Read Managalasi 1 Koritia 12 Bible Online

1 Koritia 12 - Managalasi bible

1 Koritia 12

¹Vwehu nune ja pahene ve'avarono na ivi'a 'Avena huni swariji rone 'wara'i veju.

²Ja ni hena kavu. Vea ka'ene ja Godi pahene 'ee pakavari veijino ja godi ira'ata ka'ene ira pa'ajipo venaume 'unama ani ruva'ara.

³'Enajihuna'e na ura ja ike hehuna'e ura reniu. Ea irara Godoni 'Avenijara 'wara'eju'e 'waramujaho hu mai'o ika'ina pa'waramune Jesuho sirivara pa'iamuna. 'Ene ea irara Godoni 'Avena apenajara huhusu Jesuho Natohwa 'iamuna.

⁴'Ena'omo iviamaa swara ani ani'ina kaivo 'Avena nikwisu'ina.

⁵'Ene kaukara ani ani'ina mapoka kaivo Natohwa nikwinuna.

⁶'Ene 'unama ani ani'ina kaukara venuna kaivo Godi nikwinu'wi kajara uneunecha maho'o ea maho'o puni vaja kaukara venuna.

⁷'Enakaivo sosia ike ni'ajahuni jihuna'e ea 'oi'oi swara vajihana.

⁸Ijihuna'e Hu ea pina 'Avena vajijino vu'a ka'ene vwiha mavarasa'iniji vajahuna. 'Ene vu ea pina vu'a ka'ene henaka ijí 'Avena nikwisu'ina kajara vajahuna.

⁹'Ene ea pina nimaa roiji ijí 'Avena nikwinu'ina kajara mahana 'ee ea pina swara ka'ene ea siporua 'onahe maranihuniji 'Avena nikwinu'ina kajara mahana.

¹⁰'Ene ea pina uneunecha ka'ene ea areri pavehuniji mahuna. 'Ene ea pina poropetia puni iri 'warahuna'e vajahuna. 'Ene ea pina 'avena ichá'inijihi puni ani'inijihi kihuna'e mahuna. 'Ene ea pina ira ani ani'ina 'warahuna'e mahuna. 'Ene ea pina ijí ta'arohuna'e mahuna.

¹¹'Ene 'Avena nikwinuna 'ee nikwinu'ina kajarahara ikihija maho'o venu. 'Ene ijí nikwinu'ina kajara 'oi'oi ea irá Hu ura renujihi vajihuna. Haha Kwinuna Kaivo Pwinana'a Mapoka

¹²Areri haha kwinuna kaivo huni pwinana'a mapoka. 'Ene pwina mapoka kaivo haha kwinuna. 'Ena'omo Kerisoho ija'ina.

¹³'Enajihuna'e 'Avena nikwinu'ina vaja kajino nú maho'o samume 'urine haha nikwinu rejara. 'Ene nú Jua ho Kuriki ho pwea ho matauma oji'ina nú ijí 'Avena nikwinu'ina kaji apejara.

¹⁴Ijihuna'e haha pwinana'a huhusu pana kaivo pwina'a mapoka.

¹⁵'Ene mumorijara ika'ina'e 'wara'ipisa na ija pana'omo na haha ikehuni pwina'a pana. Hu ija'ina'e 'warama jihuna'e hu haha ikehuni pwina pana raka?

¹⁶'Eje ataa kara'ajara na nia pana'omo na niho'o haha pwinana'a pana 'wa'ipisa areri reja'e? Hu ija'ina 'warama jihuna'e haha kehuni pwina'a pana raka?

¹⁷'Ú hahakaho maho'o niaru remara'ipisa ivi'a vu nú ichihichano heja'e? 'Ene hahakaho maho'o ataaru remara'ipisa ivi'a nú vu ichihichano amua heja'e?

¹⁸'Enakaivo iviamaa Godi haha pwina kwinu kwino Hura ura renaja'ina'e haha vaja irechamana.

¹⁹'Ene ijí pwinana'a kajija maho'o nikwinu re'ipisa ivi'a hahijaho ichá'ina'e reja'e?

²⁰'Enakaivo iviamaa haha pwina mapoka kaivo haha kwinuna.

²¹Niijara areri ijijaho ija'ina pa'wamune na a ura pareniu pa'wamuna 'ee kú'o húmatijaho areri mumorijaho ija'ina pa'wamune na a ura pareniu pa'wamuna.

²²'Enakaivo ani'inijaho nimaa'e haha pwinana'a ka'ene kivu'e ajuarasahi'inijija pa'a unenu 'aho'a vehuna areri pana.

²³'Enakaivo núni haha kakihipuni pwina ka'ene puni hura hami pavejujija puni hura vene vu haha pwina 'aho'ijija rinamie nirisavu'e ea niho'o pakivura.

²⁴'Enakaivo núni haha pwinana'ijaho hura pavenahuna. 'Enakaivo Godi haha pwinana'akija 'eka ahumahuna. 'Ene haha pwina ka'ene ijaho pa'ajaho puni hura ni'ima'ura'e venahuna.

²⁵'Ene ike hahakaho paahaame hihuna sa'ina kaivo 'eke haha kehuni pwinana'akija hami ni'ajaravi'i hiha.

²⁶'Ene haha pwinana'i pini haha hiamujaho haha pwinana'a 'aho'a kajaho maho'o haha hiamuna. 'Ene vu haha pwinana'a pinijihuni hura venahujaho haha pwinana'a maho'o ahume temarasahura.

²⁷Ja iviamaa Keriso oni haha'omo ja ea kwinu kwino ijihuni pwinana'a.

²⁸'Ene Godira sosi vaji amura apasorua iji pijihe 'ee ijihuni rorijaho poropetia pijihe 'ee vu ijihuni huna ijaho najahuna'e iji pijihana. 'Enarena iji'a ea ka'ene uneunecha ea areri pavehuniji vehuna iji pijihe 'ee swara huna ea siporua 'onahe maranihunijija pijihe 'ee pina swara ka'ene ea kaukara ani ani'ina vehuniji 'ajoahuna'e iji pijihe 'ee ea ka'ene ira ani ani'ina'e 'warahuniji iji pijihana.

²⁹'Ene ea maho'o kaho apasorua pana raka? 'Ene ea maho'o ikaho poropetia pana raka? 'Ene ea maho'o kaho najahi'ina pana raka? 'Ene ea maho'o kaho uneunecha ka'ene emaa areri pavehuniji veji'ina pana raka?

³⁰'Ú ea maho'o swara ka'ene ea siporua 'onahe maraniujija pa'ekura raka? 'Ene ea maho'o ira ani ani 'waravujija pa'ekura raka? 'Ene 'ú ea maho'o swara ka'ene ira ani ani'ina 'waravuji ta'arohujija pa'ekura raka? 'Enakaivo swara ka'ene mama'inijihi ura rena parani'amana.

³¹'Ene na iviamaa 'unama mavarasa'iniji naja'i veju.