Read Managalasi 1 Koritia 3 Bible Online

1 Koritia 3 - Managalasi bible

1 Koritia 3

¹'Enakaivo vwehu nune na ja 'Aveni vaji emaina'e rejara 'waravu ja'ina'e 'warahuna pana kaivo emaa haha rukina'e 'waravu ja'ina'e 'warame 'ee Keriso oni vaji musia'e 'waravu ja'ina'e 'waravu.

²Na ja 'iruma kisina pavajihuta kaivo musaru vajihuta. Ijihuni maijaho ja mai'o areri pa'ekahuna'e kimarejo avajuta. 'Ene ja iviamaa 'u'o areri paapehuna.

³Ijihuni maijaho ja majano haha huni 'unamijino hijujihuna'e joni vaja ja hine 'ura'arame 'ee sena veti'aravi'i hiju. 'Ú ja Godoni ea pana raka'omo ja ea mamahapo 'urahe ojuja'ina'e ojo?

⁴Ijihuna'e vea ka'ene ei pini na Poru 'ararihau 'iavu'e ea pina na Aporasi 'ararihau 'iamujaho 'ú ja ea ka'ene mwe'a kehunijipo 'wavuja'ina'e 'wavu raka?

⁵Aporasiho ea iraka sa'ine? 'Ee Poruho ea iraka sa'ine? Ijija pwea ka'ene ja puni vaji hena kame nimaa rojajihina. 'Enavo Natohwijara ja 'wara'avarono vejume sama'e rejume pu ja 'waravume hejara.

⁶Nara 'ina 'ojume Aporasira toa vajihana. 'Enakaivo Godira vejume marasahe emarejara.

⁷'Enajihuna'e ea ka'ene 'ina 'onujine 'ee toa vajihuji'o unenu'u pina pana kaivo ni'inijaho Godina. Hura huhusu venau'e marane 'urijura.

⁸Ijihuna'e ea ka'ene 'ina 'onuji'o toa vajihuji'o nikwinu'ina. 'Enakaivo ea kwinu kwino pura kaukara ka'ene vejaja'ina'e eha ija'ina'e 'ekahuna.

⁹'Enajihuna'e nú Godi'i pu'úmo ahuma kaukara veji'ina. 'Eju'e ja Godoni juara 'ee Godoni ara.

¹⁰Godi oni maiji vwihani'inijaho na mihana. Na anesurijina'omo vwiha mamaiji vwihaji'i tukeja savuta. 'Eju'e ea pina ijihuni toi ara vena ajimu. 'Enakaivo veje ea kwinu kwino tukeja 'aha kajino ara ka'ene vena ajimujaho hami kavi'i vena aji'amana.

¹¹'Enajihuna'e ei pini tukeja aneanesina ka'ene Hura samaja'ina'e sahuna areri pana. Ijí tukeja kajaho Jesu Kerisona.

¹²Ea irara tukeja 'aha kajino uné raki 'eke venana'e re'amajaho kahuna. Hu korutia ho siriva ho muna mavarasa'ina ho icha ho mwacha ho nipuati venana'e re'amajaho kahuna.

¹³'Ena'omo vea nituma roe sa'eje ea kwinu kwino puni kaukara ichá'ina ka'ene venujaho 'otua veijino veni vena kive samaa'e rehuna. Ijihuni maijaho vena kajara huhusu ea irara uné raki 'eke ara venajaho vena kihuna.

¹⁴Ea irara huni ara uné raki apene venajara parene ari'amajara hu eha mamaa apehuna.

¹⁵'Eje ea irara huni kaukara ijaho veni rene ari'amajaho hu eha pa'arehuna kaivo hu huhusu marahuna. 'Enavo hu veni nirenana'e aremana.

¹⁶Ja pahene pakavo? Ja Godoni Temiporua'omo Godoni 'Avena joni vaji hinu.

¹⁷'Ena'omo ei pini Godoni Temiporua kaji ruara'amajaho Godira ea kajaho ruarahe pa'arehuna. Ijihuni maijaho Godoni Temiporu ijaho ariramaa akuavi'ina'omo ja ijí Temiporua kajiana.

¹⁸'Ene paveje emaa ori'ini papisivara'amana. Ea irara vea ikehuni vajakino vwihaje hu vwiha mamaa vwihaji'ina ro'amajaho veje maijaho hu roe túa'e renareje iji'a vwiha mamaa vwihaji'ina'e re'amana.

¹⁹'Ene ike mwe'a kehuni vwiha mamaa ijija Godoni una'ijaho maa pana. Ijihuni maijaho Godoni ira vaji ika'ina vejara. Hura Huhusu ea ka'ene vwiha mamaa ijija puni pisivaraa vajijino iji 'uniramuna 'iamana.

²⁰'Ene vukú'o ika'ina'e vejara. Natohwijara ea ka'ene vwiha mamaa vwihaji'inijipo vwiha ichá'ina'e vwihajujaho hena kimuna. Puni vwiha ijija maa pana 'úmana.

²¹'Enakúne ja paki'eje emaapuni vwiha ijija'e 'ararihie kehi kehi o'ava. Ijihuni maijaho uneunecha maho'o ikija jona.

²²'Ena'omo Poruna ho Aporasina ho Sipasina ho mwe'akena ho hia ikena ho kwamasahujina ho uneunecha ka'ene iviamaa ikehunijina ho mai'o rohuna ho uneunecha ikija maho'o jona.

²³Ijihuni maijaho ja Keriso one 'ee Kerisoho Godona.