Read Managalasi 2 Tesaronia 3 Bible Online

2 Tesaronia 3 - Managalasi bible

2 Tesaronia 3

¹Vwehu núne túchamaijaho núni siporua 'ojakame Natohwi jihuni vu'akaho mamako rausahakame joni vaji pinana mamaa ka'ene 'urina ja'ina'e ea kajihipuni vaja 'u'o pinana 'uri'amana.

²'Ejakame ea ka'ene vuataa pahene 'ee ea sisea ijihipuni vajijaho 'ajohu'amana. Ijihuni maijaho nú ea 'aho'a mai'o panimaa roji'ina.

³'Enakaivo Natohwijaho pauchavi'ini jihuna'e Hu ja harura mihe 'ee sisea veji'ini jihipuna'ijaho 'ajoahuna.

⁴Jara raka ka'ene venape vahuna ka'ene núra 'waravajaho nú Natohwijihuni vaji nimaa vetiu.

⁵Natohwijara joni oja 'ajohe 'eka'e Godoni oja 'ekaravuri vajijino irechamie 'ee Keriso oni vaji kirasahe namihuniji irechamiama. Kaukara Ka'ene Mahaji Teamana'eje Vehuna

⁶Vwehu núne nú ja Natohwa Jesu Keriso oni ihi 'urahi'i 'waravu. Ea ka'ene núra najahu ja'ina'e pahi'ika'i maiji ucha'asahe hiju jihipuni rora paruva'avara.

⁷Ja ojo nihena kavu. 'Enakúne núra vejuja'ina'e niho'o ve'avara. Ijihuni maijaho jara nú kú'eje nú joni vaji karokaha vehuna niho'o pana.

⁸Nú joni 'iruma majikari pa'ekara kaivo nú 'imejara. Nú 'iruma 'imehuni jihuna'e na'ia veiri'a harura vene kaukara vejura. Ijihuni maijaho ijara veje joni una'i ahija rehuna nú senumana.

⁹Nú jona'e venahu jihuna'e nú ja jarirave ja núni 'iruma venu'ipisa areri reja'a kaivo ja ija'ina venareje joni 'iruma 'ekahuni 'unamiji naja'iro 'ahiu.

¹⁰Nú ja pu'úmo hijari veijino nú ja ni'waravara. Ea irara kaukara pave'ika'i mahi'amajaho 'iruma pai'amana.

¹¹Nú heju'e ja ea 'aho'a karokaha vene kaukara pave'i ucha'asahe mahine earu ronahura.

¹²Núni Natohwa ka'ene Jesu Keriso oni vaji nú jarirame 'waravukúne ea ija'inijija 'warave masuani sonasahe hine puni 'iruma ihuna kaukara opu ve'avara.

¹³'Enakaivo vwehu núne ja 'unama mamaa vehunijaho pasena'avara.

¹⁴Ike pasia vajakino raka ka'ene núra 'waravaji ea pini hena pave'amajaho ja hu hami kavi'i pu pu'úmo paahuvakame hu niho'o juma para'amana.

¹⁵Ja hu naka'e 'ahauja'ina paaha'avara kaivo vweuna 'waramu ja'ina'e ira kisina 'warave he'amana. Vu'a Túchamaijina

¹⁶Natohwa ka'ene matauvi'inijara Huni matauvi'iniji na'ia mapoka 'unama ani ani ja vejujihuniji matauhuna mihu. 'Ene Natohwijaho ja pu'úmo hinu.

¹⁷Na Porura iviamaa 'ajora'i vejukaho na nuni ijakino veju. Nuni pasia mapoka ikihipuni urijaho na nuni iji vejujihuni maijaho ja ki'avajaho nara pasikaho vejuta rohuni jihuna'e veju.

¹⁸Núni Natohwa Jesu Keriso oni maiji vwihaniajaho ja pu'úmuna.