joni oni 'u'uiji so'wa pijahume kwamana.

³'Eji'i kimajaho Jua ijí kame teamanavuma kimarena hu va'e Pita 'u'o kamohuna vwihanana. Ijaho puretia isitia pa'ajihuni vea re'eme hu ijá ve'iro venana.

⁴Ijihuni túna'i hu Pitaho apene tipurai ranamana. 'Ejume sorutia mapoka'e (16) irechamiume pu ruha ka'ene Pita ranamaji 'ajoha hijara. Pasova vea pa'arejakavi'i hu Pitaho apena va'e ea mapoki jihipuni una'i 'otua veti'i 'ahaume ranavuma hinana.

⁵'Enakaivo Pitaho ijino tipurai hi'eme sosiepo hine huna'e Godoni siporua 'oji'i hijara. Pita Tipura Vaji Rena Ro 'E'unajina

⁶Ijihuni sú'uhijino Heroti va'e Pitaho apene 'otua veti'i 'ahaume va'ana. 'E'eme na'ia kajino Pitaho sorutia no'o ijihipuni riri ne'eme pu hua senia no'o ija mumora kamomapi ranavume namana. 'E'eme sorutia mapoka ijí vwicha jiami naminareja hine tipura ara kajaho 'aiha vejara.

⁷Heha! Natohwi jihuni 'ona oji'ini ni'aha kwino huni rora kajano nami'eme ijí tipura ara vaja kajaho hananana. 'E'eme hu Pita oni rorijano 'ana'anai'i saa ijá 'wama Mamako 'urina 'wamana. 'Ejume senia ka'ene huni ija kamovajaho ni'aha kwino ijá arihana.

⁸'Ejumakavi'i Godoni 'ona oji'ina kajara ijá 'wama Oni ateha apúsame mumora hwana sama 'wavume Hu ijá vejumakavi'i ijá 'wama Oni ateha apúsamareja 'ararihie ro'amana 'wamana.

⁹'Ejume hu ijí Godoni 'ona oji'ina kaji 'arariha va 'e'unana. 'Enakaivo raka ka'ene Godoni 'ona oji'inijara venajaho hu pahena pavwihanana kaivo hu vwihanajaho visoni kavu ronana.

¹⁰'E'ikaivo pu no'o va'e ea ka'ene 'aiha amura vejajaho asitahe 'ee va'e ijihuni rori 'aiha vejajija asitahe roe kami ajani vwicha ka'ene ari ma'ahi va'ujino ro'eme vwicha kajaho ma'ori tirausahume pu no'o roe samai usevara. 'Enareja ni'aha kwino 'ona oji'inijaho Pitaho raname va'ana.

¹¹'E'eme Pitaho iji'a hena kamajaho nimaa Natohwijara Huni ona'oji'ina ranavume hura roe na Heroti oni ija 'ahi aherimana. Ijihuni maijaho Juaka mapokijaho Heroti pu'úmo na sise'i 'ahihuni jihuna'e aherimana roana.

¹²'Enarena hu ijá vwiha'ika'i iji'a va'e Joni ka'ene Makana 'wavujihuni oha Merina 'wavujihuni sei va'ana. Ijí ea mapoka ahuma hine siporua 'oji'i hijara.

¹³'E'eme hu roe ijí vwicha jiama kajino 'ana'anaume napara pina huni iha Rotana'omo ijara roe vwicha tirasa'iro venana.

¹⁴'Eji'i henajaho Pita oni ira henarena hu tatomajihuna vwicha patirasa'i kaivo ninuma va'e karohi sei vaji arume ijá 'iama Pitaho karoho ma'ahi naminu 'iamana.

¹⁵'Ejume pu hu ijá 'wava A niho'o nanama avanu 'wavara. 'Ejume hu ira ajira pu ijá 'iama Nimaa nimaa hu karoho ma'ahi naminu 'iamana. 'Enakaivo pu ijá 'wava Ijaho huni 'ona oji'inina 'wavara.

¹⁶'Enakaivo Pitaho majama hine vwicha 'ana'anauma henareja pu vwicha tirasavi'i kavajaho Pita kavara. 'Enareja pu niho'o oja hwa'usaha parajara.

¹⁷'Ejuma kimarena Pitaho iji hararajihe iruno'a are'avarono ruramana. 'E'ikaivo hu Natohwijara hua apene roe samai ranamaji 'waramana. 'Ene hu ijá 'iama Va'e Jemisiho 'ee vwehu nuna ka'ene nimaa roji'inijihija ijá 'wara'avara 'i'i kaivo kwaa pini va'ana.

¹⁸'E'eme vea nitu'eme Pitara ichi'i va'ajaho sorutia puruva rejumakame irano'a natohwa'e veji'i pira'aravara.

¹⁹'E'eme Herotiho hu samana kaivo hu papiunamana. 'Enarena hu 'aiha veji'inijija 'otua vetie 'ania kwamasahuna 'waramana. 'Enarena Pitaho Jutia are'i kaivo hu kami Sesaria va'e hinana. Herotira Kwamajina

²⁰'Enarena Herotiho Taia ora 'ee Sairani ora ki'eme hu ajimana. 'Ejumakame pu vwiha kwisu rene ahuma nianaa huni roara. Pu Parasitasiho kini huni ara 'ajohi'ina'omo pu puni mama'inijihi pu'úmo va'e matauma hihuni vu'a 'wame amairiara. Ijihuni maijaho pu puni 'iruma kinijihuni ara kwai 'ekura'omo avajara.

²¹'Ejumakame Heroti pu vu'a 'wara'irono na'ia kwino iji pijaha ranamana. 'Ena'omo ijí vea kajino hu huni kini huni ateha same va'e kini huni ruha 'ahi hinana. 'Enarena hu vu'a ni'ima'ura pu 'waramana.

²²'Ejume ea kajipo majama ijaho godoni ira heju kaivo emaapuna pana 'umejara.

²³'E'eme ni'aha kwino Natohwi jihuni 'ona oji'ini hu 'anaume huchapo apene ijuma kwamana. Ijihuni maijaho hu Godoni pinana pa'unama 'urina jihuna'e avanana.

²⁴'Enakaivo Natohwi jihuni irijaho niho'o rausaharena natohwa rena va'ana.

²⁵'E'eme Panapasi'o Soru'o Jerusaremi hiji'i kaukara vejuma pa'arejume pu kú'o 'unama va'e Joni ka'ene Makana 'wavujaho aheme pu pu'úmo roara.