Read Managalasi Epasasi 1 Bible Online

Epasasi 1 - Managalasi bible

Epasasi 1

¹Na Porura Godoni ura ijino Jesu Keriso oni apasorua rejuta. 'Ena'omo Godoni ehija Epasasi hijura ka'ene Jesu Keriso oni vaji uchaha pa'ajihi puna'e veju.

²Maiji vwihani'ina 'ee matauvi'ina ka'ene Godi núni Oma 'ee Natohwa Jesu Keriso oni rena roajija ja pu'úmuna. Keriso Oni Vaji 'Avena Huni Merajihi'ina

³Núni Natohwa Jesu Keriso oni Godi 'ee Omiji ta'aroha. Hura 'Avena Huni merajihi'ina ka'ene akúpi 'ahi navujija Keriso oni vaji maho'o merajúha paranana.

⁴'Ene Hu nú mwe'a paveji'ini Huni vaji iji pijúhana. 'Ejakame nú Huni una'i oja mahi'ina rene akuavi'ina rene 'ee sisea panamuhi'ina'e re'avarono iji pijúhana.

⁵'Ene Jesu Keriso oni vaji Huni Harihija'e 'ekuhunijaho nitama Huni ura ijino Hu ura renaja'ina'e amairiaramana.

⁶'Ene Huni maiji vwihanii'ini jihuni pinaniji ta'aro'avarono Hura oja múhi'ini jihuni vaji ma'ekuana.

⁷'Ene Hura ori Huni 'aa vajijino ni'ajúhe kú'o 'ekuana. Huni maiji vwihanii'ina ka'ene itu'o'una namuna vajijino núni sisea vwihanúe aremana.

⁸'Ene Hura Huni maiji vwihanii'ina ka'ene itu'ona namuna vajijino vwiha mamaa maho'one 'ee henaka maho'o 'usesamúhana.

⁹Godi Huni ura ijihuni hemijaho vejume núnuna'a samaumaa renana. Godi Huni ura ijino Keriso oni vaji Hu ura renaja'ina'e venana.

¹⁰'Ene vea roe areri rena parajakavi'i uneunecha mapoka Keriso oni vaji ichutoi navura 'ee mwe'i navura 'ekaroe Huni harura hari nahuna.

¹¹Hura nitama Huni ura ijino iji pijúhana. Hura amairiarama ja'ina'e 'ee Huni aachia 'u'o 'ekara. 'Ene uneunecha maho'o Hura ura rene 'ee 'warama ja'ina'e rejara.

¹²'Ejakame ikehuni urijaho nú ea ka'ene amura'e Keriso nimaa rojujaho Huni mamaiji ta'arohuna.

¹³Ja 'u'o Huni vaji Huni ira nimaiji hene 'ee vu'a maa maiu'ina ka'ene ja ni'ajihana ka ja nimaa rojume Huni 'Avena ka'ene nahama 'waramajaho joni vaji Huni tatua vene mihana.

¹⁴Huni 'Avena ka'ene nú múhajaho Huni aachiji 'ekahuna tatua vene múhana. 'Ene Godi Oma'e rehuna'e kú'o 'uname 'imenúa avanana. 'Ene Huni mamaiji ta'aro'avarono avanana. Poru Oni Siporua

¹⁵Ikehuni hahi na joni vaji Natohwa Jesu nimaa rojuji hene 'ee jara Godoni ehija maho'o oja mihuji hejujaho pa'uhuname paturana'ika'i

¹⁶na jonijihuna'e joni ihi 'urihe siporua 'one teimani 'wavura.

¹⁷'Ejakame núni Natohwa Jesu Keriso oni Godi 'ee Oma ka'ene pinana rukinijara vwiha ka'ene vwiha mamaa vwihane 'ee jonuna'a veje samaumaa rene 'ee Hu hena kahunijaho samaumaa rehuna.

¹⁸'Ene na siporua 'ojujaho joni oja jaraa kame Hura maa irakijihuna'e ja 'umenaajaho hena kahuna. 'Ene Huni uneunecha mapoka mavarasa'ina ka'ene Huni ehijijipo 'ekujija hena kihuna.

¹⁹'Ene Huni harura ni'ima'ura ka'ene nú nimaa roji'ina kihipuna'i ve'amajaho hena kahuna. Ike harura ni'ima'ura ka'ene núni vaji kaukara venujaho

²⁰ijí harura kajara Kerisora kwamajaho vejume 'urinana. 'Ene vejume akúpi 'ahi Godoni ija mana'inija'i asuma hinana.

²¹Iviamai ikehuni vea ikeru pana kaivo túna'a 'u'o 'ajohai'ina mama'ina harura 'ee harura maho'o 'ee iha icha'ina ka'ene ja 'urihujaho asitaha parane huri hinana.

²²'Ene Godira uneunecha maho'o Huni mumora hari irechamana. 'Ene uneunecha maho'o 'ee sosia Hura húmata rehuna'e mahana.

²³'Ene sosijaho Huni haha ka'ene Hu ijihuni vaji maho'o areri rena paranujina 'ee Hu uneunecha maho'o areri rena paranu.