Read Managalasi Akisi 15 Bible Online

Akisi 15 - Managalasi bible

Akisi 15

¹'E'eme ea 'aho'a Jutia rene aneja vene vwehwaha kajihi najahe ijá 'iava Ja Mosisi oni tamani ja'ina'e sisa 'uhu'avajina vo ja pamaranihuna 'iavara.

²Poru'o Panapasi'o pu pu'úmo na'ia mapoka ni'ima'ura'e ninakaravume 'ee ea ka'ene Godi nimaa roji'inijipo Poru ho Panapasi ho 'ee ea 'aho'a ka'ene nimaa roji'inijihi pu'úmo iji pijihume Jerusaremi apasoru 'ee ea eruta 'aho'a ka'ene hijajihipuni nini ike 'wama amairi'irono va'ara.

³'Ejume ijí sosia kajara irechamiume pu va'e Ponisia 'ee Sameria ijino usevara. Pu ichá'ina'e Godi Jenitaru vejume Godoni ea rejaji nirisajihe 'waravume Godoni ehija henareja teamanamana.

⁴'Ejume pu va'e Jerusaremi usevume sosia 'ee apasorua 'ee erutapo pu 'ajorame aheravara. 'Ejume pu Godira pu pu'úmo uneunecha raka ka'ene vejajaho pu 'waravara.

⁵'Ejume Parasia 'aho'a ka'ene nimaa roji'inijipo 'urine arini nami'i kaivo ijá 'iava Ja pu sisa 'uhuahe 'ee 'warave pu Mosisi oni tamana ve'avara 'iavara.

⁶'E'ikaivo apasoru eruta ijipo vu'a kaji 'wama he'irono roe ahuvara.

⁷Pu natohwa 'wame nakara'eme Pitara 'urine arini nami'i kaivo ijá 'iama Vwehu nunakije ja nihejara. Nitama Godira joni vaji na iji pijihume nuni irijino Jenitaru Godoni vu'a maa maiu'ina najahume pu hene nimaa rojara.

⁸Godira eaka mapoki jihipuni oja vajijaho nihena ki paranarena pua'e najaharena Huni 'Avena nú múhaja'ina'e pu mihana.

⁹Hu kúmujaho núa 'ee pua ani'ina kaivo nimaa roijara puni oja vaji sisea soma amairiahana.

¹⁰'Enakaivo ja rakijihuna'e Godi venakame 'ee tisaiporua ahija miho? 'Ene emahu nuna 'ee núa areri paapehunijaho miho?

¹¹'Enakaivo Jesu ka'ene Natohwi jihuni maiji vwihanúajara rejume nú maranúa ja'ina'e pu 'u'o 'unama nikwisu'ina kajino vejume maraniana.

¹²Eaka mapoka ka'ene ijí hija kajija pu masuani varirareasaha Panapasi'o Poru'o Godira raka ka'ene pu pu'úmo Jenitaru puni aacha 'ee ea areri pavehuna ka'ene vejaji 'waravume hejara.

¹³Pu vu'a 'waravume paarejume Jemisira 'urine namine eha vene ijá 'iama Vwehu nunakije ike heha! 'iamana.

¹⁴Saimani ja ni'waravume ja nihejara. Godiho Jenitaru puni vaji ea 'aho'a Huni ihijihuna'e iji pijihe 'ekana.

¹⁵'Ejukame ike ira ikara poropetia puni iriji'i nimaa'e renu 'waravara.

¹⁶Ike uneunecha kihipuni túna'i Na kú'o 'unama roareje Teviti oni harai ara ka'ene auma tirausahe paranajaho kú'o vene amairihuna.

¹⁷Ija'ina vejakame ea 'aho'aka mapokijija Natohwijaho sahuna. 'Ene Jenitaru ka'ene Nuni ihijara 'umenajija 'u'o sarihuna.

¹⁸Nitama Natohwijara ike vu'akaho 'waramana'omo Hu iviamai ija'ina kú'o 'waramu 'iamana.

¹⁹'Enajihuna'e na vwihajujaho Jenitaru puni vaji Godoni ta'arohe roujija nú ahija pamihuna.

²⁰'Enakaivo roe nú puni pasia vene 'warave godi ira'ata puni 'irumaka vaji'avajaho paine 'ee 'uasa pavene hanuha 'aa rukina pai'avara.

²¹'Enajihuna'e na'ia mapoka'e Sapati veijino Mosisi rone Sinakoku vaji tahujaho ja nihejura 'iamana. Asura Jenitaru Nimaa Roji'ina Puna'e Venajina

²²'E'eme apasorua 'ee eruta 'ee sosia maho'o hejume nimaa'e rejume pu ea puni vaja kajino Panapasi'o Porui pu'úmo Enitioki va'avarono Jutasi ka'ene Pasapasi'o Sairasi'o nimaa roji'ina puni vaja kajino ea uranii'ina'omo ijí ija pijihara.

²³Pu pasikaho apena va'ara.Apasorua 'ee vwehu nuna ka'ene eruta ijipo vwehu nuna ka'ene Enitioki 'ee Siria 'ee Sirisia Jenitarua ka'ene hijujihi 'ajorame Esu'ua 'iavu.

²⁴Nú nihi'eju'e núni vajakino ea 'ahopu nú pa'wara'eju'e vu'ajime ira ani 'waravu'e ja iviamaa joni vwiha puruva retiu.

²⁵'Enajihuna'e nú ahuma hine 'wama amairiu'e mamaa reju'e ea iji pijihe irechamiu'e Panapasi'o Porui pu'úmo joni vu'u.

²⁶Ea ikija puni hia núni Natohwa ka'ene Jesu Keriso oni ihijihuna'e hami pahijura.

²⁷Nú ijihuna'e Jutasi'o Sairasi'o irechamiume joni vu'ura'omo ijipo pura puni irijino vu'a nikwinu'ina kajaho 'warahuna.

²⁸Nú Godoni 'Avenijihi pu'úmo vwihajujaho nú unenu'u pina ahisina joni haha 'aha paranavu. 'Enakúne ja ikeru ve'avara.

²⁹Ja godi ira'ata puni 'iruma ka'ene vajihujaho paine 'ee 'aa paine 'ee hanuha ka'ene 'aa rukina paine 'ee 'uasa pave'avara. Ija'ina ve'avajaho ja mavarasa'ina vena avahuna. Esu'ua 'iavara.

³⁰Pu ea kajija irechamiume kami Enitioki va'ara. 'Enareja pu sosia 'ivume roa ahuvume pasia kajaho mihara.

³¹'Ejumakame pasia 'aha kajino vu'a ka'ene ni'ajihe 'waravaji taha kamareja pu niho'o teamanama parajara.

³²Jutasi'o Sairasi'o poropetia'omo pu no'o vu'a 'aho'a ijá kajihipuni nimaa rojujara kisina'e re'amarono ni'ajihe 'waravara.

³³'Enareja pu no'o ijino 'aha josu hinareja iji'a vwehwapo irechamiume 'uname ea ka'ene pu irechamiume roajihipuni va'i vejumakivi'i pu 'ajoravume pu no'o va'iro vejara vo

³⁴Sairasiho hu ura ijino hi'iro 'ahaume hinana.

³⁵'Enakaivo Poru'o Panapasi'o ijino Enitioki na'ia 'aho'a hine ea 'aho pu'úmo hine Natohwi jihuni vu'a najahe 'waravara. Poru'o Panapasi'o Ranaramareja Va'ajina

³⁶'Ena'omo na'ia pini Poru Panapasi ijá 'wama Roe va'e araka mapokakino Natohwi jihuni ira ka'ene nú no'o najahajija vwehu núna ichá'ina veji'i hijukúne kiva 'wamana.

³⁷'Ejume Panapasira ura renajaho Joni ka'ene Makana 'wavujara pu pu'úmo vahuna'e ura renana.

³⁸'Enakaivo Porura vwihanajaho mai'o areria parenana. Ijihuni maijaho hu na'i pini pu pu'úmo va'u va'o va'e Pamipiria rene ranamúe 'unama ro'i kaivo hu pu pu'úmo kaukara pavena va'ana.

³⁹'Ejumakame pu panimaa vetiarame rana'arame Panapasira Makaho aheme sisima ajime Saiparasi va'ana.

⁴⁰'Ejume vwehwapo 'urine Natohwi jihuni maiji vwihaniuni vajijino irechamiume Porura Sairasi aheme va'ana.

⁴¹'Ejume hu va'e Siria 'e'une 'ee va'e Sirisia va'ana. 'Ene sosia ka'ene ijino hijujija ata kisi nami'avarono vu'a ni'ajihe 'waramana.