Read Managalasi Akisi 19 Bible Online

Akisi 19 - Managalasi bible

Akisi 19

¹Aparasiho Koriniti hi'eme Poruho 'unama hurunami Epasasi roe tisaiporua 'aho'a piunimana.

²'Enarena pu ijá 'iama 'Ú veaka ja nimaa rojajaho ja Godoni 'Avena niapejare? 'iavume pu hu ijá 'wava Pana. Nú Godoni 'Avena ijino hinu ho pa'ajaho puruva renu 'wavara.

³Hu ijá 'iama Ea irara toa samahajihunijino samahare? 'iamana. Pu ijá 'wava Jonira toa samahajihunijina 'wavara.

⁴'Ejume Porura ijá 'iama Jonira ea samajaho emaapo puni sisea are'i kaivo ta'aro'avarono samai'i ijá 'iama Ea ka'ene nuni túna'i rouji nimaa ro'avara 'iamana. Ijaho Jesuna 'iamana.

⁵'Ejume pu ijí henareja Jesu ka'ene Natohwi jihuni iha 'ahi toi samaara.

⁶'Ejume Porura huni ija puni húmata 'ahi irecha'eme Godoni 'Avena ariha roe pu samahume ira ani ani 'wame 'ee túna'i raka ka'ene rehunijaho 'waravara. 'Ejume pu Godoni vu'a ea 'aho'a 'waravara.

⁷Pu ea ka'ene ija'ina vejajaho ea iropu ropu no'o avajara.

⁸'E'eme hu va'e Sinakoku vaji Godoni vu'a hine paju'ika'i naja'eme masapa no'opisu pa'arenana. Hu venae pu Godoni ariji nimaa ro'avarono hu pu pu'úmo hine pira'aramana.

⁹'Enakaivo ea 'aho'a kirasaha parane 'ee vu'a pahene 'ee ira sisea 'Unama kaji rone ea mapoka puni una'i 'waravumakame Poruho pu irechami'ika'i tisaiporua aherame va'e Tiranasi oni sikuru ari najahe 'ee pira'aravi'i hijara.

¹⁰'Ejumakame juara no'o vaja kajino Jua 'ee Kuriki ora ka'ene Esia vaji hijujija Natohwi jihuni vu'a hejara. Emapo Areri Pavejujipo Epasasi Rejajina

¹¹'Ejume Poruho Godira harura mahume hu uneunecha mapoka'e ani ani ea areri pavehuna venana.

¹²'Enare'e pu hununa'i akisia 'ee ateha hasa ijino ea ka'ene atama 'uniravi'ina'e 'ee 'avena sisea 'ajima'ina vajihu'e atama sonahiu'e 'ee 'avena sisea ariha va'ura.

¹³'Eju'ukame Jua 'aho'a ka'ene kwaaka mapoka kajino 'urahoji'i ea marirama apena ojujipo Jesu ka'ene Natohwi jihuni ihi 'urahi'i ea ka'ene 'avena sisei ajimahi'inijihi siomahe ijá 'iava Jesu ka'ene Porura najahu jihuni ihi 'urahi'i 'waravukúne useha 'iavara.

¹⁴Ijaho Jua puni pirisitia ni'inijaho Sivana'omo harihwaha ea iropu no'o ijipo ija'ina vejara.

¹⁵'Enakaivo 'avena sisea kajara eha vene ea kajihi ijá 'iava Nú Jesuho nihene kame 'ee Poruho nihene kavura kaivo ja irahipune? 'iavara.

¹⁶'Ejume ea ka'ene 'avena sisei ajivi'ina kajara ohurikune puni haha 'ahi ajime rarene 'anie haha puachamie 'ee ateha isokuniume maisu sea kajaho areme juhaha samai va'ara.

¹⁷'Ejumakame ea ka'ene Jua 'ee Kuriki ora ka'ene Epasasi hijajipo ijí vu'a kaji henareja pu tea junavara. 'Ejumakame pu Jesu ka'ene Natohwijaho ta'arohara.

¹⁸'Ejumakame ea ka'ene nimaa roji'inijipo puni roajime pu raka ka'ene sisea vejuji samai nahama 'waravu.

¹⁹'E'eme ea mapoka ka'ene atama rukina 'ee 'úsia veji'inijihipo pu puni puka ka'ene 'úsia ichá'ina vejujija mapoka ni'aha kwinu 'eke eaka mapoki jihipuni una'i veni jaara. Uneunecha ikija monia mapoka mapoka (50,000 kina) 'imejara.

²⁰'Ejume Natohwi jihuni vu'a emarene 'ee rausahe 'ee kisina'e renana. Epasasi Vaji 'Ura'aravajina

²¹'E'eme ijihuni túna'ijino Poruho hina oja vaji vwihana ijá rona Na va'e Mesatonia 'e'une va'e Akea 'e'une va'e Jerusaremi vahuna. 'Enareje ijihuni túna'i na va'e Romu 'u'o kahuna ronana.

²²'Enarena hu Timoti'o Irasitasi'o hu ni'ajahi'ina'omo nimarako irechamiume Mesatonia va'ara. 'E'eme hu ijino Esia vea ma'uako hinana.

²³'E'eme ijihuni vea kajino ea 'aho'a Epasasi hijujija Natohwi jihuni 'unama senavumakame pu hine niho'o ni'ima'ura 'uraara.

²⁴'E'eme ea pina huni iha Timiturisi 'wavura'omo ijaho siriva'i 'wavuji uneunecha venuna'omo huni kaukara siriva kajino godia napara'e Aritimisi 'wavuji vesamuna. 'Eju'e ea mapoka'e kaukara kajaho vejura.

²⁵'Enarena hu ea ka'ene kaukara nikwinu'ina hura venu kaja'ina veji'inijihija 'umenaume ahuma roume hu ijá 'iama Ehu nune ja niheju. Nú ike kaukara iki venare'e nú hami mamaa hijura.

²⁶Ja nikama hejuja'ina'e Epasasieru pana kaivo Esia maho'o ike Poru ikara venau'e ea mapoka ijá 'wavo godia ka'ene iji vejujija godia pana 'úvu.

²⁷Ike núni kaukara ikara pa'arene 'ee varapi rehuneru pana kaivo napara godia ira'ata natohwa ka'ene Aritimisi oni Temiporua maa pa'ana reje 'ee Esia 'ee mwe'a ikino hua oja mahe 'ee huni pinanaka mamaijaho niho'o pa'arena va'u 'iamana.

²⁸Vea ka'ene pu ijí hejajaho niho'o ajinama parajume ira ajira ijá 'umeja Aritimisiho Epasasi opuni ni'ina 'umejara.

²⁹'Enareja pu ea mapoka ka'ene ara kaji'ura kajija pu urimaravume ani rejumakavi'i Keasi'o Arisitakasi'o irisame 'eka va'e 'otua vejuri sei va'ara. Pu no'o Mesatonia ora kaivo pu Poru oni napuhija'omo hu 'ajahe ojura.

³⁰'Ena'omo Poruho hu ura eaka mapoka kajihipuni vaji va'i 'ahaana kaivo ea ka'ene nimaa roji'inijipo tanu'urahara.

³¹'Ejume Esia ora mama'ina 'aho'a ka'ene huni napuhijijipo hura hara tanu'urahe nu'úha vaja pava'e aru'amarono 'waravara.

³²Ea mapoka ka'ene ijí hija kajija puni vwiha ijaho puruva rene ani ani vwihajara. Ea 'aho'a vu'a kwino vwihajume ea 'aho'a pu vu'a 'aho'a 'umejara kaivo pura roe ahuma hija kajihuni maijaho pahejara.

³³'Enareja Juaka mapoka kajipo Arekisanitaho tairia apena va'e raname 'ejahaume hu va'arena pu ni'aji'irono ija ahasirime ruramana.

³⁴'Enakaivo eaka mapokijipo kama hejajaho hu Jua ora hejara. 'Enareja pu vea muka no'ohe'i ea mapoka 'urina pakame ajira ijá 'umeja Aritimisiho Epasasi opuni ni'ina'e 'umeji'i navara.

³⁵'E'eme Epasasi opuni ara huni karaka ijara ea mapoka ruramarena ijá 'iama Epasasi orakije! Ja ea irara Aritimisi ka'ene ni'ini jihuni Temiporua 'ee emaa sa'ina ka'ene kahi akúpa 'ahi rene 'onaji'i Epasasi opo 'ajohaujaho pahejure?

³⁶'Ena'omo ea pina nú ike pavejura 'iahuna areria panakúne pavwiha'ika'i masuani hine 'ohura paapeha.

³⁷Ja ea ka'ene aherama roakija pu unenu'u pina joni Temiporua vaja kajaho nesi paapejara 'ee pu ira sisea pina muni napara godia kehuna'a pa'waravara.

³⁸'Enakaivo ike 'otua vejuri ruhakaho vwicha tatiranavu'e ea ka'ene 'otua veji'inijaho ijí hinuna'omo Timitiriasiho 'ee pwehwa pu'úmo ea irahija'e 'otua vetihuna re'avajaho roe 'otua vetia.

³⁹'Enakúne joni vu'a 'aho'a na'avajaho kanisoruapo vea ka'ene pu ahuma hi'avaji 'wama amairihuna.

⁴⁰Nú iki hine ani ani vejujihuni maa panamuna'omo kamati mai'o 'otua ni'ima'ura nú vetúhuna. 'Eje nisi ike nú roe ahuvukaho maa pa'ana'e rehuna 'iamana. Noinnisi ike nú roe ahuvukaho maa pa'ana'e rehuna 'iamana.

⁴¹'Ejume hu ijá 'wara'i kaivo ea ka'ene ahuma hija kajija irechamiume va'ara.