Read Managalasi 2 Koritia 3 Bible Online

2 Koritia 3 - Managalasi bible

2 Koritia 3

¹'Ú nú aneja vene kú'o nú ea irahijijaho rone 'wara'eja? 'Ene 'ú ea 'ahopo vejuja'ina'e asura vene nú ea irahijijaho rone 'wara'eja?

²Ja núni asura ka'ene joni oja vaji vejara ka'ene ea maho'o hena kime tahujina.

³Ja Keriso oni asura ka'ene emaapo ta'ahunijina. Ike asura ikija ipua pavejara kaivo Godi ka'ene mai'o hiji'ini jihuni 'Aveni muna 'aha pana kaivo emaapuni oja vaji veju'e núra 'ajoha hiju.

⁴'Ene ijija Keriso oni vaji Godina'i nimaa vena paraju.

⁵Nú onúno areria pana. 'Ene uneunecha núnuna'i rena rohuna pavwihaju kaivo nú areri renuhunijaho Godoni rena roana.

⁶Hura 'u'o venume areri renúana. 'Ejume areri vu'a maiu'ina huni pwea rejara. 'Ene asuri jihuna pana kaivo 'Aveni jihuna'ina. Ijihuni maijaho asurijara 'anie kwamasahuna kaivo 'Avenijara majama hihunijaho mihuna.

⁷Ijí tamana ka'ene muna 'ahi vejara ka'ene kwamasahunijaho hanaji'iniji'i roana. Ijara niho'o Mosisi oni niura ni'ima'ura hanajumakame Isureri ora areri huni niura pakavara. 'Enakaivo ijí hanana kajaho pujaha parana va'ana.

⁸'Ú 'Aveni jihuni kaukara ijaho pinana ni'ima'ura pa'uri'ena raka?

⁹'Ene kaukara ka'ene nú namuhunijaho mavarasa'ina'e re'amajaho ivi'a vu kaukara maiu'ina ka'ene núa'e venume arira'e rejajaho niho'o maijihi ani mavarasa'i maa.

¹⁰Ijihuna'e nimaa'e iraka ka'ene mavarasa'inijaho iviamaa maa pa'ana. Ijihuni maijaho mamaa pina ka'ene hananajara ijaho asima paranana.

¹¹'Enajihuna'e ijí pujaha va'ajara niho'o hanaji'ina'e renana'e re'amajaho ivi'a ike majama nama vahuna kara hananujara maraku orijaho asima paranana.

¹²Nú ijaho nimaa rojujihuna'e nú harura vene kirasahi'i 'waravura.

¹³'Ene nú Mosisira venaja'ina pana. Hu huni urania atehi tanuvu'e Isureri oni harihija arira'e raka ka'ene pujaha va'ujaho pakavara.

¹⁴'Enakaivo puni vwiha ijija tanume kisima'ura rena roe iviasi veakino usevu. Ijihuni maijaho pu vu'a sahasiji tahujaho ijí ateha ka'ene urania vahinamia savu kajaho majaa pa'ekaru va'eju'e navu. Ijihuna'e Keriso oni vaji ijija 'ekaru va'ana.

¹⁵'Ene nitama rene roe iviasi 'e'unujaho vea ka'ene Mosisi oni tamaniji tahujaho atehi puni oja vahinamiu'e navura.

¹⁶'Enakaivo vea irakijino ea irara ta'arohe Natohwi jihuni roujaho ijí ateha ka'ene puni oja vahanamiu'e navu kajija 'eka ruva'u'e pa'arenu.

¹⁷'Ene Natohwijaho 'Aveni jihuna'e ichihachano Natohwi jihuni 'Avenijara hinujaho ijihi kajaho matauvi'inijara namuna.

¹⁸'Enakaivo nú maho'o núni Godi urania unenu'u 'aho'a pavahúnamúu'e navujihuna'e nú areri mane'a'e ahanihu ja'ina'e Natohwi jihuni hanaji'inijaho núni vaji majama ahanihuna. 'Ene nú ta'arohe Hu vare'ina'e rena apene ajima vai'i nahuna. 'Ene hahaji'ina kajaho Natohwa ka'ene 'Aveni jihuni vaji rouna.