Read Managalasi 2 Koritia 1 Bible Online

2 Koritia 1 - Managalasi bible

2 Koritia 1

¹Na Porura Keriso oni apasorua Godira Huni ura ijino iji pijihana. 'Ene Timoti ka'ene núni vweiji'o Godoni sosia maho'o ka'ene Korinitiai namuna 'ee nimaa roji'ina maho'o ka'ene Akea vaji hijujihi puna'e veju.

²Maiji vwihaniuji'o matauvi'ina ka'ene Godi núni Oma 'ee Natohwa Jesu Keriso una'i rena roujaho ja pu'úmuna. Porura Godi Teimani 'Wamajina

³'Ene Godi Amo ka'ene núni Natohwa Jesu Keriso oni Oma. 'Ene Amo ka'ene numiruvi'ina 'ee Godi ka'ene veju'e haha sonahi'iniji ta'aroha.

⁴Núra ahija 'ee varapa piunivujaho Hura nú maho'o venu'e oja sonahúuna. 'Ejura'omo vu núra areri ea ka'ene ahija 'ee varapa ija'ina'e piuni'avajaho Godira nú oja ka'ene vejume sonahúa ja'ina'e nú veje pu 'u'o oja sonahihuna.

⁵Ijihuni maijaho areri Kerisora haha ka'ene hiama ja'ina'e núni vajakaho mapoka'e ija'ina'e renujihuna'e nú 'u'o Keriso oni vaji haha ni'ima'ura'e sonahúhuna.

⁶'Enakaivo nú ahija 'ee varapa piunivujaho ijara reju'e ja hami hene 'ee ijara ni'ajihuna. 'Ene nú sonahúujara reju'e ja sonahiu. 'Ejakame ijaho ja masuani ajuarasahe ahija nikwisu'ina ka'ene núra siseisei hijujaho kirasahe vahuna.

⁷Núni vwiha vajijaho joni nimaa roijaho nianesina'e rejara. 'Ene nú hena kivujaho ja nú pu'úmo ahume sisei hijujihuna'e ja nú pu'úmo hami hihuna.

⁸Ijihuna'e vwehije nú jara pahene pavwihahuni jihuna'e 'waravu. Esia vaji sisea ahija ichá'ina'e núni 'ahi roajaho nú niho'o ahija ni'ima'ura vaji aruvara 'ee núni haruriji'i areri parenana. 'Ejume núni vwiha ijaho núni hia niroe paraju rojara.

⁹Nú nimaa'e nikwamasahuniji núni vajakino irechamúe hijujihuna'e nú onúno panimaa veti'arahuna kaivo Godi ka'ene ea venaue 'urijuji nimaa vetihuna.

¹⁰Hura ahija ni'ima'ura ka'ene kwamasahuni vajijaho ni'ajúhe 'ekue karaa ruva'uana. 'Ene Hura ni'ajúhuna. Nú Huni toi núni nimaa roijaho ranavura'omo Hu majaa ni'ajúhe vahuna.

¹¹'Ene ja 'u'o ni'ajúhe núni siporua 'onuhu. 'Ene ea mapokijihi siporua eha vene núnuna'i mamaa ka'ene venajihuna'e teimani 'wa'avara. Porura Amairiarama Aremajihuni Vu'a

¹²Ijihuna'e núra teamanumujaho ikena. Núni vwiha ijara 'warumujara nú Godoni maiji vwihanii'ina vajijino mwe'a ikehuni vaja 'ee jonuna'a kara mamaa vejara. Nú akuavare Godi ura renuni 'unamijino nimaa nimaiji vejara kaivo mwe'a kehuni vwiha ijihunijaho pana.

¹³'Ene nú uneunecha 'aho'a ani'ina paveju kaivo ike jara tahe hejukeruna. 'Enajihuna'e na nimaa'e vejujaho ja ijihuni maijaho hena va'e urisahuna.

¹⁴Jara areri pwinana'a hena kúvaja'ina'e nú joni maijihuna'e nú núni Natohwa Jesuni veijaho mari'uve ja 'u'o núnijihuna'e mari'uhuna.

¹⁵'Ene ike nimaa vejuri vajakino ja'e 'aha no'ohe'i meraji'amarono na ura nunijaho nimako joni vu'i 'ahiana.

¹⁶Ijaho na Masatonia va'iro va'ujino vuhuna. 'E'ira'omo kú'o Masatonia rena rouji vuhuna. 'Ene jara iji'a ni'ajihe ranamie Jutia vahuna.

¹⁷Ijihuni maijaho na ike ura vu'i vwihajuta ka'ene arevujaho na majikari arevuta raka? 'Ú nuni vwiha ijija na haha huni vwiha ijino vwihane 'ee nara i'a 'ivujija pana 'iame avajura raka?

¹⁸'Enakaivo areri Godi pauchavi'ini ja'ina'e núni vu'ijaho i'a 'iavujaho i'a 'ee pana 'iavujaho pana.

¹⁹Ijihuni maijaho Godi oni Hariha Jesu Keriso rone joni vaja kajino núrane 'ee Siruvenasine 'ee Timotine ijá najahajaho i'a 'iavujaho i'a 'ee pana 'iavujaho pana kaivo Huni vajijaho i'a.

²⁰Ijihuna'e Godira nahama 'waramajija mapoke 'ee icharu navu ijija Huni vaji nimaa. Ijihuna'e Huni vaji Ameni 'wavujaho Godi ta'arohe 'wavu.

²¹'Enakaivo Godira nú ja pu'úmo Keriso oni vaji venume kisina'e rene 'ee merajúhana.

²²'Ene Hura nú 'u'o Huna'e nimaa venarena areri 'Avenijaho núni oja vaji tatua'e vene múhana.

²³'Ene Godira nuni ojijaho kame nimaa'e veti'eju'e ikaho 'waravu. Na Koriniti pavu'ujihuni maijaho na joni hura'e vene makimarejo ijihuna'e pavu'uta.

²⁴Nú joni nimaa roijihuni natohwa rene 'ajoahuna pana kaivo joni temari jihuna'e ja pu'úmo ahume kaukara veji'ina. Ijihuni maijaho joni nimairoa vajijaho ja kikisima'ura'e rene namiju.