Read Managalasi 1 Koritia 15 Bible Online

1 Koritia 15 - Managalasi bible

1 Koritia 15

¹'Ene iviamaa vwehu nune na vu'a maa maiu'ina ka'ene nara ja najahume ja apejara ka'ene ijara ni'ajihume ja maraniana ka'ene ja ijihuni toi namijuji 'wara'i veju.

²'Ena'omo ira maa maiu'ina ka'ene nara ja najahume ja maraniaji ija kisina'e 'una'avajiana vo jara nimaa rojujaho maa pa'ana'e re'ena.

³Ijihuni maijaho iraka ka'ene nara apejujaho na amura'e areri unenu'u pina ni'ima'ura ja mihuta. Ijaho Godoni irijara 'waramajaho Kerisoho núni sisei jihuna'e kwamana.

⁴'Ejume Hu ranavara'omo na'ia no'opisu pa'are'eme Godoni irijara 'warama ja'ina'e kú'o 'urinana.

⁵'Ene Hu Sipasi oni una'i va'ana. 'Ene iji'a ea iropu ropu no'o puna va'ana.

⁶Ijihuni túna'ijaho Hu vwehu núna mapoka mapoka (500) puni una'i ni'aha kwinu va'ana. Ea 'aho'a iviamaa majaa hina rou kaivo ea 'aho'a ni kwamasahara.

⁷'Ene hu Jemisi oni una'i va'arena iji'a apasorua maho'o puni una'i va'ana.

⁸'Ene túchamaijaho nuni una'i roana. Areri ijí vea kajaho nuni vea paape'eme nahenihare sa'ina.

⁹'Enajihuni maijaho na niho'o apasorua ka'ene hamaijina 'ene 'u'o na apasorua 'wihuna areri pana. Ijihuni maijaho nara Godoni sosia sise'i 'ahie ruarahiuta.

¹⁰'Enakaivo Godoni maiji vwihani'inijara renajihuna'e na iviamai ea irakijaho reju. 'Ene Huni maiji vwihani'ina ka'ene nununa'i venajara maa pa'ana'e rehuna pana kaivo nara kaukara ni'ima'ura ka'ene vejujara ea 'aho'ijija asitahuta. 'Enavo ijaho na pana kaivo Godoni maiji vwihani'ina ka'ene na hu'úmo namujarana.

¹¹Narana ho purana vo nú najahume ja nimaa rojara. Núra 'Urihuni Vu'a

¹²'Enakaivo iviamaa Kerisora kwama 'urinaji rone najahujaho ja ichá'ina'e vene ea 'aho'a joni vajakaho ijá 'wavo Ea ka'ene kwamasahi'inijija pa'urijura 'wavu.

¹³'Enakaivo kwamasahujija pa'urihuna'e re'ipisa Kerisoho 'u'o pa'urija'a.

¹⁴'Ene Kerisoho pa'urinana'e re'ipisa vu'a ka'ene najahujaho ira'ata'e reja'a. 'Ene joni nimairoa 'u'o ira'ata maa pa'ana'e reja'a.

¹⁵Ija'ina'e re'ipisa ivi'a nú 'u'o ira'ata'e 'waravi'ina'e reja'a. Ijihuni maijaho Godira Kerisoho vejume 'urinaji ninama 'warava'a. 'Enajihuna'e ea ka'ene kwamasahajipo pa'urihuna'e re'ipisa Godiho Hu pavejume Kerisoho 'urinana'e reja'a.

¹⁶Ijihuna'e kwamasahi'inijija pa'urijura'e re'avajaho Keriso 'u'o pa'urinana.

¹⁷'Ene Kerisoho pavejume 'urinana'e re'ipisa joni nimaa roijaho maa pa'ana'e reje ja majama joni sisea vaji hija'a. Keriso oni hari uneunecha maho'o irechamajara Huhusumano Keriso oni hara pahinu.

¹⁸'Enajihuna'e ea ka'ene Keriso oni vaji kwamasahajaho 'u'o maho'o pa'areja kajina.

¹⁹'Enakaivo iviamaa hia ka'ene nú hijukeru Kerisoho núna'a mamaa'e re'amajaho nú ea ka'ene niho'o arisi chachanamihuniji rehuna.

²⁰'Enakaivo iviamaa Kerisoho vejume 'urinajaho Hu kwamasahajihipuni amura 'urinajina.

²¹Ijihuni maijaho emahuni vaji kwamasahunijaho rena roana'omo 'u'o emahuni vaji kwamasaha 'urihunijaho rena roana.

²²Ijihuna'e Atamu oni vaji ea maho'o kwamasahura. 'Ene 'u'o Keriso oni vaji venu'e majama hihuna.

²³'Ena'omo 'oi'oi huni 'unama namu. 'Ejume Kerisora amura 'urinana vo túna'i Kerisora ro'amajino Huni ehija 'u'o 'urihuna.

²⁴'E'eje iji'a vea túchamaijaho roa 'e'uhuna. 'Ene vea kajino Hu 'ajohai'ina maho'o 'ee mama'ina 'ee harura maho'o veje parasahuna. 'E'ikaivo ara kwaa ijaho Godi ka'ene Omiji 'unama mahuna.

²⁵'Ene Hu 'ajoha'e hi'eje Huni nakijija maho'o Huni umora hari roa parahuna.

²⁶Naka túchamaa ka'ene veje pa'arehunijaho kwamasahujina.

²⁷Ijihuni maijaho Godira uneunecha maho'o vejume Keriso oni umora hari ro parajara. 'Ene Hu ika 'iamujihuni maijaho uneunecha maho'o Huni hari ro paranana 'iamujara najahujaho Godi ka'ene Keriso oni hari uneunecha maho'o irechamajara Huhusumano Keriso oni hara pahinu.

²⁸'Ene vea ka'ene maho'o Huni hari na'avajaho Harihijaho Hu 'u'o Godi ka'ene Hura uneunecha maho'o Huni hari irechamajihuni hari hihuna. 'Enakaivo Godiho uneunecha kehipuni Natohwa ni'ima'ura.

²⁹'Ene vejuro'i ea ka'ene kwamasaha ijihipuni jihuna'e toi samahajija pu ichá'ina'e ve'eja? Ea ka'ene kwamasahajija pa'urihuna'e re'ipisa 'ú pu irakijihuna'e toa samahare?

³⁰'Ene irakijihuna'e nú vea oma kwinu kwinu varapi vaji aruvo?

³¹Vwehu nune na nimaa'e 'waravu. Na veku veku veniu'e kwavura. 'Ene na núni Natohwa Jesu Keriso oni vaji jonijihuna'e mari'uvura.

³²'Ene nuni hahijihuni ura ijino na hanuha nea pu'úmo Epasasi 'arahuta'e re'ipisa ijaho iraka'e na ni'ajiha'e? 'Ena'omo kwamasahi'inijija pa'urihuna'e re'avajaho veje nú niari nikwamasahe para'enakúne roe ahaja ine 'ee toa sisea ine nanamie oja.

³³'Enakúne ja paki'eje emaapo pisivisa'ava. Ea sisesa pu'úmo ahuma ojujipo veju'e kara mamaa siserasahura.

³⁴'Enakúne hami vwihanareje sisea vejujaho areha! Ijihuna'e ja ea 'aho'a Godi pahene pakavura. Na ikaho ja juname vahi'ena'amarono 'waravu. Haha Ka'ene 'Urihunijihuni Vu'a

³⁵'Enakaivo ea 'ahopo ika'ina'e aporahuna. Ea ka'ene kwamasahi'inijija 'unama ichá'ina'e 'uri'eja? 'Ee pu haha ichá'ina vaji ro'eja?

³⁶Vwiha pa'akere ara 'ina iraka ka'ene 'ojujija pamajikari ahuha ajivura kaivo marako 'uhe 'ee mutausahare'e iji'a ahuha ajivura.

³⁷Ara raka ka'ene 'onujaho maa ka'ene ichá'ina'e rehunijaho pa'onuna kaivo a 'inaru 'onuna. Ijí 'ina kajaho 'witia'ina ho 'ina 'aho'a.

³⁸'Enakaivo Godira ura renuja'ina'e haha mahuna. 'Ene 'ina kwinu kwino haha 'oi'oi punanuna.

³⁹'Ene haha maho'o ani ani'ina hiju. 'Enakaivo emaapuni hahijaho nikwinu'ina 'ee hanuha puni hahijine 'ee pina uka puni hahijine 'ee pina kija puni hahijina.

⁴⁰'Ena'omo akúpa huni haha 'u'una. 'Ee mwe'a puni haha 'u'una. 'Enakaivo akúpa huni hahijihuni mamaijaho ani'ine 'ee mwe'a puni hahijihuni mamaijaho ani'ina.

⁴¹'Ene veakara hananuni 'unamijaho ani'ine 'ee masapijara hananujaho ani'ine 'ee chinapo hanajujaho ani'ina. 'Ene china nikwinu'wi pana 'ee puni hanaji'inijaho ani ani'ina.

⁴²'Ene kwamasahujipo 'uri'avajaho ija'ina. Haha ka'ene sakarahuna ka'ene mwe'i vaji savujaho vea ka'ene 'uri'avajaho pasakarasahuna.

⁴³Ike haha ikehipuni hura paveji'i kwama namu kaivo vea ka'ene kú'o 'uri'amajaho niho'o mamaa'e rehuna. Ike hahakaho ajuasina'e rene kwama namu kaivo vea ka'ene kú'o 'uri'amajaho niho'o haruriji 'urihuna.

⁴⁴'Enakaivo emaahuni haha ka'ene mwe'i vaji apúsavujaho vea ka'ene 'uri'amajaho 'Avena huni haha'e rehuna. 'Ena'omo emaa huni haha na'amajaho 'Aveni jihuni haha 'u'o namu.

⁴⁵Ika'ina 'u'o vejara. Atamu ka'ene ea amurijaho mai'o hiji'ina'e renana kaivo Atamu ka'ene túchamaijaho 'Avena ka'ene majama hihuna vajihi'ina'e renana.

⁴⁶'Enakaivo 'Aveni jihuni hahijaho amura pana kaivo maraku'a hahijihuni jarana kaivo iji'a 'Aveni jihuni jahuna.

⁴⁷Ea amurijaho iki mwe'i rene roana. 'Enajihuna'e hu mwe'a ikehuna. 'Enakaivo vu Ea ka'ene Huni nijahijaho kahi akúpa 'ahi rena roana.

⁴⁸'Enakaivo ea ka'ene mwe'akino 'venajija mwe'a ikehuna. 'Ene 'u'o Ea ka'ene akúpa 'ahi rena roajaho akúpa huna.

⁴⁹'Enajihuna'e iviamaa kakaho núni hahijaho mwe'a kehuni haha sa'ina. 'Ena'avo túna'ijaho akúpa 'ahi hinujihuni haha sa'ina rehuna.

⁵⁰'Ena'omo vwehu nune na ijá 'iavu Haha 'ee 'aa rukinijaho Godoni ara kwaa pavahuna. 'Ene pa'areji'inijaho papa'arehunijaho areri paapehuna.

⁵¹Heha! Na hema pina'e 'wara'i veju. Nú ea maho'o pakwamasahuna kaivo nú maho'o arohe ani'ina'e rehuna.

⁵²'Ene areri nia ahatihu ja'ina'e re'eje tauja ka'ene túchamaa ijara 'ume'eje ea ka'ene kwamasahajija papa'arehuni hahiji'i 'urihuna. 'Ene nú ta'arohe ani'ina'e rehuna.

⁵³'Enajihuna'e ike pa'arehuni hahakaho haha ka'ene papa'arehuniji sahuna. 'Ene ike kwahuni hahakaho rana'i pakwahuni hahijino sahuna.

⁵⁴'Enakaivo vea ka'ene ike pa'arehuni hahakaho are'i kaivo papa'arehunijiano sa'avajaho ike kwamasahujaho pakwamasahunijino sahuna. 'E'eje iji'a ira ka'ene ika'ina'e vejajaho nimaa rehuna. Kwamasahuni harurijaho asivume paranana.

⁵⁵'Ú kwamasahuji oni harura ka'ene niho'o asitaha paranajaho ivi'a ichine? 'Ú kwamasahuji oni mwatumiajaho ivi'a ichine?

⁵⁶'Ene sisei jihuni harurijara mwatumiu'e kwamasahura. 'Ene sisea huni harurijaho Varapijina.

⁵⁷'Enakaivo nú Godi teimani 'wahuna. Ijihuni maijaho Jesu Keriso oni vajijino kwamasahuniji asihuni harurijaho múhana.

⁵⁸'Enajihuni hahi vwehu nune na ja oja mihi'ine kikisima'ura'e rene nami'avara. 'Ene pavarivarivi'ina'e re'avara. 'Enakaivo na'ia mapoka Natohwi jihuni kaukara asisame huri ve'avara. Ijihuni maijaho jara Natohwi jihuni vaji kaukara ka'ene vejujaho maa rukima'ura.