Read Managalasi Akisi 7 Bible Online

Akisi 7 - Managalasi bible

Akisi 7

¹'Ejume ea ka'ene pirisiti natohwijara ijá 'wama 'Ú ikaho nimaae? 'wamana.

²'Ejume hu ijá 'iama Heha! Vwehu nuna 'ee emahu nunakije ja nuni irake hami heha. Nitama Eparahami ka'ene núni omijaho mai'o Herani pava'ika'i Mesopotemia hinajiri Godi ka'ene hanaji'inijaho huni roana.

³Hu ijá 'wamaOni amuhija irechamie 'ee oni kwaa are'i kaivo 'urine va'e kwaa ka'ene Nara naja'ujino hi'amana 'wamana.

⁴'Ejume hu Karutia opuni kwaa are'i kaivo va'e Herani hinana. 'E'eme Eparahami oni oma kwavumakavi'i Godira hu vejume 'urina roe iviamaa kwaake nú hijukino hinana.

⁵'Enakaivo Hu mwe'a pina niho'o humaa pamahana. 'Enakaivo hu mají apehuna pana. 'Enakaivo Godi túna'i humaa mahuna nahama 'waramana. 'Ena'omo Hu huni amuhi jihipuni rehuna kaivo Eparahamiho mai'o amuja pavenana.

⁶'Ene Godi ika'ina 'waramana. Juara mapoka mapoka (400) vaja kajino oni amuhijijija ea 'ahopuni pwea rene 'ee sisei hihuna.

⁷'Enakaivo túna'i ara irahipuni pwea ja re'avajaho Na 'otua vetihuna. 'Enakaivo mai'o túna'i pu kú'o 'unama roe kwaa ikino hine Na oja mihe Nuni kaukara vehuna 'wamana.

⁸Godira hu sisa 'uhuahuna maka nahana. 'Ena'omo Eparahami Aisiki oni oma renana. 'Ene hu na'ia iropu no'opisu pa'are'eme hu huni sisa 'uhuahana. 'Ejume Aisikiho Jekapi oni oma renana. 'Ene Jekapi ea mama'ina iropu ropu no'o puni oma renana.

⁹Amuhu núna ea mama'ina kajipo Josapi sise'i 'ahae apena va'e ea 'aho'a 'imenaara. 'Ejume pu apene Ijipiti va'ara kaivo Godi hu hu'úmo hinana.

¹⁰Hu sisei hinajaho Godira ni'ajahana. 'Ejume Godira vejume Josapi vwiha maa vwihaji'ina rejume Perora Josapi ura renajihuna'e Ijipiti opuni 'ajohi'ina re'amarono Pero iji pijahana. 'Enareje Perora oni sei uneunecha mapoka ka'ene navuji 'ajohi'ina re'amarono iji pijahana.

¹¹'E'eme Ijipiti kwaa 'ee Kenani kwaa 'oravea renarena 'iruma pa'are ranamana. 'Ejumakame amuhu núna kwaa ka'ene 'iruma 'ekahunijaho niho'o pa'arejumakame sisesei hijara.

¹²'Ejume Jekapi henajaho 'iruma Ijipiti navuma henarena maraku'a omahu núna irechamiume ijí va'ara.

¹³'Ena'omo vukú'o 'aha pini va'ajino Josapi popwaha hu nahama 'waramana. 'Enarena Pero roume 'waravumakame hu Josapi oni vwehija hena kimana.

¹⁴'Ejume Josapi 'ona 'waramana. Huni oma ka'ene Jekapi ona 'waravakame huni kachi'ina mapoka kajaho ijá nianae Ijipiti ro'avarono 'waramana. Pu ijaho ea ni'aha kwino mapoka mapoka (75).

¹⁵'Ena'omo Jekapi Ijipiti va'e hu amuhu núnijihi pu'úmo kwamasahara.

¹⁶'Ejume puni hahijaho 'eka va'e kwaa iha Sekemi irechavara. Ijí muna ara kajaho Sekemi Eparahamira Hemori oni harihijihi puni 'imena apenana.

¹⁷Godira Eparahami nahama 'waramajaho roa tu'u re'eme Isureri ora Ijipiti ea mapoka tuamana.

¹⁸'E'eme kinia pina ka'ene Josapi pahena pakavi'ini Ijipiti opuni kinia renana.

¹⁹Ijí ea kajara núni amuhija pisivi'i rurahana 'ee hu emahu núna sise'i 'ahie 'ee venaume sesahwaha samai kwamasa'avarono irechamiara.

²⁰Ijihuni vea kajiri Mosisiho nahejara. Hu niho'o hariha 'u'ua mamai jihuna'e Godi hu ura renana. 'Ejumakame emahwapo puni seijino nesi hami 'ajo'eme masapa no'opisu pa'arenana.

²¹'Ejumakavi'i pu apena va'e samai ranavajaho Pero oni 'apajijara kama apene va'e huni hariha vena pimana.

²²Hu ijí sikurua vene 'ee Ijipiti opuni henaka'a mapoka kajaho he parane 'ee hura raka ka'ene 'warame venujaho haruriji'i venuna.

²³'E'eme hu juara mapoka mapoka (40) re'i ve'eme hu ehwaha ka'ene Isureri oni harihija ki'i 'ahaume vwihanana.

²⁴'Enarena hu vai'i kimajaho huni ea pina Ijipiti ori vu'a pa'a apene rurahuma kamana. 'Ejumakame hu ijara sevume 'urine hua vahame Ijipiti ora kajaho 'anauma kwamana.

²⁵Godi hu iji pijahume ehwaha kaji ni'aji'i roaji pu he'avarono ea kajaho hu 'anaana kaivo pu niho'o ija'ina pavwihajara.

²⁶'E'ikaivo Mosisi ijihuni sú'uhijino Isureri ora no'ohe'i 'ara'eme hu ijí va'ana. 'Enarena hu va'e are'avarorena rurame ijá 'iama Ja no'o vwe'une'i raka vene 'araho? 'iamana.

²⁷'Enakaivo ea no'o 'araha kajipo ea kwinu Mosisi vajama pi'ona'ika'i ijá 'wama Irara a venaume a roe nú 'ajohue 'ee namui roane?

²⁸A niari Ijipiti ora 'anaaja'ina'e na 'ani'iro avano? 'wamana.

²⁹'Ejume Mosisi ijí hene Ijipiti opuni kwaa are'i kaivo aseha va'e Miriani opuni kwai hinana. 'Enarena hu ijí hi'eme harihwaha no'ohe'i rejara.

³⁰Hu ijí hi'eme juara mapoka mapoka (40) pa'are'eme Godoni ona'oji'ina huni roe huri'a Sainai nechi'i icha oma rukina veni re'eju'e hu ijihuni vaji naminana.

³¹'Ejume Mosisi ijí kamarena Vi ijaho rakina? ronarena niho'o ni'ima'ura oja hwa'usahana. 'Enarena hu ura va'e nini ka'i 'ahaume va'eme Natohwi jihuni ira roana. Hu ijá 'wama

³²Na oni opijijihi puni Godia. Na Eparahami oni Godi 'ee Aisiki oni Godi 'ee Jekapi oni Godia 'wamana. 'Ejume Mosisiho simame 'ee tea juvume ijaho nia pakamana.

³³'Ejume Natohwijara hu ijá 'wama Oni mumora hwana jahena. Ijihuni maijaho ara ruha ka'ene naminujaho akuavuri mwe'a sisa 'ahi naminu.

³⁴Pu Nuni ehija ka'ene Ijipiti opo sise'i 'ahiajaho Na nikivuta. Pu niramaruvaji 'u'o Na nihejuta. 'Enarejo ijihuna'e Na pu ni'aji'i routa. 'Enakúne a roe Na ranamae Ijipiti va'a 'wamana.

³⁵Ike Mosisiho pura hu pata'arohe ijá 'wava Ea irara 'waravume a roe nú 'ajohue 'ee namui roane 'wavajina. 'Ena'omo Godira hu kú'o ranavume va'e Isureri ora 'eke 'ajo'amarono Huni 'ona oji'ina ka'ene nechi'i icha vaji Godira vejume vena rejumakavi'i ranavume ijihuni vaji naminajara ni'ajahana.

³⁶'Ejume ea ikara Ijipiti va'e vejume aacha ani ani 'ee ea areri pavejujija veji'i Isureri ora aherama va'e soha ka'ene iha Avi'ina 'wavujaho vejume 'unama re'eme pu va'e juara mapoka mapoka (40) nechi'a kaji hina ojara.

³⁷Ike Mosisi ikara Isureri oni harihija ijá 'iama Godira poropetia naa'ina joni vwehipuni vaji veje rene roajihuna.

³⁸'Ejume ike ea ikara ea mapoka pu pu'úmo nechi'i ahuma hi'eme huri'a Sainai 'ona oji'ini vu'a 'waramana 'ee hu emahu nú pu'úmo hine 'ee hu vu'a ka'ene majama hihuna ja vajihuna'e vajahana.

³⁹'Enakaivo núni amuhijihija pu Huni vu'a pahe'i kaivo pu Hu vajama pi'onavara. Pu Ijipiti oja vwihanareja pu ura Ijipiti 'unama va'i 'ahiara.

⁴⁰'E'ikaivo pu Eroni ijá 'wava Núni godi 'aho'a vejakame pura uranúhe aheruma va'a. Mosisi nú aheruma Ijipiti arema roara kaivo hu iraki renajaho nú puruva renúu 'wavara.

⁴¹Ijihuni vea kajino pu unenu'u pina apene purumakau 'u'ua puna'i vene swasa 'eke ijí godi ira'ata kajihuni roara. 'Ene pura puni iji veja kaji kimareja niho'o mari'uvara.

⁴²'Ejumakame Godi pu túchahie pataarora'i ija irechamiume pu china masapa vea ijihi oja mihara. 'Ejumakame areri poropetiepo heha vaji vena 'warava ja'ina'e renana.'Ú Isureri ora ja juara mapoka mapoka (40) nechi'i hinojajino swasa ka'ene vejajaho núna'e vejare?

⁴³Pana kaivo ja Moraki opuni harai ara vene china ka'ene Romapa joni godi rene unenu'u 'aho'a 'eke veju'e unenu'u 'aho'a puna'i reju'ukivi'i nuana vetie ijihipuni swasa vejujihuna'e Na ja irechamie ja Papirani asima hana'i vahuna 'iamana.

⁴⁴'Ena'omo emahu núpo harai ara ka'ene nechi'i vejajaho ea najahareje Godira ijihuni vaji vu'a 'waramuna. Areri Hura Mosisi naharena ve'amarono 'wamaja'ina'e venana.

⁴⁵'Ene emahu núpuni vea rejume pu Josua pu'úmo apene ro'eme Godira ara 'ahosura kajija emahu núpuni una'i ato'arumaume use'eme ijí nama apene rou va'o roe Teviti oni vei usevara.

⁴⁶Godi Teviti kamare'e teamama paranuna. 'Ena'omo Tevitira Jekapi oni Godi ijihuni harai ara ve'irono Godi apomana.

⁴⁷'Enakaivo Saramanira arijaho venana.

⁴⁸'Enakaivo Natohwa ka'ene ichuto maijaho emaapo ara ka'ene iji vejujaho pahinuna. Areri poropetijara 'waramajina.

⁴⁹Akúpa 'ahijaho Nuni asuma hijuri ruhijina kaivo mwe'ijaho Nuni mumora ranavuri ruhijina. 'Ena'omo ja ara ichá'ina Nuna veni'eja? Natohwijara ijá 'iama Nuni ruha ka'ene Nara 'ojuta hwehunijaho ichine?

⁵⁰Nuni ija uneunecha kihija maho'o pavejuta raka? 'wamana.

⁵¹Ja niho'o vu'ataa paheji'ina 'ee joni oja kisima'uri jihuna'e ja niho'o pahena paraju. Emahu jopo Godoni 'Avena pataaroha ja'ina'e ja 'u'o pataarohu.

⁵²Poropetia ea irahija'e emahu jona sisei pa'ahiare? 'Ejume pu Ea ka'ene arimaijara rohuniji 'waravajija 'aniume kwamasahara. Ja Ea kaji nahamahe 'anaume kwamajihina.

⁵³Ja ea ka'ene tamana 'ekujihi Hu Huni 'ona oji'ina'e vajihu'e 'eka roura kaivo ja panimaa rone 'ee vejura 'iamana. Sitivini Muni 'Ona Hijahajina

⁵⁴'Ejume pu ijí henareja Sitivini ajinama oja 'uhusamia para'ejume upaja ja'iujume chanichani vaja'eme kavara.

⁵⁵'Enakaivo Sitiviniho oja vaja Godoni 'Aveni ruha apena parajumakame akúpa 'ahi nia nirinama kavume Godoni hanaji'ina kame 'ee Jesuho Godoni mana'inija'i naminana.

⁵⁶'Ejume hu ijá 'iama Kaha! Na ka'eju'e akúpa 'aha vwicha jara'eju'e Emaa Puni Hariha Godoni mana'inija'i naminu 'iamana.

⁵⁷'Enajihuna'e pu ira ajira ananaja'ika'i ataa pijuturame ni'aha kwinu 'urimaravajino ninukujaha va'e pu hu ija ija 'unavara.

⁵⁸Pu hu 'unama piijahe apene samai va'areje muni 'eke 'ana'eme kivasa kwinu ijí puni rori nami'eme pu puni ateha jahene huni una kaji irechavara. Ea kajihuni ihijaho Soruna.

⁵⁹Sitivini muni 'anaumakivi'i hu Natohwiji 'urahe ijá 'umena Natohwa Jesu nuni 'avena ape'amana 'wamana.

⁶⁰'E'ikaivo hu aruha arihi'i ira ajira ijá 'umenane Natohwe pu na sise'i 'ahiukúne A pu eha pavetia 'ume'i kaivo kwamana.