Read Managalasi 1 Koritia 6 Bible Online

1 Koritia 6 - Managalasi bible

1 Koritia 6

¹Ja rakijihuna'e Godoni ea 'aho'a ka'ene joni rori hijujija aherame 'eka va'e ea ka'ene Godi panimaa rojujihi puni una'a 'otua vetiure? 'Ene ja irakijihuna'e paaherame Godoni eijihi puni va'e ahume 'unama kajaho amairiu'e marasahure?

²'Ú ja pahejo? Godoni ehija ka'ene akuavi'inijipo mwe'akaho 'otua vetihuna. 'Ene mwe'akaho jara 'otua vetihuna'e re'amajaho 'ú ja areri ike varapa ma'u'uakaho areri pahene amairi'eja raka?

³'Ú núra 'ona oji'ina 'otua vetihunijaho ja pahejo? 'Enajihuna'e ja uneunecha ka'ene ike hiakino vejujija areri pahene amairi'eja?

⁴Ijihuna'e ja ea 'ahopu'úmo 'otu irecharavujaho 'ú ja ea ka'ene samai sosia vaja huni hura pavenahi'inijihi iji pijahu'e joni 'otua henaho?

⁵Na ikaho jaae veje juna'avarono 'waravu. 'Ú ea ike joni vajakaho arira'e vwihaji'ina pahinuna'omo hu ja no'o vweune'i joni 'unamijaho areri paamairi'ena?

⁶'Enakaivo vweahi vweaha'e panimaa roji'ina puni una'i 'otui ranamujaho maa raka?

⁷Ja ija'ina'e pavejura'e re'avajaho nimaijaho ja niarihara. Ijihuna'e ja ehu jo pu'úmo hine 'otua veti'aravi'i hiju. 'Ú ja iraka'e vene ijí sisea kajija pamakavo? Ja irakijihuna'e pamaki'eju'e ijara pisimisamo?

⁸'Enakaivo ani'inijaho ja ojono sisea vene vwehu jona pisimisame sise'i 'ahiujina.

⁹'Ú ea ka'ene arira pahijujija Godoni ara areri pavahunijaho ja vi hena kavo? Ja paki'eje emaapo pisimi'ava. Ijihuni maijaho 'asúra kivasa ka'ene 'uasa veji'inijija 'ee ea ka'ene godia ira'ata'e oja mihi'ina 'ee ea 'ahopuni napara 'ee parua aherame oji'ina 'ee parua ka'ene puni haha 'eke monia 'imena'ina 'ee parua parua'e aherame 'oju'e 'ee napara napara aherame oji'inijija areria Godoni ara pavahuna.

¹⁰'Ene nesa apeji'inijija 'ee ea ka'ene uneunecha pupusumano rarena 'ekahuna itunavi'inijija 'ee toa sisea ine nanami'inijija 'ee ea sisea namahe ronahi'inijija 'ee ira'atijino pisimisame nesa apeji'inijija Godoni ara pavahuna.

¹¹Ja ea 'aho'a ikija nimarako 'unama ija'iniji ojara. 'Enakaivo ja somahe 'ee venaume ea akuavi'ina'e rejara. 'Ene Jesu Keriso oni ihijihuni vaja 'ee núni Godijihuni 'Aveni jihuni vaji ja venaume ea arira'e rejara. Joni Hahijija Godi Ura Renuja'ina'e Ve'avara

¹²'Ene uneunecha maho'o na areri vehuna. 'Enakaivo uneunecha maho'o na ni'ajihuna pana. 'Ene uneunecha maho'o na areri vehuna kaivo ijihipuni harura hara na pahihuna.

¹³'Ene 'irumijaho tehwa kehuna 'ee tehwijaho 'irumi jihuna. 'Enakaivo hahijaho 'uasa ve'avarono vehuna pana. 'Enakaivo hahijaho Natohwijihuna 'ee Natohwijaho hahijihuna.

¹⁴'Ena'omo Godiho Natohwijiru veje 'urihuneru pana kaivo Huni harura vajijino nú 'u'o venue 'urihuna.

¹⁵'Ene ja joni hahakija Keriso oni haha pwinana ijaho ja mai'o pahejo? 'Enajihuna'e 'ú na ivi'a ijí Keriso oni haha pwinana'a kajaho apena va'e 'uasa vena o'ejo? Niho'o ija'ina mai'o pana.

¹⁶'Ene 'ú ja pahejure? Ea irara napara 'uasa veji'iniji'i puni haha vajúsaravujaho pu no'o haha kwinu rejura. Ijihuni maijaho Godoni ira vaji ika'ina'e 'waramana. No'o roe haha kwinu rehuna 'úmana.

¹⁷'Enakaivo ea ka'ene Natohwiji'i ihenujaho huni 'avenijaho Huni 'Aveniji'i nikwinu renuna.

¹⁸'Enakúne 'uasa vejujija juha'avara. Ijihuni maijaho sisea 'aho'a ka'ene emaapo vejujaho ijija haha huraruna kaivo ea irara huni haha ea irai 'uasa vejuri 'unamijino ahumujaho huni haha sise'i 'ahae avanu.

¹⁹'Ú oni hahakaho Godoni 'Avena ka'ene Godoni rena roana ka'ene oni vaji hinujihuni Temiporu ijaho a mai'o paheno? 'Enajihuna'e oni hahijaho a'asu onaru pana.

²⁰'Ene ja aneja ni'ima'uri 'imena 'ekarakúne joni hahijaho Godoni pinana'e 'urihunijiru ve'avara.