Read Managalasi Akisi 5 Bible Online

Akisi 5 - Managalasi bible

Akisi 5

¹'Enakaivo ea iha Ananaiasi'o naparaha ka'ene Sapairana 'wavuji'o puni mwe'a 'imejara.

²'Enareja Ananaiasiho ijí monia kajaho 'aho'a hu 'eka'i kaivo 'aho'a 'eka roe Jesuni apasorua pisivia vajihumakame naparaha hena kamana.

³'Ejumakame Pitara ijá 'wama Ananaiasi'o a irakijihuna'e Setani oni oja ruha apejumakame a oni mwe'aka 'imenarena monia pwinana'a a 'ekivo Godoni 'Aveni jihuni una'i ira'ata venane?

⁴Maraku'ijaho mwe'akaho omaa 'wa? 'Ene iviamaa monia 'imejake 'u'o omaa 'wa? 'Enakaivo a rakijihuna'e oni oja vaji ika'ina'e vwihanane? A nú emaa papisimúu kaivo a Godoni una'i ira'ata venana 'wamana.

⁵'Ejume Ananaiasi ijí henarena ni'aha kwino mwe'i 'one kwamana. 'Ejume pu ea ijí hene tea junamana.

⁶'E'eme kivapo roe huni haha apene mwame apena va'e kwananavara.

⁷'E'eme vea oma no'opisu pa'are'eme nusirei huni napara roe raka ka'ene huni parua renajaho pahena pakavi'i roana.

⁸'Ena'omo Pitara ijá 'wama 'Ú jara mwe'a kajihuni monia ehaka apejajaho ijarune 'wavume hu I'a nijana 'wamana.

⁹'Enajihuna'e Pita ijá 'wama Irakijihuna'e ja no'o paruune'i 'wame Natohwi jihuni 'Avena vena kavare? Hena! Kivasa ka'ene iviamai roe vwicha jiami namiju kajija paruuna apena va'e kwanana'i va'ara'omo pu a 'u'o apena vahuna 'wamana.

¹⁰'Ejume hu ni'aha kwino 'one huni mumora rora kajano kwama namana. 'Ejume kivasa kajipo roe aruvi'i kavajaho napara kajaho kwamana kamareja pu apene va'e paruahoni rori kwananavara.

¹¹'Ejumakame sosia kajaho maho'one 'ee ea ka'ene ijí hejajija niho'o ni'ima'ura'e tea junamana. Emapo Areri Pavejujine 'Ee Oja Hwa'usahujina

¹²Apasoru ahuma Saramani oni oroti hiji'i ea mapoka puni vaji aacha ani ani'ina 'ee uneunecha ka'ene ema areri pavehunijaho vejara.

¹³'Eju'ukame panimaa roji'ina 'aho'a paroe pu pu'úmo hiju kaivo pu apasorua kajihipuni pinana hena 'ee pu ta'arorahara.

¹⁴'Enakaivo ea mapoka mapoka parui napari Natohwiji nimaa rojajija roe ijí huri ahumahume ajima va'ara.

¹⁵Ea pu atama 'uniravi'ina mapoka puni suha ateha 'eka roe 'unamu toi kajino irechama apene va'eju'e Pitara puni rori va'e huni 'avenijara atami 'uniravi'ina kajihi puni hura kaji niha rene raurihuna.

¹⁶Ea mapoka Jerusaremi rori hijujipo ea puna ka'ene atami 'uniravi'ina 'ee 'avena sisea ajima'ina aherama roume pu 'u'o vejume maho'o maraniara. Apasoru Ruaraha 'Eka Tipurai Irechamiari Vu'a

¹⁷'E'eme pirisiti natohwa 'ee ea ka'ene Sajusia pu'úmo niho'o ajinamana.

¹⁸'Ejumakame pu 'urine apasorua 'unirame 'eke va'e tipurai irechamiara.

¹⁹'Enakaivo na'ii Natohwi jihuni 'ona oji'ini roe tipura ara kajihuni vwicha tirasa'i kaivo aherama roe ma'ahi irechamiara.

²⁰'E'ika'i ijá 'iava Ja va'e Temiporu vaji namine ea mapoka majama hihuni vu'a kaji naja'avara 'iavume

²¹pu ijí hene 'urijajaho sú'u sú'u vea mai'o ahara sama kamino va'e Temiporu vaji najahara. 'E'eme pirisitia natohwa 'ee puni ehijijipo Isureri opuni emaa 'umenaume roe rira kwino ahuma hi'i kaivo ea irechamiume tipurai hiju ro'ika'i ahera'i va'ara.

²²'Enakaivo ea ka'ene tipura 'ajohi'inijipo va'e kivara tipura vaja pakimareja roe 'waravara.

²³'Enareja ijá 'iava Nú kavajaho vwicha roku vene kisima'ura vejume na'eme ea ka'ene tipura 'ajohi'inijija vwicha jiama kajino namijara kaivo nú vwicha tiraha aruma va'ajaho ea pina niho'o ijaho vaja pahinana 'iavara.

²⁴'Ejume pirisiti mama'inijija 'ee Temiporu puni hirisima vu'a kaji henareja pu vwihajume puruva rejume ijaho ichá rene aranane 'wavara.

²⁵'E'eme ea kwino roe ijá 'iama Heha! Ea ka'ene jara tipurai irechamiajaho Temiporu vaji namine vu'a ea najahu 'iavara.

²⁶'Ejume hirisima natohwijaho 'ee huni hirisima va'e pu aheramana kaivo pu ea mapoka juhamareja harura pavene irisava jihuni maijaho ea mapoka ka'ene puni vu'a heja kajipo muni 'eke 'anihuna vwihanareja ijihuna'e masuanu'wi aheravara.

²⁷'Enakaivo pu aherama roe kanisoru puni una'i irechamiume namijumakivi'i pirisiti 'ajohi'ina natohwi jihipuni una'i irechamiara.

²⁸Nú ja tanu'urihe ja Iha Ikaho pa'urahi'i ea najahuna 'waravara kaivo kaha! Jara najahu kajara Jerusaremi rarena paranana'omo nú Ea kajaho 'anaume kwamana 'wame namuhu 'iavara.

²⁹Pitaho 'ee apasoru ijipo eha vene ijá 'iava nú Godoni iraru hene vehuna kaivo emaapuni ira pahehuna 'iavara.

³⁰Núni omijihipuni Godijara ja Jesu ka'ene korosi 'ahi 'anaume kwavume Hu vejume 'urinana.

³¹'Enarena Hu Godira 'unama apene Huni ija mana'inija'i ranavu'e Natohwa rene ni'ajihi'ina'e renana'omo Isureri ora puni sisea ta'arohe aremamaa are'avajaho Hu vwihania arehuna.

³²'Ena'omo nú raka ka'ene Hu venuji kama hejaji rone ja najahu. Godoni 'Aveniji 'u'una. 'Ena'omo Godira ea irahipo Huni ira hene vejuji Hu mihuna.

³³Vea ka'ene kanisoruepo ijí hejajaho niho'o oja vaja 'uhusamiume pu apasorua kajija 'ania kwamasa'avarono vejara.

³⁴'Enakaivo Parasia pina huni iha Kamerieriho tamana'e najahi'ina'omo ea mapoka'e huni hura veji'ina. 'Ena'omo ijara 'urí arini nami'ika'i ijá 'iama Pu irechamie ma'ahi ma'uako va'ava 'iamana.

³⁵'Ejume hu ijá 'iama Ja Isureri orakúne hami hami vwihaje areri re'eje iji'a ja unenu'u pina pu veti'avara.

³⁶Ja nitama nihejara ea iha Tutasi oni pinana 'urine ijá 'iama Na harura rukina 'i'i kaivo ea mapoka mapoka (400) aherama va'ana kaivo ea 'ahopo hu 'anaume kwamana. 'Ejume ea ka'ene hua nimaa rojajaho juhaha ani va ranavara. 'E'eme kaukara ka'ene pura vejajaho pa'arenana.

³⁷Ijihuni túna'i ea tahari veijino Jutasi Karari orijihuni pinana 'urinana. 'Enarena hu ea mapoka aherama va'ana kaivo ea 'ahopo hu 'u'o 'anaume pa'arenana. 'Ejumakame ea ka'ene hu nimaa rojujaho juhaha ani va ranavara.

³⁸Ijá vejara'omo iviamaa na ja 'waravu. Ja ea ikihi puni rora paruva'avara kaivo maki'eje pu pupuso hija. Ijihuni maijaho pura raka ka'ene vwihane vejujaho ema puni rena roana'e re'amajaho roe pa'arehuna.

³⁹'Enakaivo ijaho Godona re'amajaho jara ei pini tanuhuna areria pa'ana. Ijihuni maijaho vejuro'i ja Godi'i pu'úmo 'araha ve'ejakúne 'iamana.

⁴⁰'Ejume pu huni vu'a kaji henareja iji'a 'umenaume apasorua kajija roara. 'Ejume pu hijiha'i kaivo ira kisina'e 'warame tanu'urihe ijá 'iva Ja kú'o Jesuni ihijaho pa'urahi'i ea naja'avara 'i'i kaivo irechamiara.

⁴¹Pu kanisoru puni una'i are'i kaivo arihe temaraji'i va'ajihuni maijaho pu Jesuni ihijihuna'e ea pu sise'i 'ahie 'ee juha apeja jihuna'e avajara.

⁴²'Ejumakame pu veku veko Temiporu vaja 'ee sea sea ijino Jesuho Kerisona 'iavi'i najahe 'ee 'warame apene ojara.