Read Managalasi Akisi 24 Bible Online

Akisi 24 - Managalasi bible

Akisi 24

¹'Ejume hu hi'eme na'ia iropu pa'are'eme pirisitia natohwa ka'ene Ananaiasina 'wavujaho 'ee puni emakina 'ee ea ka'ene 'otua arimai 'waravi'ina 'ajohi'ina huni iha Taturiasi 'wavujihi pu'úmo roe kavana ijihuni una'i Poru 'otua veti'i roara.

²'Eju'e ea natohwijara Poruho 'umejume roume Taturiasi hine 'otua veti'i 'ahaume aneja vene hu namahe ijá 'wamaKavana! Ara nú ni'ajúhu'e kame nú mamaa hina rou. Ara oni vwiha ka'ene mamaijino nitama núni ehija ni'ajihu'e ararakino veju'e siserasahujaho marasahara.

³'Eju'ukame nú niho'o 'unama jajaa 'ee kwaa mapokakino ijaho 'wamare'e teamanuma parajura. Ijihuna'e nú a Pirikisi ka'ene ea mamaakere teimani 'wavu.

⁴'Enakaivo na hine veje a túkirahuna senumu. 'Ena'omo a ichá'ina vehuniji 'waru'amarono jariravukúne a núni vu'ake hena.

⁵Nú kavujaho eakaho niho'o ani ani vene 'ee ruaruhuna. 'Eju'e Poruho veju'e Juaka mapoka ka'ene kwaaka mapokakino hina apenojujijahija ajinama parajura. Hu ea sisea ka'ene Nasareti 'wavujihipuni húmatijina.

⁶Hu Temiporu vejume chiha renana. 'Eju'ukame nú hu 'uname nuni tamanijara 'warumu ja'ina'e 'otua vetihuna'e ura veju.

⁷'Eju'ukavi'i Risiasiho Romu opuni sorutia puni natohwijara roe harura vene núni ija tahi apetujúha va'ana.

⁸'Eju'ukame hu ea mapoka 'waravu'e ea irahipo hu namahujaho oni una'i roe 'otua vetihuna 'wamana. 'Ena'omo ara ea kajaho apovakame hura huni irijino 'warave a hehuna. Núra raka ka'ene hu namahare'e 'otua veti vejujaho hu 'warave a hehuna 'wamana.

⁹'Ejumakame Jua 'aho'a vu'a kaji henareja pu 'u'o ijaho nimaa 'wavara. Porura Pirikisi Oni Una'i Huni 'Unama Amairie 'Waramajina

¹⁰'Ejume kavanaijara Porura 'wara'amarono 'waramana. 'Ejume Porura ijá 'wamaNa niheju. A juara mapoka 'otua veji'ina'omo na teamani'eju'e vu'a ikaho 'waravu.

¹¹'Enakaivo nara vu'a nimaa ka'ene 'waravuke hena. Na'ia iropu ropu no'o pa'are'eme na Jerusaremi Godi oja ma'i va'uta.

¹²'Enakaivo Temiporu vajina ho Sinakoku vajina ho ara vaja kakino na ea 'ahopu'úmo 'urae varapa vehuna pana.

¹³'Ena'omo iviamaa pura vu'a ka'ene na 'otua vetihuni jihuni maijaho pura a najahuna niho'o areri parenau.

¹⁴'Enakaivo na ura vu'a kwinu a 'wara'i veju. 'Unama ka'ene ea mapoka nimaa rojujihunijaho pu sisea nimarako a 'warava kaji na a 'wara'i veju. 'Enareja emahu nupo Godi ka'ene nimaa rojuji na oja mahuta. 'Ene vu'a ka'ene tamana vaji navujija na nimaa rojura. 'Ene vu'a ka'ene poropetiepo vejajija 'u'o nimaa rojura.

¹⁵Na nimaa rojujaho ea ka'ene kwamasahi'inaka ea ariramaa 'ee ea siseijipo kú'o 'urihunaka pura nimaa rojaja'ina'e na 'u'o nimaa rojura.

¹⁶'Enajihuna'e na na'ia mapoka harura vejukame nuni vwiha veju'e Godoni una'a 'ee emaapuni 'una'i arira'e navu'e na namihuna areri parenuna.

¹⁷'Ejume juara 'aho'a pa'are'eme na swara 'eke nuni ara kwaa kú'o nuni ehija'e vaji'irono routa.

¹⁸Na Temiporu vaji marani'ama tamana'e vejujaho ijihi'a ea mapoka pane 'ee irano'a pana kaivo Jua ka'ene Esia rena roajipo kivara.

¹⁹'Ena'omo ijipo iviamaa oni una'i namine unenu'u 'aho'a na namihe 'ee 'otua vetihuna re'amajaho 'otua vetia.

²⁰'Enakúne ea ka'ene ike namijukehi aporave na kanisoru puni 'una'i sisea raka'e veje kivara'e re'avajaho pupusu 'warave hena.

²¹'Ene unenu'u pina kwinu puni una'i namiji'i 'umejujaho ikena. Na ea ka'ene kwamasahi'inijipo kú'o 'urihuniji nimaa rojujihuna'e ja na iviasi joni nini 'otua vetiu 'iavuta 'wamana.

²²Pirikisiho 'Unamijaho hami hena kavi'ini jihuna'e tanuma ijá 'iama Risiasi ka'ene sorutia puni natohwijara roe arihakame hura joni 'otujihuni ehijaho vwihane mihuna 'iamana.

²³'Enakaivo hu ea ka'ene 'ajohi'iniji 'waravume Poruho apene 'ajohai'i ranave 'urahoje Poru oni napuhija roe uneunecha hu ni'aja'i ve'avajaho patanu'uri'avara 'iamana. Porura Pirikisi Oni Una'i Naminajina

²⁴Pirikisi oni naparijaho Jua. Huni ihijaho Turusirana'omo Porura roe Jesu Keriso nimaa rojuji 'warave he'irono roana'omo 'waramana.

²⁵'Ejume Porura 'unama ariramaaru vehuna 'warame 'ee hia hami 'ajohuna 'ee Godira 'otua túna'i ni'ima'uraka vehunijaho 'waravume Pirikisiho ijí henarena tea juvume raname ijá 'wama Va hino'eje nara kú'o 'umena heji'i ro'amana 'wamana.

²⁶'Ene veaka nikwinu'ina kajino Pirikisira vwihanajaho Porura hua'e monia vaja'eje ranava va'amarorena hu na'ia mapoka Poru 'umeju'e hu va'e hu hu'úmo vu'a 'wavura.

²⁷'E'eme juara no'o pa'arejume Posiasi Pesitasira Pirikisi oni tinijaho apenana. 'E'eme Pirikisiho Jua teamana'avarono hu Poru tipurai rana'ika'i va'ana.