Read Managalasi 1 Timoti 5 Bible Online

1 Timoti 5 - Managalasi bible

1 Timoti 5

¹'Ene ira kisi emaa pa'urara'avara vo omuna'e jarima 'waramu ja'ina'e 'warame 'ee kivasijija vwehuana'e 'waramu ja'ina'e 'wara'amana.

²'Ene paranahijija ohuana'e 'waramu ja'ina'e 'warame 'ee 'asúrijija ma'ipuana'e 'waramu ja'ina'e arira'e vwihaji'i 'wara'amana.

³'Ene amuna ka'ene paranamai jihipuni hura hami ve'avara.

⁴'Enakaivo ijí paranaha amuna kajaho sesahwaha 'ee sahwaha hi'avajaho maki'eje Godi ura renuji najahareje pu kachi'ina opuipo 'ajoha'avara. Ijihuna'e areri emahwapo pu 'ajoaha ja'ina'e eha veja. Ijihuni maijaho 'unama ija'inijara Godiho ura renuna.

⁵'Ene amuna paranamaa ka'ene huhusu hiji'inijaho huni nimaa roijaho Godoni 'ahi raname ea 'ahopuni siporua 'onahe 'ee na'ia veiri'a siporua 'ohuna.

⁶'Enakaivo napara amuna ka'ene huni hahiji maho'o huni ura ijí aremahujaho hu mai'o hinu kaivo hu nimaa nikwamana.

⁷Ike uneunecha kija 'u'o najahakame 'unama ka'ene pu namahunijaho pave'avara.

⁸'Enakaivo ea irara huni kachi'ina 'ee huni kachi'ina ka'ene humaiji hami pa'ahi'amajaho hura raka ka'ene nimaa ronujaho hekajahuna. 'Enajihuna'e ea ka'ene panimaa roji'inijipo vejujaho asitahe ani'ina'e rehuna.

⁹Napara amuna ka'ene huni juara mapoka mapoka (60) ka'ene parua nikwinu vena hinajihuni iha ni'ajihuni vajijino ape'avara.

¹⁰Ijí amuna kajihuni kara mamaa'e 'ee huni sesamaa 'ajoahe pira'eme emarejara 'ee ea apiora hami 'ahiune 'ee ea aririjija umora somahi'ine 'ee ea ka'ene ahija vaji hijujija ni'ajihi'ine 'ee hu mamaijiru vehuna ura reji'ina.

¹¹'Enakaivo napara maiu'ina ka'ene amuni jihipuni iha pave'avara. Ijihuni maijaho puni hahijihuni ura ka'ene parua vehunijara vejakame Kerisoho oja pamahuna.

¹²Pura nimako nahama 'waravaji tuava jihuni maijaho eha sisea apehuna.

¹³'Ene ijiru pana kaivo pu ucha'asahe hine sea sea kino va'e vea nisame ea 'ahopuni vu'a sisea kosarame 'ee ea 'ahopuni kaukara vaji arume raka ka'ene pu pa'warahuna sa'inijaho 'waravi'i hiju.

¹⁴'Enajihuna'e na ura reniujaho napara amuna ka'ene ea maiu'inijija parua vene 'ee sesamaa nahena'e 'ee huni sea 'ajohakame nakijaho vea pamahe pu areri panamahuna.

¹⁵Ijihuni maijaho ea 'aho'a nita'arohe va'e Setani 'ararihau.

¹⁶'Enakúne napara ka'ene nimaa roji'inijaho huni kachi'ina vajijino amuna hi'avajaho hura ni'aja'amana. 'Ejakame sosijaho ahija paape'amana vo sosia amuna ka'ene niho'o nimaa nimaa ni'ajihuniji ni'ajihama.

¹⁷'Ene eruta ka'ene puni kaukara hami 'ajohe 'ee harura vene ira 'warame 'ee najahu jihipuni hura hurahara vena'avara.

¹⁸Ijihuni maijaho Godoni irijaho ika'ina'e 'warumana. Ja paki'eje purumakaua kuatana arinamiava kaivo maka'eje 'iruma iji'i ajima tautae 'o'amana 'ee ea ka'ene kaukara veji'inijija puni eha hami apehuna.

¹⁹Ja paki'eje eruta namahe henareje nimaa'e ve'ava. 'Enakaivo ea no'ohe'ina ho no'opisu nimaa vene 'warave he'avajino he'avara.

²⁰'Ene ea ka'ene hine hura hara sisea veji'i hijujija ea maho'o puni unaa kajino ira kisi 'urara'avara. 'Eje ea 'aho'ijija ijí kimareje tea junave sisea pave'avara.

²¹Na Godiho 'ee Jesu Kerisoho 'ee Huni 'ona oji'ina ka'ene iji pijiha jihipuni una'i pa'uama 'ivi'i 'waravukúne ike 'unama nimaa kija hami 'ajohe ve'avara. 'Enakaivo ja paki'eje ira ka'ene ja najahume hejaja'ina'e vwihaji'i ve'ava. 'Ene oja ka'ene ronukwino rejujaho pasa'avara.

²²A paka'eje mamako ea 'aho'a iji pijihe nama'ama 'ee ea 'ahopuni sisei jihuni pwinana'a re'ama. 'Ene sisea ija irechami'amana.

²³A tomaaru mapoka pai'amana kaivo oni tea vaji atama ka'ene namuna 'ee atama na'ia mapoka'e 'unaramu jihuna'e 'wainia ma'uaku'uku i'amana.

²⁴Ja nivwihaju ea 'aho'a hine sisea veji'i hiju'e ea mapoka hena kime pu eha ape'eja 'wa'eju'e hijura. 'Eju'e ea 'aho'a pura sisea ka'ene vejujaho paki'eju'e navu vo iji'a túna'i samaahiravu'e kivura.

²⁵Ijí 'unama nikwinu'ina kajino ea 'aho'a mamaa ka'ene vejujija kima hejura kaivo vu ea 'ahopo mamaa ka'ene vejujija pahene paki'eju'e navura'omo túna'i roe samaa reje kihuna.