Read Managalasi Karesia 1 Bible Online

Karesia 1 - Managalasi bible

Karesia 1

¹Na Poru apasorua ka'ene emaapo iji pijihe rehuna pane 'ee emaapuni haruri rehuna pana kaivo Jesu Keriso oni vaji Godi Amo ka'ene Hua'e vejume kwama 'urinajara iji pijihana.

²'Ene vwehu núna maho'o ka'ene nú pu'úmo hijukipo sosia ka'ene Karesia vaji navujihi 'ajorame veju.

³'Ene maiji vwihanúe 'ee matauvi'ina ka'ene Godi ka'ene núni Oma 'ee Natohwa Jesu Keriso oni rena roajaho ja pu'úmuna.

⁴Hu núni sisei jihuna'e kwamana 'ee areri Godi ka'ene núni Omijara Huni ura ijino niamariarama ja'ina'e ike mwe'a sisea vajakino ni'ajúhe siriruma ruva'ana.

⁵Ijihuna'e pinanijaho niho'o aneja púsa pa'ana'e maho'o majama Huna. Ameni. Vu'a Mamaa Maiu'ina Nikwinuna

⁶'Ene na niho'o puruva retiu. Ijihuni maijaho Godi ka'ene Keriso oni vaji maiji vwihanúe 'umenuajaho ja nimarako rana'i vo vu'a ani'ina maiu'ina 'ararihau.

⁷Ijaho nimai'e ira pina ani'ina pana kaivo pu ea 'aho'a hine a ruarahau. 'Ene Keriso oni vu'ijaho apene ta'arohe ani najahu.

⁸'Ene núrana ho 'ona oji'ini kahi akúpa 'ahi rene roe ira ka'ene nú ja najahukeja are'i kaivo ira pina ani'ina naja'amajaho maka'eje Godira hu siri'amama.

⁹Na nimarako 'waravuta'e na kú'o 'waravu. Ei pini roe ira núra 'waravu ja'ina pana vo ira pina ani'ina'e 'warave he'avajaho maka'eje Godira sirimama.

¹⁰Ijihuni maijaho na iviamaa emaa'e ura rena'avarono avaju ho Godi ura re'amarono 'unama saravu raka? 'Ú na emaa'e ura rena'avarono harura veju raka? 'Ene na emaa'e ura re'avarono saravuta re'ipisa na Keriso oni pwea pareju'u. Porura Apasoru Renani Vu'a

¹¹'Ene vwehu nune maijaho na ura ja nimaa hami hehuna'e ura reniujaho nara vu'a ka'ene najahujija emaapuni rene roe na najahuna pana.

¹²Ijihuni maijaho na emaapuna'a paapejuta 'ee ei pini najihuna pana kaivo Jesu Keriso oni vajijino vejume roe samaa rejume na apejuta.

¹³Nara 'unama ka'ene Jua puni tamana vajijino vejujaho ja nihejura. 'Ene nara ichá'ina'e vene Godoni sosia sise'i 'aha'e 'ee tirakuje pa'are'amarono vejuji manura vehuna areri pana.

¹⁴Na ea ka'ene nú pu'úmo urijajija Jua puni tamanijihuni 'unama niho'o asitahe hena ka parajuta 'ee na harura natohwa vene amuhu núpuni 'unama tamana kajija maho'o 'ararihie ve parajuta.

¹⁵'Enaka'ivo nuni ohijihuni tei vaji Godira veniume na roe 'arihujino Hu ura rejume Huni maiji vwihaniuri vajijino iji pijihana.

¹⁶Hu teamavume Huni Hariha nuni vaji vejume samaa'e rejumakame na Jenitaru puni vaji naja'urono avanana kaivo na maku'a ea ka'ene haha 'ee 'aa rukini jihipuna'a vu'a pasaravuta.

¹⁷'Ene na Jerusaremi pava'e apasorua ka'ene nimarako reja jihipuni va'uta kaivo na va'e Arepia rene kú'o Tamasikasi routa.

¹⁸'Ene juara no'opiso pa'are'eme na iji'a Jerusaremi Sipasi (Pita) ka'irono va'uta. Na ijino na'ia iropu ropune 'ee umora ronu kwino hijuta.

¹⁹'Enakaivo na apasorua 'aho'a pakivuta kaivo Jemisi ka'ene Natohwijihuni 'u'uijiru kavuta.

²⁰Nara iviamaa raka ka'ene jona'e vejukaho na nimaa'e Godoni una'i ja papisimie 'waravu.

²¹'Enarejo na 'urine Siria 'ee Sirisia va'uta.

²²'Enajihuna'e sosia ka'ene Keriso oni vaji Jutia hijujija na pakivi'ina.

²³'Enakaivo pu nuni vu'a ika'ineru hejura Ea ka'ene nitama sisei 'ahúajaho ivi'a nimairoa ka'ene hu nimarako tirakui venaji najahu.

²⁴'Ene pu nuni hahijihuna'e hine Godi ta'arohura.