Read Managalasi 2 Koritia 11 Bible Online

2 Koritia 11 - Managalasi bible

2 Koritia 11

¹'Ene na hine puruva reti'inapo vejuja'ina'e vene 'warave he'avajaho maki'avara. 'Enakaivo masuani hine ataa apúsame heha.

²Ijihuna'e Godira jonijihuna'e oja ka'ene henuja'ina'e na 'u'o joni oja ija'ina'e heju. Ijihuna'e na parua kwinu vehuna'e nahama 'waravuta. 'Enareje na ja areri 'asúra ariramaa Keriso vajahuna.

³'Enakaivo vejuro'i taparijara huni henaka ira'atijino Ivi pisimia ja'ina'e hu joni vwihaiji 'u'o veje ja Keriso oja nimaa ka'ene mahuji arehunijara na tea junimu.

⁴Ijihuna'e ei pini roe Jesu pina ka'ene nú panajahaji roe naja'ena ho 'avena pina ani'ina ka'ene jara apeja ja'inijaho pana ka'i ani'ina ho vu'a maa maiu'ina ka'ene jara apeja ja'inijaho pana kaivo ani'iniji najahe ja ijihi nimaa vena'e ve'avarono tea junimu.

⁵'Ene na onuno pavwihajujaho na apasorua ka'ene mama'inijihi puni hara ka'ene niho'o túchama ijina paroju.

⁶'Enakaivo na ira hami pa'waravi'ina vo na henaka rukina. Nú ikija nimaa nú vejume jonuna'a uneunecha maho'o samaa renana.

⁷'Ene nara niho'o joni hari roe ja 'unirame ahasirima'e 'ee Godoni vu'a maa maiu'iniji ja'e eha pa'a najahujaho na sisea vene avajuta raka?

⁸Na sosia 'aho'a nesavu ja'ina'e vejuta. Ijihuni maijaho pura na aneja mi'eju'e ja najahu.

⁹'Ene vea ka'ene na ja pu'úmo hijujaho na pivujuta kaivo na ea pina ahija pamahuta. Ijihuni maijaho vea ka'ene vwehipo Masatoniai rena roajino nara pivujujaho maho'o vajihara. 'Enajihuna'e na uneunecha mapokijaho pavejume joni ahija'e renana. 'Ena'omo majaa ija'ina'e vehuna.

¹⁰'Ene areri ike Keriso oni nimaa ka'ene núni vaji hinujihuna'e nara ike temarane vejujaho Akea vaja ea pina patanuhuna.

¹¹Irakijihuna'e? Ijihuni maijaho na ja oja pamihura raka? Nara ja oja ka'ene mihujaho Godira hena kimu.

¹²'Enakaivo nara iraka ka'ene vejujaho na majano vena vahuna. 'Ejakame ea ka'ene 'unama savujija uhusamihuna. 'Ene ea ka'ene 'unama same nú pu pu'úmo kaukara niareri nikwisu'ina veju ronare'e ta'arosaravujija uhusamihuna.

¹³Ijihuni maijaho ea ijá kajija apasorua ka'ene ira'asini jihina. 'Ene kaukara ira'ata veji'ini jihina. 'Ena'omo pu Keriso oni apasorue puna'i veju.

¹⁴'Ene Setani 'u'o ta'arohe areri hanaji'ini jihuni 'ona oji'ina sa'ina'e rehuna.

¹⁵'Enajihuna'e huni pwea 'u'o areri arimaa ijihuni pwea puna'i matesaravujaho na mai'o patata'eju. 'Ene pura kaukara ka'ene vejujihuni eha sisea apehuna. Porura Apasoru Kaukara Veji'i Siseisei Hinajina

¹⁶Na kú'o ijá 'iavu Veje ea pina na vwiha pa'ana paro'amana kaivo ja ija'ina'e ro'avajaho vwiha pa'ane puna'i apeni'avara. 'Ejakame na ma'uako temarauta.

¹⁷Nara raka ka'ene 'waravukija Natohwijara 'waramu ja'ina'e pa'waravu. 'Enakaivo ea vwiha pa'ajipo vejuja'ina'e na onuno nimaa veti'aravi'i ta'arosaravu.

¹⁸Ijihuna'e ea mapoka mwe'a kehuni 'unamijino temaraju jihuna'e na 'u'o temarahuna.

¹⁹Ja vwihajujaho ja hami vwihaji'ina ronare'e ea ka'ene vwiha pa'ajija nimaa teamana'eju'e 'ekura.

²⁰Ijihuna'e ja ea irara pwea 'ekahareje 'anie ruarahe 'ee 'eke hura ura renuja'ina'e 'ahie 'ee huhusu ta'arosarame varinu tahijihujaho ja majaa ata kairasahe hu hu'úmo hijura.

²¹'Ene na niho'o juni'eju'e 'waravu kaivo nú manura vene kúvajaho nú niho'o harura pa'ana. Na kú'o vwiha pa'apo 'waravu ja'ina'e 'waravu. Pu 'unama iraka sa'inijino harusina'e rejaja'ina'e núni harura 'u'o ija'ina.

²²'Ú pu Hipurue? Na 'u'o Hipuru. Pu Isureri ore? Na 'u'o Isureri ora. 'Ú pu Eparahami oni amuhije? Na 'u'o Eparahami oni amuja.

²³'Ú pu Keriso oni pwehija raka? Na húmata siseapo 'waravu ja'ina'e 'waravu. Nara niho'o pu asitahuta. Nara kaukara ka'ene vejujara pu asitahana. 'Ene nara na'ia mapoka'e tipurai hijujara pu asitahana. 'Ene na'e hijihiaji tahuna areria pana 'ee niho'o na'ia mapoka'e kwahuni hari hijuta.

²⁴Jua na na'ia iropu 'aha mapoka (39) hijihiara.

²⁵Na na'ia no'opisu ajiaki hijihiara. 'Ene na'ia kwino muni 'one hijihiara. 'Ene 'aha no'opisu sisima siserajara. 'Ejume vea kwinune 'ee na'ia kwinu ijá karo soha rira karohi imwasami'i venana.

²⁶Na veku veku 'unama jojora va'e roura vajijaho na ahija mapoka piunivura. Toa puni ahija anuameji'ina puni ahija nuni aepuni ahija Jenitaru puni ahija 'ee taunua vaja 'ee nechi'a 'ee soha 'ee vwehija ka'ene ira'ata rukinijihi puna'ijaho ahija piunivura.

²⁷Na niho'o kaukara kisina'e vene 'ee 'unama kisinijino hijuta. Na na'ia mapoka'e na'ia nia panejuta 'ee matunime 'ee toa huani'eju'e 'iruma pai ojura 'ee niho'o atuati'eju'e na'ia ateha paraane nejura.

²⁸'Ene uneunecha ikeru pana vo na sosia maho'o ikihi puni ahijiji oja vwihaniare'e siseisei hijura.

²⁹Ea irara harura pa'arenujaho na 'u'o pa'areniuna. 'Ene ea irara sisei vaji arumujaho na niho'o natohwa'e hunijihuna'e vwiha kisina'e vwihajura.

³⁰'Enakaivo na temara'i ve'ujaho iraka ka'ene nuni vaji ajuaranuji na ijihuna'e temarahuna.

³¹Godi ka'ene núni Natohwa Jesu Keriso oni Oma ka'ene aneja púsa pa'a ta'arohujara ki'eju'e na ira'ata paapeju.

³²Tamasikasi vaji kavana ijara Eritasi ka'ene kinijihuni hari Tamasinesi taunua kajaho 'ajohe kamori'i 'ahiume vejara.

³³'Ene na namea vaji ranamie vera titi apúsamiume na huni ija'e juhame arihe aseha va'uta.