Read Managalasi Korasia 1 Bible Online

Korasia 1 - Managalasi bible

Korasia 1

¹Na Poru ka'ene Jesu Keriso oni pwea Godoni ura ijino rejujara Timoti ka'ene núni vweiji'i veju.

²Godoni ehija akuavi'ina 'ee vwehu nuna ka'ene Keriso oni vaji pauchavi'ina ka'ene Korasi hijujihi puna'e veju. 'Enakúne maiji vwihanie 'ee vivinui matauma hiji'ina ka'ene Godi núni Omijihuna'i rena roajaho ja pu'úmuna. Teimani 'Wavuri Siporua

³Nú na'ia mapoka'e siporua 'ojujaho Godi Amo ka'ene núni Natohwa Jesu Kerisoho jonijihuna'e teimani 'wavura.

⁴Ijihuni maijaho Jesu Keriso oni vaji joni nimaaroa 'ee jara Godoni ea ka'ene akuavi'iniji oja mihuji henare'e avajura.

⁵Ijihuni maijaho iraka ka'ene ja nimaarojura ka'ene akúpi 'ahi navuji'ina. 'Ene nimarako ja vu'a nimaa ka'ene vu'a maa maiu'ina vajijino hejajina.

⁶Ijí vu'a maiu'ina kajara joni roaja'ina'e 'u'o 'e'une kwaa ararakino va'e hine majaa 'ina renu 'ee rausahe emarenu. 'Ene ni areri vea ka'ene ja Godoni maiji vwihanie ijihuni nimaiji hene kavume renaja'ina'e renu.

⁷'Ene ja Epaporasi na'i vu'a kajaho hene kavara. Hu nú pu'úmo kaukara veji'ine 'ee ea pina ka'ene nú oja mahujina. Hu Keriso oni pwea pina ka'ene núni ijihuna'e pauchavi'inijina.

⁸'Ene jara Godoni 'Aveni jihuni vaji ea oja mihujaho hura 'warumana.

⁹Ijihuni hahi nú 'u'o vea ka'ene ijí hejaji rene ojuta pahwe'i hine joni siporua 'ona 'waravakame joni henaka vaja areri rene 'ee Huni ura ijaho hene 'ee 'avena huni vwiha maho'o hena kama parahuna.

¹⁰'Ene ja 'unama mamaa ka'ene Natohwiji ura renuja'ina'e one 'ee Huni hura ve'avara. 'Ene kaukara mamaa ka'ene ja vejujija 'ina rukina'e rene 'ee Godoni henaka vajijino emare'avara.

¹¹'Ene ja Huni hanaji'ina vajijino harura maho'one 'ee vivinui matauma hine 'ee ata kairasahe hihunijaho 'ekakame niho'o temarijara joni vaji rarena'e parani'amana.

¹²Nú Amo teimani 'wavujihuni maijaho Hu venume nú Godoni ea akuavi'ina ka'ene hanaji'ini hijujihi puni aachijija ahuma 'ekahuna.

¹³Ijihuni maijaho Hu nú nututa huni ara kwaijino vahanume siriramúe 'ekue Huni Hariha ka'ene Hu oja mahujihuni ara kwai irechamúana.

¹⁴'Ene Huni vaji nú kú'o 'imenue 'ekuana 'ee Huni vaji sisea vwihane arevume pa'arenana. Keriso Oni Kara 'Ee Huni Kaukara Ichá'inijina

¹⁵'Ene Hu Godia ka'ene nia pakavi'inijihu vare'ine 'ee mai'o uneunecha maho'o re'avarono Hu amura'e ijí hinajina.

¹⁶Ijihuni maijaho uneunecha kivura ho pakivujaho maho'o mwe'a 'ee akúpa 'ahi navujaho Hura venana. 'Ene Hura kiniepo 'ajoahuri ara kwaa 'ee 'ajohai'ina 'ee Huni harura hari hijujija irechamie 'ee uneunecha maho'o kija Hura venarena Huna'e venana.

¹⁷'Ene uneunecha kija maho'o pareji'ini Hu iji hinana. 'Ene Hura uneunecha kija maho'o 'uninamiu'e ahuma navu.

¹⁸Hu 'u'o sosia ikehuni húmata 'ee sosijaho Huni haha. Hu uneunecha maho'o ikihi puni húmata. 'Ene Hura amura kwama 'urinana.

¹⁹Ijihuni maijihuna'e Omaha teamavume Huni kara ijaho maho'o Keriso oni vaji namu.

²⁰'Ene na Huni vaji 'waravu. Godiho uneunecha maho'o kehi pu'úmo 'unama vene kú'o napura venana. Huni 'aa ka'ene korosia 'ahi hirama arihajara uneunecha maho'o ka'ene mwe'i navura ho akúpa 'ahi navujija venaue matauvu.

²¹'Ene ja nimaraku'ijaho apiora 'ee naka'e rene vwiha sisea vwihane sisea veji'i hijara.

²²'Enakaivo Hura hahiji'i kwamana vajijino ja venaume 'unama Hu hu'úmo napura vejara. 'Enarena aherume roe Godoni una'i irechamiu'e ja ivi'a akuavi'ina'e 'ee panamahi'ina 'ee niho'o sisea pina pa'ana'e namiju.

²³'Enakúne ike nimaaroakaho hena vene 'ee ija kisi 'uname namiha. 'Ene ja paki'eje vu'a maiu'ina kara iraka ka'ene rehuna 'waravume hejaji raname arema va'ava. Ijihuni maijaho ike vu'a mamaa maiu'inakaho kwaa ara mapoka ka'ene ike akúpa hari navukipo he'avarono 'waravara. 'Enajihuna'e na Poruho ijí ve'urono iji pijihana. Porura Sosihuni Pwea Rene Kaukara Venajina

²⁴Na teamanimu jihuni maijaho na jonijihuna'e haha hianimu. 'Ene Kerisora Huni haha ka'ene sosijihuna'e sisei hinajihuni pwina ijaho nara sisei hiju'e pa'arenu.

²⁵'Ejume Godira kaukara ka'ene sosia'e 'ajoahe 'ee Godoni ira maho'o ni'ajihe naja'urono iji pijihana.

²⁶'Ene nitama rene juara juara pa'arene 'ee ea tuama apene roajaho hema kaho pavejume samaahiramana kaivo iviamaa Huni ea akuavi'inijihi najahana.

²⁷Ijihuni maijaho Godoni ura ijaho uneunecha mamaa ka'ene ike hema vaji navujija veje Jenitaru hena kahuna. Ijí hema kajaho Keriso ka'ene joni vaji hinujina. 'Ene nimaa roji'inijija. Huni mamaijaho túna'i 'ekahuna.

²⁸'Ene nú ichihichano va'ujaho Keriso rone ea mapoka 'waravu. Nú pu ni'ajihe 'warame 'ee vwiha mamaiji najahura. Ijihuni maijaho nú ea kwinu kwino Keriso oni vaji marana areri rena para'eje vajahuna.

²⁹Na 'u'o ikehuni maijihuna'e kaukara niho'o kisina'e Huni harura natohwa ka'ene nuni vaji namujara veniu'e veju.