Read Managalasi Romani 15 Bible Online

Romani 15 - Managalasi bible

Romani 15

¹Nú ea ka'ene haruriji'i hijujipo ea ka'ene ajuasinijija ni'ajihuna kaivo nú núni haharu pavwihahuna.

²Roe nú ja pu'úmo ea ka'ene núni rori hijujija veje teamanamava 'ee pu maranihuni jihuna'e ni'ajihe pu Godoni ira ija kisi apene puni una'i saname ve'avara.

³Ijihuna'e Kerisoho Hu ori'ina'e teamahuni ja'ina pavenuna vo Godoni ira vaji vene ika'ina 'warumana Ea ka'ene ira sisea a 'waravajaho Na 'warima avajara 'úmana.

⁴Uneunecha kija nitama vejajihuni maijaho nú najuhakame nú masuani matauma hi'avari vajijino Godoni irijara ni'ajúhe núra nimaa rojujaho ija kisi 'unahuna.

⁵Godi ka'ene matauvi'inaka ni'ajúhi'inijara venae ja vwiha kwinu'wi rene Jesu Kerisora ura renuja'ina'e vehuna.

⁶'Enajihuna'e ja ea mapokakija vwiha 'ee ira ni'aha kwinu Godi Amo ka'ene Jesu Keriso núni Natohwi jihuni Omiji ta'aro'avara. Jenitaru Puni Vu'a Maiu'ina

⁷Ijihuni hahi ea 'aho'a hami 'eka'avara areri Kerisora nú 'u'o 'ekua ja'ina'e 'eka'e Godoni pinana 'uri'amana.

⁸Ijihuna'e na ja 'waravu. Kerisoho roe ea ka'ene sisa 'uhuahajihi puni pwea re'i roana. Nitama Godira nahame Jua puni emahwaha 'wamajarahara nimaa re'amarono roana.

⁹'Enajihuna'e Jenitarua Godira pu numirama jihuna'e pu Hu 'u'o ta'arohuna. Godoni ira ika'ina 'warumanaIjihuna'e na A Jenitaru puni javaa vaji Oni iha 'urahe venahuna 'úmana.

¹⁰Godoni ira vaji pini 'u'o ika'ina 'warumanaJenitaru kihije Huni ehijajihi pu'úmo temarasaha 'úmana.

¹¹Godoni ira vaji pini 'u'o ika'ina 'warumanaJenitaru maho'o Natohwiji ta'aroha 'ee veje ea maho'o Hua ta'aroha 'úmana.

¹²Godoni ira vaji Aiseara ika'ina 'warumanaJesi oni amujijara Jenitaru puni Natohwa rejakame pu Hu nimaa rohuna 'úmana.

¹³Jara Godia ka'ene nimaa rojujara temara 'ee matauvi'ini samahakame jara nimaa rojajaho Godoni 'Aveni jihuni harura vajijino itusahe ameurahe ariha. Porura Paju'i Kaivo Asura Venajihuni Maijina

¹⁴'Ejume vwehu nune na nimaa vejujaho ja 'u'o mamaijara itu'ona'e 'ee henaka'i maho'o ituona'e parajara 'ee ja areri ea 'aho'a pu'úmo ni'aja'arahuna.

¹⁵'Enakaivo vu'a mama'ina 'aho'a pasia vajakino na paju'ika'i vejuta. Ja Godoni maiji vwihanúana ka'ene Godira na mihaji ja runami'amarono kú'o 'waravuta.

¹⁶Na Jesu Keriso oni vu'a Jenitaru najahu. Na Godoni vu'a maiu'iniji najahi'ina'omo na Jenitaru puni swasa Godira pu kime teama'amarono veju. Ijihuni maijaho Godoni 'Avenijara Hunijihuna'e venaume ariramaa rejara.

¹⁷'Enajihuna'e na Jesu Keriso oni vaji Godoni kaukara ka'ene vejujihuna'e na temaraji'i hiju.

¹⁸Na vu'a 'aho'a pa'warahuna kaivo Kerisora nuni vaji vejume Jenitaru raka ka'ene nara 'warame vejujara venaume hene nimaa rojajiru 'warahuna.

¹⁹Godoni 'Aveni jihuni harura vajijino aacha ani ani ea areri pavehunijija vejuta. 'Enajihuna'e Jerusaremi rena va'e Iririkami na Keriso oni vu'a maa maiu'ina maho'o najahuta.

²⁰Nuni ura ka'ene natohwijaho na kwaa ka'ene Keriso oni ira panajahi'inijino najahuna. Ijihuni maijaho na ura ea 'ahopo ni aneja vejajihuni 'ahi vehuna senimu.

²¹'Enakaivo Godoni ira vaji ika'ina 'warumanaEa ka'ene Huni vu'a mai'o pa'waravume pahena pakavajija niho'o hena kahuna. 'Ene ea ka'ene pahejajija hehuna 'úmana. Na ijí hejujaho 'unama kajaho vejura. Porura Romu Vahuna Vwihanajina

²²'Enajihuna'e na marako paroe ja kivujihuni maijaho na ea ka'ene Godoni vu'a mai pahena pakavi'inijihi najahe ojura.

²³'Enakaivo ikiano nuni kaukara ijaho niparanana. 'Ena'omo juara mapoka na ja kihuna'e ura rena paranuna.

²⁴Na Sipeni va'iro vu'ujino vu'e ja kihuna. 'Enareje ijiano ma'uaku'wi ja pu'úmo hami hinareja'e iji'a ja na ni'ajihe na vahuna.

²⁵'Enakaivo na iviamaja Jerusaremi va'e Godoni ea 'aho'a ka'ene ijí hijujihi naja'irono va'u.

²⁶Godoni ehija 'aho'a ka'ene Masatonia hine 'ee Akea hijujipo teamanavumakame Godoni ea 'aho'a ka'ene Jerusaremi hami pahijujihi puna'e swara nianae irechamihaji na 'eka va'e vajihe ijí monia kajara pu ni'ajihuna.

²⁷Pu niho'o teamanavume vajihara. Ijihuni maijaho pu puni chimua 'ejara. 'Ejume pu Jenitarua 'Avena huni 'unamijino ni'ajiha jihuna'e vu Jenitarua puni chimua 'ene haha huni kukuijino vajihara.

²⁸Na monia kakaho 'eka va'e ijí vajihe pura rakaka na 'warivajaho venareje ijí Sipeni va'iro vu'areje ja kihuna.

²⁹'Ene na nimaa rojujaho vea ka'ene nara routi veijaho Keriso oni merajihi'inaka itu'o'uji'iniji apene joni vuhuna.

³⁰Vwehu nune na nimai ja jariravu. Nuni Natohwa ka'ene Jesu Kerisoho 'ee 'Avena ka'ene oja 'ekaravuri vajijino na hu'úmo joni siporua vaji namine Godoni siporua 'oni'avara.

³¹Siporua 'onihakame ea ka'ene panimaa roji'ina ka'ene Jutia hijujija nununa'a unenu'u pina pave'avara. Nara kaukara ka'ene Jerusaremi ve'i va'ukaho Godoni ehija hami apeni'avara.

³²'Ene siporua 'ojakame Godira na iji pijihajaho na teamanima para'eje na roe ja kiuta. 'Enareje na ja ni'ajiuta.

³³'Ena'omo Godi ka'ene matauvi'inijara ja ea maho'o merajiha. Ameni.