Read Managalasi 1 Koritia 8 Bible Online

1 Koritia 8 - Managalasi bible

1 Koritia 8

¹Iviamai godi ira'atijihi puni swasa vene 'iruma vajihu jihipuna'e 'waravu. Nú nihena kavu nú ea maho'o henaka rukina. 'Ene henaka pu veju'e kehi kehi vejura kaivo oja 'ekaravujara ni'ajihe 'unirame 'urinaura.

²Ea irara vwihaju'e hu uneunecha maho'o he paraji'ina ronujaho hu hura hehuni ja'inijaho pahenuna.

³'Enakaivo ea ka'ene Godi oja mahujaho Hu hu nihena kamuna.

⁴Ijihuna'e godi ira'atijihi puni 'iruma swasa ka'ene vejuji ijujihi puni vwiha ijí rone 'waravu. Nú nihena kivujaho godi ira'atijipo mwe'a kino nimaa hihuna pana. 'Ene godi 'aho'a pana kaivo Godi nikwinuna.

⁵'Enakaivo ea 'ahopo vwihajujaho Godi niho'o mapoka mapoka'omo 'aho'a kahi 'akúpi 'ahi hiju'e 'aho'a ikino mwe'i hiju rojura.

⁶'Enavo núnuna'ijaho 'aho'a pa'ana kaivo Godi Oma ka'ene Hununa'i uneunecha maho'o rena roara ka'ene nú Hunijihuna'e hijujina. 'Ene Natohwa kwino Jesu Kerisona. 'Ene Huni vaji uneunecha maho'o rejara'omo nú Huni vaji hiju.

⁷'Enavo nimaa roji'ina 'aho'a ike henakakaho pa'ana kaivo ea 'aho'a nija'ina'e godi ira'ata mapokijihi nimaa rone puni 'iruma swasa vena roe iviamaikino usevu. 'Ene pu ijí ijujaho pu godi nimai jihuni swasa vejara'e iju roji'i ijura. 'Eju'e puni vwiha niho'o siserasaha parajura.

⁸Núra 'iruma ka'ene ijujara reje Godiho nú nimaa vetúhuna pana. 'Ene nú 'iruma pai'ava jihuna'e siseranúhuna pana 'ee 'iruma i'ava jihuna'e maranúhuna pana.

⁹'Enakaivo hami 'ajohe ka'avara. Vejuro'i jara matausahe ine vejura paveje ea ka'ene puni nimairoa ajuasi'inijipo amaarenamie arihuniji re'ava.

¹⁰'Enajihuna'e ea ka'ene huni nimairoa ajuasi'inijara ka'eje a ea ka'ene nihena kavi'inijara godi ira'ata puni temiporua vaji 'iruma ija ka'amajaho hu iji'i harura apene 'iruma ka'ene godia ira'atijihi puni swasa vejura ka'ene hu sisea ronujaho hu ihuna.

¹¹Ijihuna'e ike vwea ka'ene Kerisoho hunijihuna'e kwamajaho joni henaka vajijino ea ka'ene huni nimairoa ajuasi'inijaho a ruarahana.

¹²'Ene ijihuna'e a ija'ina ka'ene venujaho Keriso una'i sisea venu 'ee vwehu puna'i sisea venu. 'Ene areri pu uneunecha ka'ene sisea rojujaho ve'avarono harura mihuja'ina'e venu.

¹³Ijihuni hahi 'iruma irakijara veju'e nuni vwea onuna'e re'amajaho na kú'o 'iruma kajija paihuna. 'Enareje paveje núni vwea amaarename ohuna.