Read Managalasi Akisi 22 Bible Online

Akisi 22 - Managalasi bible

Akisi 22

¹Vwehu nuna 'ee emahu nuna. Nuni vu'ake ataa apúsama heha. Nara raka ka'ene vejuji iviamaa joni una'i namine 'wara'i veju 'iamana.

²'Ejume hu huni vu'a Jua puni ira 'waravuma henareja pu niho'o areme varira re'asahe hina hejara.

³'Ejume Poru ijá 'iama Na Jua nuni ohijara Tarisasi Sirisia vaji naheniana kaivo ike arakino renarejo Kamerieri oni hari emahu nupuni tamana hena ka parajuta. 'Ena'omo ja iviasi Godoni jihuna'e sena veju kaja'ina'e na 'u'o ija'ina vejuta.

⁴'Enare'e na ea ka'ene 'Unama ikehunake vejajaho sise'i 'ahiura. 'Ene na ura pu 'anie kwamasa'avarono vejura. 'Ene na parui napari 'eke tipurai irechamiura.

⁵'Ene ea ka'ene pirisiti natohwa 'ee emakina ka'ene kanisoru ijija vu'aka na iviamaa ja 'waravukaho pu nihena kavara. Ijihuni maijaho pura pasi ka'ene veja kajara harura mihume na va'e Jua ka'ene Tamasikasi hiju jihipuni va'e ea puna ka'ene ijí hijujihija'e kamorame aherama Jerusaremi sise'i 'ahi'i va'uta. Porura Juapuni Una'i Ori'ini Anakarame 'Waramajina

⁶'Enarejo na va'e Tamasikasi va 'e'u'irono va'eme vea rira mu'oi nami'eme ni'aha kwino kahino akúpi 'ahi rene hanana tauhuhiana.

⁷'Ene na ni'aha kwino 'ona apena arihe mwe'i ninavi'i hejume ira kahi akúpa 'ahi rena roe ijá 'wima Soru Soru a raka vena Na sise'i 'ahiu? 'wimana.

⁸'Ejume na eha vene Hua apome ijá 'wavo Natohwe A rarane? 'wavume Na Jesu ka'ene Nasareti orijina'omo a Na sise'i 'ahiu 'wimana.

⁹'Ejumakame ea ka'ene nú pu'úmo vu'a kajija ijí hanana kajaho kavara kaivo ira ka'ene ea irara na 'warimajaho pahejara.

¹⁰'Ejume na apoma ijá 'wavo Natohwe iviamaa na ichá ve'ejo? 'wavuta. 'Ejume Hu ijá 'wima 'Urine Tamasikasi va'e ea ka'ene ijí hinujara ara raka ka'ene ve'amarono Nara iji pijahujaho hu a 'warava he'amana 'wimana.

¹¹'E'eme ijí hanana kajara vejume na paniriarejo pivujume ea ka'ene nú pu'úmo roa kajipo na iji 'unirimapene Tamasikasi va'ara.

¹²'Ejume ea pina huni iha Ananaiasiho puni tamana hami hami vejukame Jua maho'o ka'ene ijino hijujija hua ea mamaa 'wavura.

¹³'Ena'omo ijara roe nuni rori nami'i kaivo ijá 'wima Vwea nuna Soru oni nia niria 'wivume nuni nia kú'o maranana. 'Ejume na hu kavuta.

¹⁴'Ejume hu ijá 'wima Emahu nupuni Godijara a Huni ura ijí hena kame 'ee ea ka'ene arimaa ijí hena kame 'ee Huni irititi vu'iji he'amarono iji pijahana 'wimana 'iamana.

¹⁵'Ena'omo a raka ka'ene kama 'ee henajaho Hu rone ea maho'o najahuna.

¹⁶'Enakaivo a irakijihuna'e tetama hino? 'Urije Huni ihijino 'urahi'i toi apúsama'e oni sisea soma'e pa'arenama 'wimana. Porura Va'e Jenitaru Vu'a 'Waramarono 'Umenajina

¹⁷'Ejume na kú'o 'unama Jerusaremi roarejo ijino Temiporu vaji hine siporua 'oji'i navaha rojuta.

¹⁸Ijí navaha kajino na kavume Hu ijá 'wima Mamako Jerusaremi are'i kaivo 'urine va'a. Ijihuni maijaho a Nuni vu'a iki naja'amajaho pu pahe'ejakúne 'wimana.

¹⁹'Ejume na ijá 'wavuta Natohwe pu na nihejura. Nitama na va'e Sinakoku pina aruma 'e'une 'ee pina aruma 'e'uji'i ea ka'ene Aa'e nimaa ronaujija 'eke hijihae 'ee tipurai irechamiuta 'wavuta.

²⁰'Ejume ea ka'ene oni vu'a 'waravi'ina hena kavi'ina huni iha Sitivini oni 'aa ka'ene arihajaho na ijí nimaa veji'i ea ka'ene hua'e 'anaajihipuni ateha 'ajoha namijuta.

²¹Hu ijá 'wima Nara a kwai natohwi Jenitaru puni kwai ranamaukúne va'a 'wimana 'iamana.

²²Pu hine huni vu'a kajaho henapena va'u va'u hu ijí 'waravuma heji'i pu ira ajira ijá 'umeja 'Anaa kwamama! Ea ija'ina ikaho mwe'a pahihunakúne pamaka'eje hinama 'umejara.

²³Pu ijano 'umena apene oji'i puni atehi 'eke ato'arume 'ee útiti 'ene icha toi ato'aruvara.

²⁴Sorutia puni natohwijara apene puni kwai roe hijahi'i apomakame irakijihuna'e pu hu mwasiritia jihuni maijaho hu 'waramaro avajara.

²⁵'Ejume pu hu kamo'eme Porura sorutia'e 'ajoha'iniji ijá 'wama 'Ú ja Romu ora areri 'otua pavene he'i kaivo hijihaure? 'wamana.

²⁶'Ejume ea ka'ene 'ajohi'inijara ijí vu'a kajaho hene va'e ea ka'ene Natohwijaho ijá 'wama Eakaho Romu ora'omo a iraka'e ve'i veno? 'wamana.

²⁷'Ejume ea Natohwa kajara huni roe ijá 'wama 'Ú a Romu ora re'amajaho 'warima 'wavume hu I'a 'wamana.

²⁸'Ejume ea Natohwa kajara ijá 'wama Na roe Romu opuni ea re'i vejujaho monia eha ni'ima'ura vejuta 'wamana. 'Ejume Porura ijá 'wama Na iki nahenia jihuna'e na Romu ora rejuta 'wamana.

²⁹'E'eme ea ka'ene ijí hu apome 'ee hua hija'i 'ahiume roajivajija ni'aha kwinu jumareja arevara. 'Ejume ea Natohwa kajara vwihanajaho hu Poruho Romu ora 'ee majikari kamomana ronarena hu tea jumana. Poru Kanisoru Puni Una'i Ahema Va'ajina

³⁰Ijí ea Natohwa kajaho hu irakijihuna'e pu Jua Poru namahu ronarena ijihuni maiji hami he'i 'ahaana. 'Ejume ijihuni sú'uhijino senia ka'ene hu kamovajaho rasama'i kaivo 'ona ranavume ea ka'ene pirisiti mama'ina 'ee kanisorua maho'o roe hi'eme hu Poru ahema apene roe puni una'i roana.