Read Managalasi Akisi 14 Bible Online

Akisi 14 - Managalasi bible

Akisi 14

¹'Ejume pu va'e Aikoniami Jua puni Sinakoku vaji ahume hine vu'a 'unama ani'inijino 'waravume ea mapoka Jua 'ee Kuriki nimaa rojara.

²'Enakaivo Jua 'aho'a panimaa rojara. 'Ena'omo ijipo vejume Jenitaru ea ka'ene nimaa roji'inijija niho'o senavara.

³Pu no'o 'aha jora ijino hine paju'ika'i najahume Natohwijara ni'ajihe Hura maiji vwihaniaji najaharena aacha 'ee uneunecha ani ani'ina ka'ene ea areri pavehunijaho vajihume pu vejume rejara.

⁴'Ejumakame ea mapoka ka'ene ara kaji'urijija ea 'aho'a Jua puna'i rejume ea 'aho'a apasorua puna'i rejara.

⁵'Ejume Jenitarua 'ee Jua 'ee puni mama'inijipo ni'aha kwino 'urine apasorua kajihi ruarahe 'ee muni 'eke 'ani'irono vejara.

⁶'Ejumakame pu no'o ijí henareja juhaha va'e kwaa iha Raikonia va'areja ara iha Risitara Tepi 'wavuji va'ara. 'Ee ijí ara kajihipuni rori ara 'aho'a kajino va'ara.

⁷'Enareja pu ijino Godoni vu'a mai najahara. Panapasi'o Poru'o Risitara Tepi Hijajina

⁸Ea pina Risitara hinuna kaivo huni mumora irivi'ina 'omo oahoni tei vaji nija'ina rene roajihuna'e hu panamina onuna.

⁹'Ena'omo eakaho Poru oni vu'a hami henana. 'Ejume Porura hu kanamarena nia pa'ahatihi'i kanamajaho hu nimaa ronujihuna'e hu marahuna'e kamana.

¹⁰'Enarena hu ajira ijá 'wama 'Uri arini namina 'wavume hu ohurikune 'uri arini namina 'uraha onana.

¹¹'Ejume eaka mapoka kajipo ijí Porura raka ka'ene vena kaji pu kamareja pu Raikonia opuni iri ijá 'umeja godiepo emaa rene núni roa karihi kiha 'umejara.

¹²'Enareja pu Panapasiho iha pina Suusi 'wame 'ee Poruho 'waravi'ina ijihuna'e Hemisi 'wavara.

¹³Suusi oni Temiporua ijí ara kajihuni rori naminana'omo Pirisitia purumakau 'eke ea mapoka kajihi pu'úmo sinara siaavi'ina 'eke swasa ve'i 'ahiume vwicha jiami roara.

¹⁴Vea ka'ene apasorua Panapasi'o Poru'o hejajaho puna'e vehuna henareja pu no'o puni ateha 'unirame isoku'i kaivo pu ninukujaha va'e ea mapoka kajihi puni vaji va'e ijá 'umejara

¹⁵Ea ikije ja iraka'e ve'irono vejo? Nú 'u'o emaa areri jaa'ina. 'Enakaivo nú Godoni vu'a maa maiu'ina ja 'waravu jihuna'e ja ikija nimaa panakúne pata'arora'ika'i ta'arohe Godi nimaa ka'ene mai'o hiji'ina ka'ene akúpa vene mwe'a vene soha vene uneunecha ka'ene ijí navujaho venajihuni roha.

¹⁶'Ene amuja ka'ene kama'ahuni hina apene roajija Hu maki'eme eaka kwaa mapokakino hijajija Godi pataarorahe pu raka ka'ene ura ve'i 'ahiajaho vejara.

¹⁷Hu nimaa paranamia va'a paranana kaivo Hu mamaa 'ahie ni'ajihe neha akúpi 'ahi veju'e pine 'iruma veju'e maraju'ukame 'iruma ine teamanavura.

¹⁸Pu no'o raka ka'ene 'waravajaho ijí eaka mapoka kajipo swasa puna ka'ene ve'iro vejaji tanuhuna niho'o kisina renana.

¹⁹'E'eme Jua 'aho'a ka'ene Enitioki 'ee Aikoniami rene roajipo roe ea mapoka 'waravume pu ni'aha kwino muni 'eke Poruho 'anaara. 'Ene nikwamu ro'ika'i pu tairia apene va'e ara uri ranavara.

²⁰'E'eme Tisaiporuepo roe huni rora kajino tauhuhe nami'eme hu 'urine ari vaji va'ana. 'Ena'omo ijihuni sú'uhijino pu no'o Panapasi'i ara iha Tepi va'ara. 'Unama Siria Vaji Enitioki Roajina

²¹'Enareja pu ijino Godoni vu'a maa maiu'ina ea najahume ea mapoka tisaiporua'e rejara. 'E'eme pu 'unama Resitira 'ee Aikoniami 'ee Enitioki va'ara.

²²'Ejume pu va'e ijino ea ka'ene tisaiporua ni'ajihe puni nimairoa ija kisi 'uname hina vahuna'e 'warame ijá 'iava Haha natohwa'e hianame 'ee ea sise'i 'ahú'eje nú ja pu'úmo Godoni ara vahuna 'iavara.

²³Pu sosia kwinu kwinu puni eruta pijihume paarejumakivi'i 'iruma 'aura areme 'ee siporu 'ojume paarejume 'eke Natohwa ka'ene pura nimaa rojujihuni ija tahi irechamiara.

²⁴'Ejume pu va'e Pisitia useme 'ee Pamipiria va'ara.

²⁵'Enareja pu Peka Godoni vu'a najahareja iji'a Ataraia va'ara.

²⁶'Enareja pu kú'o 'uname sisima 'ahi ajima Enitioki roara. Nimarako iji pijihe Godoni maiji vwihaniaji huni kaukara vehuna'e irechamiume va'ara'omo venareja kú'o 'unama roara.

²⁷Pu 'unama roe Enitioki useme 'waravume sosia roe ahuma hi'eme Godira pu pu'úmo uneunecha ka'ene venajaho 'warame 'ee Jenitaruepo ichá'ina'e nimaa rohuni vwicha ka'ene tirasamajaho 'waravara.

²⁸Pu 'aha jora'e ijí tisaiporu pu'úmo hijara.