Read Managalasi Piripai 1 Bible Online

Piripai 1 - Managalasi bible

Piripai 1

¹Poru'o Timoti ka'ene Jesu Keriso oni pwehipo ea ka'ene nimaa roji'ina 'ee eruta 'ee tikonia ka'ene Jesu Keriso oni vaji Piripai hijujihi puna'e veju.

²'Ene maiji vwihanie 'ee matauvi'ina ka'ene Godi núni Omijaho 'ee núni Natohwa Jesu Keriso puni rena roajaho jona. Porura Teimani 'Wamani Siporuijina

³'Ene na'ia mapoka'e ja vwihaniare'e nuni Godiji teimani 'wavura.

⁴'Ene na na'ia mapoka'e mari'uvi'i maho'o jonijihuna'e siporua 'one jarima 'waravura.

⁵Ijihuni maijaho ja vea ka'ene nimaa rojajino rene vu'a maiu'ina ike ni'ajihe 'waramapene roe iviasi usevu jihuna'e.

⁶Na ike unekakaho nimaa rojujihuni maijaho Hu joni vaji kaukara mamaa ka'ene aneja vena kajaho Hu veje marana apene va'u va'o Jesu Kerisora ro'amajino 'e'uhuna.

⁷Na 'unama ika'ina'e ja maho'o vwihaniu jihuni maijaho ja ea kwinu kwino nuni oja vaja joni tinia navu. Ijihuni maijaho na tipurai hijuta ho vu'a maiu'iniji vahame nimaiji rone 'waravujaho ja na ni'ajihara'omo nú ja pu'úmo maiji vwihanúajaho ahuma apeju.

⁸'Ene Jesu Kerisora oja ka'ene 'ekauni vajijino nara ja'e ki'i 'ahiu'e oja ka'ene hejujaho Godira na kimu.

⁹'Ene na siporua 'ojujihuna'e jara ea 'aho'a oja mihujaho niho'o emarena parane 'ee joni henaka hami vwihane veji'ina'e rehuna.

¹⁰'Enajihuna'e na ura reniujaho ja uneunecha nimaijija hami vwihane hena kivi'i mamaaru vejakame ea ja panama'eje hina va'e Kerisora ro'amani veijino use'avara.

¹¹'Ene 'unama arira ka'ene Jesu Keriso oni rena roajara joni vaja niho'o tinia apena para'ama jihuna'e Godiho aromahe 'ee ta'arohuna. Keriso Onijihuna'e Hiji'i Godoni Ira Najahuna

¹²'Ene vwehu nune na ura ja ike hehuna'e ura reniu. Nuni haha 'ahi uneunecha mapoka ka'ene rejajipo rejume Godoni vu'a maiu'inijaho ni'ima'ura'e rausahana.

¹³'Enajihuna'e sorutia ka'ene kavana ijihuni ara 'ajohi'inijija nara Keriso unijihuna'e tipurai hijujaho ea maho'o nihejume paranana.

¹⁴'Ene nara tipurai hijujara reju'e vwehu nuna ka'ene Natohwi jihuni harura ni'ina'e apene paju'ika'i Godoni vu'a 'waravu.

¹⁵Ea 'aho'ijija niho'o sename ajina'eju'e Keriso rone najahu kaivo ea 'aho'ijija oja maiji vwihaji'i najahu.

¹⁶'Enakaivo vu ea ka'ene vwiha maijija puni ojiji'i najahu. Ijihuni maijaho na vu'a maiu'iniji vaha'urono iji pijihana.

¹⁷'Enakaivo vu ea 'aho'ijaho pu pupusumano vwihajura. 'Enajihuna'e pu oja maa pasavi'i nara tipurai haha heji'i hi'urono vwihaji'i najahu.

¹⁸Irakijara natohwane? 'Enakaivo pu vwiha mamaiji vwihaji'i najahu ho vwiha siseijino vwihaji'i najahujaho unekajaho pana kaivo nimaijaho pu Keriso rone najahujara ni'inijahuna. Ijihuna'e na mari'uvu. I'a ijihuna'e na mari'uhuna.

¹⁹'Ene na niheju jara siporua nuna ka'ene 'ojujara reje Jesu Keriso oni 'Avenijara ni'ajihe na vahanime samai ranamihuna.

²⁰Na ura renia para'eju'e raka ka'ene rehuniji nimaa roji'i hijujaho uneunecha 'aho'a pareje na junihuna. 'Enakaivo na Keriso onijihuna'e paju'ika'i marako vejuja'ina vehuna. 'Ene nuni hia vajakino na mai'o hi'eju ho na kwahuna kaivo na na'ia mapoka'e Kerisoho ta'arohuna.

²¹'Ene na Keriso onijihuna'e hiju kaivo kwa'ujaho na 'u'o eha mamaa'e apehuna.

²²'Enakaivo na hahiji'i hijukaho na kaukara ka'ene 'ina rukiniji vehuna. 'Enajihuna'e na ichá'ina'e vehuna puruva reniu.

²³'Enakaivo ijí ura no'ohe'i kajipo niho'o 'unirime isoma irechami'i veju. Na ura va'e Keriso'i hi'i 'ahiu. Ijihuni maijaho ijaho niho'o mavarasa'i maijina.

²⁴'Enakaivo joni hahijihuna'e ike hahiji hijujara mamaijahuna.

²⁵Ijaho na nimaa'e vejujihuna'e na arema ja pu'úmo maho'o hina va'eje ja 'urina joni nimairoa vajijino emarene temarasahuna.

²⁶'Ejakame na 'uname joni vu'e ja na ki'ava jihuna'e Jesu Keriso oni vaji niho'o teamaname oja sonahia parahuna.

²⁷'Enakaivo joni kara 'unama mamaa ira maiu'ina ka'ene Jesu Keriso rone 'waramu ja'ina'e heha. 'E'irakúne na vu'e ja ki'eju ho na arema hi'ujaho nara hehuna'e ura reniujaho ja kisina'e namine oja 'ee vwiha kwisu rene ahume vu'a maiu'ina ka'ene nimaa roijihuna'e harura pina veju.

²⁸Ja paki'eje joni nakijipo ninamaujipo veje tea juna'ava. Ijí kara kajara najahujaho pu tirausahe parahuna. 'Enakaivo Godira ja ni'ajihuna.

²⁹Ijihuni maijaho ja Keriso nimaa rohuneru pana kaivo Hunijihuna'e sisei hihuna 'u'o mihana.

³⁰Nú iviamaa ijihuni vaji ja pu'úmo ahume ahija apeju. Ja na niki'eme na Hunijihuna'e nimako sisei hijuta. 'Ene ja nihena ki'eju'e na iviamaa ijihuni vaja kajino hine harura natohwa'e veju.