Read Managalasi 1 Koritia 13 Bible Online

1 Koritia 13 - Managalasi bible

1 Koritia 13

¹'Ene na emaapuni ira ani ani'ina 'warame 'ee 'ona oji'ina puni ira 'wara'ika'i ea oja pami'ipisa na areri maa pa'ana'e reju'u 'ee tini ata puna'i 'umene 'ee kurupate puna'i kure kurevu'u.

²'Ene na swara ka'ene poropeti epuni ira 'waravuji apene 'ee hema maho'o hena kiparane henaka'a maho'o heparane 'ee nimairoa ka'ene huri'a 'warave jahena ruvahuna ape'i kaivo ea oja mihujara pa'ana'e re'ipisa na maa pa'ana'e reju'u.

³'Ene na nuni kukua maho'o ea ka'ene pivusahuji vajihe 'ee nuni hahakaho veni aporu'avarono mi'ika'i na niho'o ea oja pamihi'ina'e re'ipisa ijí uneunecha kajija na pani'ajiha'a.

⁴'Ene oja mihuni 'unamijaho masuanu ajuarane hijujine oja mihuni 'unamijaho epuna'i mamaa'e vejujina kaivo paajiname oja sisea vwihajura. 'Ene oja mihuni 'unamijaho pajarika rene 'ee kehi kehi vejura.

⁵Ea oja mihuni 'unamijaho areri parehuni 'unamijaho pavenune 'ee huni ura ijiru pasaramune 'ee hu maraku paajivi'ine 'ee hu sise'i 'ahaujaho ruvu'e pa'arenuna.

⁶'Ene 'unama arira pa'ajaho patemaranuna kaivo nimai jihuna'e temaranuna.

⁷Ea oja mihunijaho mají vena apene va'una 'ee hu uneunecha maho'o mají nimaa vena apene va'una 'ee uneunecha ka'ene iji'a rehunijija nimaa ronuna 'ee uneunecha ani'ina vejuri vajijaho hu niho'o kirane hina apene va'una.

⁸Oja mihuni 'unamijaho maiji nama apene vai'i nahuna. 'Enakaivo swara 'aho'a poropeti epuni ira 'warahuna kaivo ijija pa'arehuna. 'Ene 'aho'a 'ira ani ani 'warahuna kaivo ijija pa'arena vahuna. 'Ene 'aho'a henaka kaivo ijija pa'arehuna.

⁹Ijihuni maijaho nú pwina ma'uaku hena kavara 'ee nú poropetia puni ira pwina ma'uaku 'waravu.

¹⁰'Enakaivo vea ka'ene nimaa nimaijara roujaho nimaa pa'ajaho pa'arena vahuna.

¹¹Vea ka'ene na kasimaa hijuti veijaho kasimaa puni iri 'waravuta 'ee na sesamaa puna'i vwihajute 'ee sesamaa puna'i hene vejuta. 'Enakaivo na vea ka'ene emakina rejujaho kasimaa puni uneunechijija ni irechavume pa'arejara.

¹²Ijihuna'e iviamaa nú mane'a vaja hami pakasaravu. 'Enavo vea ka'ene roe ura varira kakara'avaji'a nú hena kahuna. 'Enareje iviamai ijí pwina kwinu nara hejujaho maho'o he parahuna. Areri Hura na hena kima paranu ja'ina'e hehuna.

¹³'Enakaivo ike 'unama no'opiso ikehipo majama nahuna. Ijija nimairoa 'ee iji'a túna'i rehuniji nimaa rojujine 'ee oja mihi'inijina. 'Enakaivo ikehi puni vajakino niho'o ni'ima'urijaho oja mihunijara asitaha paranana.