Read Managalasi 2 Tesaronia 1 Bible Online

2 Tesaronia 1 - Managalasi bible

2 Tesaronia 1

¹Poru ho Siruvenasi ho 'ee Timoti ijipo sosia ka'ene Tesaronia Godi núni Oma 'ee Natohwa Jesu Keriso puni vaji hijujihi puna'e pasikaho veju.

²Godi ka'ene Omijine 'ee Natohwa Jesu Keriso'o maiji vwihanii'ina 'ee matauvi'iniji vajihama. Kerisora Ro'amaji Eha Ka'ene Mihunijina

³Vwehu núne nú na'ia mapoka'e jonijihuna'e Godi teimani 'wavura. Ijihuni maijaho joni nimaa roijaho niho'o emarena paranu. 'Ene jara oja 'ekaravujaho 'u'o niho'o emarena paranu.

⁴Ijihuni maijaho jara nimaa rone 'ee ea 'ahopo ja sise'i 'ahiu'e haha hinavuri veijino kirasahe namiju jihuna'e nú Godoni sosia vajakaho ja rone ta'arorahe 'waravura.

⁵Jara iki sisei hijujara najuhujaho ja Godoni ari vahuna arerina 'ee Godoni 'otua aririji najuhu. Ijihuni mai jihuna'e ja sisei hiju.

⁶Godiho ariri jihuna'e ea irahipo ja sise'i 'ahiujija Hu 'u'o pu sise'i 'ahihuna.

⁷'Ena'omo túna'i Jesu ka'ene Natohwijara Godoni 'ona oji'ina mama'ina pu'úmo akúpi 'ahi rene ro'avari veijino núni ahisinijaho pi'onave nú ja pu'úmo 'ojuta hwene hihuna.

⁸Pu vena harura vaji ea ka'ene Godi pahena pakame 'ee núni Natohwa Jesuni vu'a maiu'ina pahene vejajihi eha mihuna.

⁹'Ene pu eha sisea ka'ene ape'avajaho niho'o aneja púsa pa'ana'e apene 'ee Natohwi jihuni una'a 'ee Huni hanaji'ini jihuni harura rora maho'o ranave pa'arehuna.

¹⁰Vea ka'ene Hu kú'o 'unama ro'amajaho ea maho'o ka'ene Hu nimaa roji'inijija 'ee Huni ea arimai jihipu'úmo Hu ta'arohe 'ee tata'ora pihuna. Ijihuni maijaho nú raka ka'ene 'waravajaho ja nimaa rojara.

¹¹Ijihunihahi nú 'u'o na'ia mapoka'e joni siporua 'ojura. 'Ejakame núni Godijara ja 'umenajaho arerina 'iahuna. 'Ene uneunecha mapoka ka'ene mamaa re'avarono ja ura renaujija rehuna 'ee raka ka'ene nimaa rojujija haruriji'i rehuna.

¹²Ijihuna'e núni Natohwa Jesuni ihijaho joni vaji ta'arohe 'ee Hu ja ta'arorahuna. Ijihuni maijaho núni Godi 'ee Natohwa Jesu Keriso maiji vwihanúara.