Read Managalasi 2 Koritia 2 Bible Online

2 Koritia 2 - Managalasi bible

2 Koritia 2

¹'Ene núra pavuhuna vwihaja jihuni maijaho nara ki'irono vu'u kara reje ja kú'o temukahunijaho na ura pareniana.

²Ijihuna'e na veje ja temuka'amajaho vu irara na venie teamani'ena? Ijaho ea ka'ene nara vejume temuma paranajara.

³Ike uneka kehuni hahi na joni asura vejuta. 'Ene vejuro'i vea ka'ene na vu'ujaho ea ka'ene na venie teamanihunijija paveje na temuki'avarono avajuta. Ijihuni maijaho na ja maho'o nimaa vetiu jihuna'e nuni temarijaho ja maho'o joni temara'e rehuna.

⁴Ijihuna'e haha 'ee oja ni'ima'ura'e hejuta vajijino na nitu'iji'i joni pasia vejuta. Na ja venae temuka'avarono vehuna pana kaivo nara oja ichá'ina ka'ene ja mihuji hena ka'avarono vejuta. Ea Ka'ene Sise'i 'Ahúuji Vwihania Arehuni Vu'a

⁵'Enakaivo ei pini veje ja temuka'amajaho hu paveju'e na temukimu. 'Ene ike temukakaho jonijihuna'e na ikehuni toa vu'a ni'ina pa'warahuna.

⁶'Ene eha ichá'ina ka'ene ea mapokijipo hu mahajara ni arerina.

⁷'Enakúne ja unenu pina ani'ina paveha vo ma vwihane areme 'ee veje oja sonahi'amana. 'Ene vejuro'i ea ijá kajaho temuki niho'o rarena parajakame hua'e kú'o ni'ajahe marahuna areri parehuna.

⁸Ijihuna'e na ja jarirame 'waravu. Jara oja ka'ene hu majaa mahujaho na'avara.

⁹'Ene 'u'o ja uneunecha maho'o areri hene veji'iniji vene ki'i 'ahiume na joni asura vejuta.

¹⁰'Ene ja ea irá uné raka huna'e vwihane are'avajaho na 'u'o pu vwihanie arehuna. Na nimaa'e vwihanie arevu jihuni maijaho na nimaa joni hahijihuna'e Keriso oni una'i avajuta.

¹¹'Ene nú ija'ina'e vejakame Setaniho núnuna'i vehuna ija pa'are'amana. Ijihuni maijaho hura ira'ata ka'ene pisimisamuni 'unamijaho nú mai'o papuruva retúu. Porura Toroasi Vaji Oja Heji'i Hinajina

¹²'Ena'omo vea ka'ene Keriso oni vu'a maa maiu'ini jihuna'e Toroasi roujaho Natohwi jihuni vaji nuni vwicha jaraana.

¹³'Ene na mai'o Taitasi ka'ene nuni vweijaho papiuname nuni oja mai'o paarihe asuma namana. 'Eju'e na pu irechami'i kaivo Masatonia va'uta. Keriso Oni Vaji Asita Ranavajina

¹⁴'Enakaivo Godi teimani 'wavujaho Keriso oni vaji Hura na'ia mapoka venue uneunecha asitaha paraju. 'Ene nuni vaji Huni henaka mamaijaho kwaa ara mapokakino najahu'e pu areri amua maa'e 'uvuja'ina.

¹⁵Ijihuni maijaho nú Keriso oni vaji Godoni una'i amua mamaa'e 'uvu. 'Enakaivo ea ka'ene nimaa roji'ina 'ee panimaa roji'ina maho'o amua kajaho urahuna.

¹⁶Nú ea pihuna'ijaho amua ka'ene kwamasahuniji huna'i rena rou'e kwamasahu ja'ina. 'Ene ea pihuna'ijaho amua ka'ene majama hihuniji huna'i rena rou'e majama hihunija'ina renuna. Ea irara kaukara areri ija'ina ve'ena?

¹⁷'Ene ea 'ahopo vejuja'ina'e Godoni irijaho paapene monia vene oju. 'Enakaivo nú Godoni irijaho nimaa Keriso oni vaji 'waravu'e Godi ka'ene nú irechamúume roajihuni una'i 'waravu.