Read Managalasi Akisi 8 Bible Online

Akisi 8 - Managalasi bible

Akisi 8

¹'Ejume hu 'anaume kwamajaho Soru oja vaja teamama paranana. Ijí vea kajaho sosia ka'ene Jerusaremi hijujaho ruarahume sisei hijara. 'Ejume pu 'oi'oi ea 'aho'a Jutia vaji va'ume 'ee ea 'aho'a Sameria va'eme apasoru eru irechamiara. Sorura Sosi 'Ania Ruarahajina

²'E'eme ea ka'ene Godi oja mahi'inapo Sitivini oni haha apena va'e ranavara. 'Enareja pu niho'o huamu vene niramaruvara.

³'E'eme Soruho aneja vene sosi ruarahiana. 'Ene sea sea kaji ajime napara parui irisame 'eka va'e tipurai irechamiana. Vu'a Maa Maiu'ina Sameria Vaji 'Waramajina

⁴'E'eme ea ka'ene ani ani va'a kajija hine Godoni vu'a ea najahara.

⁵'E'eme Piripuho Sameria va'e aneja vene Keriso rone najahana.

⁶Ea mapoka ka'ene ijí Piripu ipu'úmo hija kajija pu oja 'ee vwiha kwisu rene hura 'warama kaji hene aacha 'ee uneunecha ka'ene hura vejume ani ani reja kaji pu kivara.

⁷Ea 'avena sisea 'ajima'ina mapoka ijí hijara'omo Hura venaume ijí 'avena sisea kajipo niho'o ajira emaavara'i kaivo ariha va'ara. Ea 'aho'a irima'ina 'ee haha ajuarani'ina vejume marasahara.

⁸'E'eme kwaa kajaho niho'o ni'ima'ura'e temarasahara.

⁹Ea pina huni iha Saimanina'omo hu nimako atama veji'ina ea ni'ina iavi'i ara kajino hiju'e Sameria ora oja hwa'usahura.

¹⁰'Ejume pu maho'o sesamai rene va'e emakini hu ta'arohe ijá 'wavure Hu Godoni harura ni'ima'ura 'wavura.

¹¹Hu nitama rene atama ani ani veju'e pu kavujihuna'e pu hami huni vu'a hejura.

¹²'Enakaivo vea ka'ene Piripura Godoni vu'a maiu'ina ka'ene Godoni arijihuna 'ee Jesu Keriso oni ihiji rone 'waramajaho pu nimaa rojara. 'Ejume hu parui napari ahuma toi samahara.

¹³'Ejume Saimani 'u'o nimaa ronajihuna'e hu toa apúsavume Piripui ahuma 'uraha oji'i hura aacha 'ee uneunecha ka'ene ea areri pavehuna mama'ina venaji kimarena oja hwa'usahana.

¹⁴Apasoru ka'ene Jerusaremi hijajipo hejajaho ea mapoka ka'ene Sameria hijajija Godoni ira hene apejuma henareja pu Pita'o Joni'o irechamiume va'ara.

¹⁵'Enareja pu no'o va'e ijí ea ka'ene Godoni ira hene nimaa roja kajipo Godoni 'Avena ape'avarono pu puni siporua 'ojara.

¹⁶Hu mai'o puni vaja ruha paapenana kaivo pu Natohwa Jesuni iha 'ahijino toaru samaara.

¹⁷'Enajihuna'e pu aneja vene puni ija ea kajihipuni húmata 'ahi irechamiume Godoni 'Avena apejara.

¹⁸Saimani hina ki'eme apasoru kajipo ija irechami'eme Godoni 'Avena ea samahuma kimarena hu monia 'eka roe 'ime'i 'iamana.

¹⁹'E'ikaivo ijá 'iama Harura kaji na 'u'o miha 'e'irakúne na ea irahija'e ija irechamiujaho pu Godoni 'Avena ape'avara 'iamana.

²⁰'Ejume Pitara hu ijá 'wama Oni monia kaji'i kwa'ena. Ijihuni maijaho a vwihanajaho Godoni swarijaho moni 'imejura ronuna.

²¹A ikehuni pwina pana. Ijihuni maijaho oni oja mai'o Godoni una'a arira pana.

²²'Enakúne oni sisea ka'ene oni oja vaji namujaho vwihane aremamaa are'i kaivo ta'arohe Natohwi jihuni siporua 'ojakame Hura vwihanae are'amana.

²³Na kavu'e oni oja vaja kama'ajaho niho'o sisea namuna'omo ijara a kamoramu 'wamana.

²⁴'Ejume Saimanira eha vene ijá 'iama Ijinakúne ja Natohwi jihuna'i nuni siporua 'oniha! 'Ejakame uneunecha ka'ene jara 'warivu kajaho niho'o pina nuni haha 'aha pareni'ama 'iamana.

²⁵Pu no'o Natohwi jihuni vu'a 'waravume pa'arejume pu kú'o 'unama Jerusaremi va'iro vai'i Sameria opuni araka mapoka kajino Godoni vu'a kajaho najaha apene va'ara. Piripu Ka'i Itiopia Orijihipuni Vu'a

²⁶'E'eme Natohwi jihuni 'ona oji'inijara Piripu ijá 'wama 'Urine iki kami nechunama ka'ene va'e Jerusaremi 'useme va'u kajino ariha Kasa va'amana 'wamana.

²⁷'Ejume Piripuho 'urine va'u va'ume 'unamutoi Uniki pina Itiopia ora piunamana. Ea kajaho Kanitasi ka'ene Itiopia opuni kwinijihuni moni 'ajohi'ina'omo hu Jerusaremi Godi oja ma'irono roana.

²⁸'Ena'omo hu kú'o huni ari va'irono huni chariati vaji asuma hiji'i poropeti Aisea oni puka tahana.

²⁹'E'eme Godoni 'Aveni Piripuho ijá 'wama Va'e chariati 'aha kajino hu hu'úmo ahuma hina 'wamana.

³⁰'Ejume Piripu ninuma ajima va'i hejume hu poropetia Aisea hine tahume hu ijá 'wama 'Ú a raka ka'ene tahu kajihuni maijaho a niheno? 'wamana.

³¹'Ejume hu ijá 'wama Na ichá'ina he'ejo? Ea 'ahopo najihara'omo na ijihuni maa he'ejo? 'wa'i kaivo Piripuho 'waravume ajima va'e hu hu'úmo asuma hinana.

³²Ijí puka vaja kajino hura Godoni ira ka'ene tahajaho ikena.Hu sipia 'ani'irono 'eka va'uja'ina'e ahema va'ara 'ee areri sipia 'u'ua sapasa usimahi'ini jihuni una'i ira pa'arene naminu ja'ina'e Hu ira pa'waramana.

³³Hu juha natohwa'e apenana. Ijihuni maijaho pu Huni 'otua hamia pahejara. 'Enajihuna'e Huni ei pini hene huni vu'a kaji 'warahuna pa'ana. Hu ikino mwe'i hinujaho pu ni'anaume kwama va'ume pa'arenana vejara'e tahana.

³⁴'Enarena ijí Unikia kajara Piripu eha vene ijá 'wama Poropetia kajaho hu huna'e rone 'waramana 'aho ea pina rone 'waramane? 'wamana.

³⁵'Ejume Piripuho Godoni vu'aka taha kaji aneja veji'i Jesu rona 'waramana.

³⁶'Enareja pu 'unamutoi va'ari vaja kajino roe toa rori usevi'i Unikia kajara ijá 'wama Kama! Toa karena kaivo rakijara tanu'urihu'e na toa paapúsami'ena? 'wamana.

³⁷'Ejume Piripu ijá 'wama A oni ojiji'i nimaa rona para'amajaho a arerina. 'Ejume hu eha vene ijá 'wama Na nimaa roju. Jesu Kerisoho Godi Oni Hariha 'wamana.

³⁸Ea kajara 'waravume chariati nami'eme pu no'o Piripui ariha va'ume ea kajaho toi 'unamape apúsamana.

³⁹'Enareja pu kamino toa vaji rene ajiru use'eme Natohwi jihuni 'Avenijara Piripuho apene va'ana. 'Ejume Uniki kajaho kú'o Piripuho pakamana. 'Enarena hu temaraji'i huni 'unama va'ana.

⁴⁰'E'eme Piripuho ori'ini kakaramajaho hu Asotasi naminana. 'Enarena hu araka mapoka kajino Godoni vu'a najaha apene onu va'ume iji'a Sesaria roana.