Read Managalasi Romani 9 Bible Online

Romani 9 - Managalasi bible

Romani 9

¹Na Keriso oni vaji nimaa'e 'waravu. Na ira'ata paapeju kaivo nuni vwiha ijaho Godoni 'Avenijara nimaa ve'eju'e 'waravu.

²Na nuni ehija ka'ene Jua 'wavujihi vwihaniujaho nuni ojijaho hianime 'ee niho'o ni'ima'ura temukivura.

³Nara iviamaa tinia ka'ene Keriso oni ea rene hijuji rana'ika'i kwahuni tinijino ruva'ujara veje vwehu nuna 'ee ehu nuna Keriso nimaa rohuna'e re'ipisa na ija'ina'e veju'u.

⁴Pu Isureri ora Huni harihija'e re'avarono iji pijihana. Hu Huni mamaa pu najahe Hu pu pu'úmo 'wame nimaa veti'aravara. Hu Huni varapa mihu'e pu Hu Temiporu vaji oja mahe ta'arohura. 'Ene Hura nahama 'waramajija 'ekara.

⁵Puni amuhi puni vaji Kerisoho rene roe haha apenana. Hu uneunecha mapoka kihipuni Húmata 'ee Hu Godi. 'Enajihuna'e majama Hu ta'arohuna. Ameni.

⁶Godoni ira vaji Isureri ora nahama 'waramajija parejura sa'ina. Ea ka'ene Isureri vaji nahenajija maho'o Isureri ora pana.

⁷Ijí 'unama nikwinu'ina kajino Eparahami oni amuhijijijahija maho'o Eparahami oni harihija pana. 'Enakaivo Aisiki oni vajijino oni amuhija rehuna 'wamana.

⁸Ijihuni maijaho ea ka'ene hahijihuni 'unamijino nahenajija Godoni harihija pana kaivo ea ka'ene nahama 'waramajihipo amuhija nimaa nimaa Huna.

⁹Ikaho vu'a ka'ene nahama 'waravajina.Ike vea ikino na kú'o roujino Seraho hariha nahehuna 'úmana.

¹⁰Ikeru pana kaivo Repeka 'u'o Aisiki ka'ene nuni omijihuni hariha hwaharisina 'ekana.

¹¹Ijí hwaharisina kajija mai'o panahena'e 'ee sisea maa mai'o paveji'ina. 'Enakaivo Godiho Huni urijino ea irá Hu ura renujihi iji pijihuna kaivo ea kajipo siseaho mamaa'e vejakame iji pijihuna niho'o pana.

¹²Ijihuni hahi Hu ika'ina'e 'waravaraAmurijaho 'u'uijihuni pwea rehuna 'wavara.

¹³Areri Godoni ira vaji vene 'warama ja'ina'eJekapiho na oja mahu kaivo Isoho na senimu 'wamana.

¹⁴Ijí Godira ija'ina ka'ene venajaho Hu sisea vena avanana raka? Niho'o pana.

¹⁵Ijihuna'e Hu Mosisi ija'ina 'waramana. Na ura ea irá numi'i ve'ujaho Na numihuna 'ee Na ea irahuna'i temuka ape'i 'ahiujaho Na temuka apejura 'wamana.

¹⁶Godira ea 'aho'a'e numiramu jihuni maijaho ea 'ahopo harura vene 'ee ura renakame numirahuna pana kaivo Godira Huni ura ijino pu numirame vajihuna.

¹⁷'Enajihuna'e Godoni ira vaji Pero rona ijá 'wamaIkehuni hahi Na venaume a 'urinana. Ijihuni maijaho Nuni haruriji oni vaji ea'e najahakame Nuni ihijaho mwe'akino maho'o 'wamape ohuna 'wamana.

¹⁸'Enajihuna'e Hu ea irá ura renuji numimuna 'ee Hu Huni ura ijino ea irá huni oja veje kisina'e rehuna'e ura renuja'ina'e venu. Godoni Sena 'Ee Numirumujina

¹⁹Ja ike he'avajaho ja ika 'wihuna Hu irakijihuna'e nú namuho? 'Ene ea irara Huni urijaho tanu'ena? 'wihuna.

²⁰Aae! Emaa! A ea irana'omo Godi eha vetio? Uneka ka'ene vejajara ea ka'ene hua venajaho paapome ijá 'wa'ena A iraka vene ika'ina veniane 'wa'ena?

²¹'Ú ea ka'ene si'uara veji'inijaho huni harura namujihuna'e anata nikwisu'ina kajino si'uara pina vea mama'ina'e re'eje nihehuna'e vene 'ee pina ma vea mamahakino nihehuna'e venune?

²²'Enajihuna'e Godiho Huni harura 'ee 'otua vetihuniji ea najahuna'e ura re'amajaho ijaho Huni ura. 'Ene Hu ura ea ka'ene 'otua vetie 'ee veje pa'arehunijihi masuani makivi'i 'ajiha hihuna'e ura re'amajaho Huni ura.

²³Hu ika'ina'e venajihuni maijaho Huni pinana mamaijija si'ura ka'ene numirame nimarako pinana 'uri'amarono amairiarama jihipuni vaji najahuna.

²⁴Hu Juaru pana kaivo Jenitaru puni vajakino nú 'u'o iji pijúhajina.

²⁵Hu Hosea oni vaji 'warama ja'ina'eNara ea ka'ene maraku'a Nuni ea pana 'iavujija Nuni ehija 'iahuna. 'Ene ea ka'ene maraku'a Na oja pamihujija oja mihuna.

²⁶'Ene roe ika'ina'e rehuna. Ijí kwaa ka'ene Nuni ehija pana 'iavu kajino pu Godi ka'ene majama hiji'ini jihuni harihija 'wahuna.

²⁷Aisea Isureri ora rona ijá 'iamaIsureri ora kakihipuni harihija ea mapoka mapoka ajara sa'ina rehuna kaivo ea kwinu kwinu Godoni ea nimaa nimaa rehuna.

²⁸Godiho nimarako roareje mwe'a kakino eaka mapoka ka'ene hijujaho ni'aha kwinu ijá 'eke 'otua arimaa'e vehuna 'iamana.

²⁹Areri Aiseara 'warama ja'ina'eGodi ka'ene ni'ima'urijara nú ea 'aho'a pairechamú'ipisa nú areri Satami'o Kamora'o rejaja'ina'e reja'a 'úmana. Isureri Ora 'Ee Vu'a Maiu'inijina

³⁰'Ena'omo nú ike uneunecha mapoka ka'ene núra hejajija nú ichá'ina 'wa'eja? Jenitaru ka'ene maraku'a arimaa pasavi'inijija pu nimaa rojajihuna'e arimaa rejara.

³¹'Enakaivo Isureri ora ka'ene tamana 'ararihae arimaa'e re'irono 'ararihaajija arimaa parejara.

³²Irakijihuna'e pu parejare? Ijihuni maijaho pu panimaa rojara kaivo varapiji ve'avajara reje ariramaa re'eja rojara. 'Enakaivo muna ka'ene veju'e emaa arihu jihuni 'ahi amaaresume arihara.

³³Areri Godoni ira vaji vejaja'ina'eHeha! Nara Saioni muna ka'ene emaapo pitachinamie arihe 'ee muna ka'ene emaapo ijihuni toi pijau'ika'i arihunijaho ranavuta. 'Enakaivo ea irara Hu nimaa ronujaho hu oja pahiahuna 'iamana.