Read Managalasi Akisi 6 Bible Online

Akisi 6 - Managalasi bible

Akisi 6

¹Ijiha kajaho tisaiporua mapoka rena ajima va'eme Kuriki Jua 'ee Hipuru Jua chicharavara. Ijihuni maijaho puni amuniji na veku veku 'iruma swara vejujaho vene asitahu jihuna'e avajara.

²'Ejume ea iropu ropu no'o ijipo 'umenaume tisaiporu 'aho'a roume ijá 'iava Nú Godoni ira pa'wara'ika'i hine 'iruma vajihi'i hihuna areria pare'ena.

³'Enakúne vwehu núne joni vaja kajino ea iropu no'o ea ka'ene Godoni 'Aveni ruha apena paraji'ina 'ee iha mamaa 'ee hami hami vwihaji'inijino pijihakame ijipo ike kaukara ikaho 'ajo'avara.

⁴'Ejakame nú onúno na'ia mapoka siporua 'o'one Godoni vu'a 'warahunakúne 'iavara.

⁵'Ejume ea mapoka ijí vu'a kajaho ura renana. 'Ejumakame pu Sitivini iji pijahara. Hu nimaa rona paraji'ine 'ee Godoni 'Aveni huni oja vaja rarena paraji'ina'e pijahara. Ea pina Piripune 'ee Pokorasine 'ee Nikenorine 'ee Timonine 'ee Paramenasine 'ee Nikorasina. Nikorasiho Enitioki ora kaivo hu va Jua renarena'omo Godoni ea rene ijí Jua pu'úmo hinana.

⁶Ea kija aherama roe apasoru puni una'i irechamiume pu ea kajihipuni siporua 'one 'ee ija húmata 'ahi irechamiara.

⁷'Enajihuna'e Godoni ira rausaha apene kwaa ara mapoka va'ana. 'Ejume pirisitia mapoka 'u'o nimaa rojara. 'Ene ea ka'ene Jerusaremi hijujija nimaa nimaa roji'ina mapoka mapoka rejara. Sitivini Kamovajina

⁸Sitiviniho maiji vwihanii'ina rarena parane 'ee harura rarena parana jihuna'e Hu aacha ani ani'ina vene 'ee uneunecha ka'ene ea areri pavehunijija epuni vaji vejume rejara.

⁹Ea 'aho'a Sinakoku Ka'ene Ripotini 'wavura'omo pu Sairini ora 'ee Arekisanituria ora 'ee Sirisia ora 'ee Esia rene roajipo 'urine Sitivini pu'úmo nakaravara.

¹⁰Godoni 'Aveni vejume Sitiviniho 'waramana. 'Ejume huni vwiha mamaa ka'ene hura oja 'aveniji'i 'waramajaho pu areri rarena 'warahuna areri parejara.

¹¹'Ejume pu ea 'aho'a 'imenae 'waravume pu ijá 'iava Nú he'eju'e hu hine Mosisi'o Godi'o matihana 'iavara.

¹²'Ejumakame pu eaka ijihipuni oja ijumakame ea mama'ina 'ee Sikuraipia ijipo roe hu 'unama tairia apene kanisoru puni una'i va'ara.

¹³Ea 'aho'a vu'a ira'ata 'wara'avarono irechamiume va'e ijá 'iava Ea ikaho Mosisi oni tamane'o 'ee ruha akuavi'inikaho na'ia mapoka mapoka hine matihuna.

¹⁴'Enare'e nú heju'e hu ijá 'waramuna Jesu ka'ene Nasareti orijara ijí arakaho tirakune 'ee Mosisi oni tamana ka'ene hu nú vajúhajaho 'eka arohe ani 'waramu 'iamuna 'wavara.

¹⁵Kanisoru ka'ene hija kajipo kavume huni ura niijaho areri ona'oji'ina puni urania kivuja renana.