Read Managalasi Taitasi 1 Bible Online

Taitasi 1 - Managalasi bible

Taitasi 1

¹Na Poru Godoni pwea 'ee Jesu Keriso oni apasorua. 'Ene ea ka'ene Godira iji pijiha jihipuni nimaaroa 'ee nimaiji henakame ariramaa hihuna najahu.

²Ijí majama hihuna apehuna ka'ene Godi ira'ata pa'ajara nitama nahama 'warumaji 'ajaha hiju.

³Huni vea apejume ike Huni vu'akaho najahe 'waravume samaa renana. Godi ka'ene núni Ni'ajúhi'inijara nara ve'urono 'warimana.

⁴Taitasi nuni hariha nimaa ka'ene núni nimaaroa nikwinu'ini jihuna'e veju. 'Ene maiji vwihanúana 'ee matauvi'ina ka'ene Godi Amoho 'ee Jesu Keriso ka'ene núni Ni'ajúhi'inijaho a hu'úmuna. Taitasi Kureti Kaukara Veji'i Eruta Iji Pijihajina

⁵Nara a Kuriti ranamau jihuni maijaho kaukara pwinana'a ka'ene namuji ve'amarono avajuta. 'Ene arara kino nara 'waravu ja'ina'e eruta iji piji'amana.

⁶A ea iji piji'amajaho ea ka'ene sisea veji'inijija papiji'amana. 'Enakaivo ea ka'ene napara kwinu kwino savi'inijino piji'amana. 'E'irakúne puni harihija Natohwijaho nimaa rone sisea ani ani pavene 'ee emahwapuni ira papataarorahuna.

⁷Ea ka'ene 'ajoha'inijaho Godoni kaukara hami 'ajohare'e niho'o arira'e 'uraha onuna. 'Ene hu jarika parene 'ee maraku'a pa'ajime 'ee toa sisea huni harura hara pahine 'ee ea majikari pa'anie 'ee monia 'unama sisei jihunijaho pa'ekahuna.

⁸'Enakaivo hu apiora oja mihe hami 'ajoahuna. 'Ene maijiru oja mihuna 'ee hu hami vwihaji'i vehuna 'ee hu ea mamaa 'ee huni kaukara oja mihi'i venuna 'ee hu oja pahiavi'ina 'ee pa'uriji'ina.

⁹Pu vu'a ka'ene arimaaka pu najahujaho ija kisi apene puni una'i saname vejura. Ijá ve'ava jihuna'e vu'a kajara pu ea mapoka areri arira najahe ijara veje ea 'aho'a ka'ene hua'e ninavujija ni'ajihe najahe pu nimaa rohuna.

¹⁰Pu ea mapoka vu'a kajaho pahene veju kaivo pu ira karokaha 'wame ira'ata kajino ea pisivisavura. 'Ene ea ka'ene sisa 'uhui'inijipo ija'ina vejura.

¹¹'Ena'omo ea ija'ina veji'inijija veje areva. Ijihuni maijaho uneunecha ka'ene panajahuna sa'inijaho hine kachi'ina maho'o ruarahe najahu jihuni maijaho pu monia 'eki 'ahiu'e 'unama sisea hine avaju.

¹²Puni ea pina poropetia'omo ijara ija'ina'e 'waramana. Ja Kuriti ora na'ia mapoka ira'ata apejura 'ee hanuha sisesa 'ee uchaha rukine 'iruma isa'ora.

¹³Ijí raka ka'ene hura 'warama kajaho nimaa ariramaa. 'Enakúne a niho'o hami ira kisi najahakame puni nimaaroijaho ija kisi apene puni una'i saname ve'avara.

¹⁴'E'irakúne Jua puni mamiha 'ee emaapuni tamana ani ani'inijija ataa paapúsa'avara. Ea ka'ene nimaa nimaiji pataaro'ika'i ani va'ajihipuni vu'a ataa paapúsa'avara.

¹⁵Ea mapoka puni oja vaja niho'o maa navujaho pu maaru vwihajura kaivo ea ka'ene puni oja vaja sisea name panimaa rojujaho sisearu vwihajura. Puni oja vaja nisakarasaha jihuna'e pura uneunecha ka'ene kime vwihajujaho sisearuna.

¹⁶Pu Godoni ea 'úvu kaivo raka ka'ene pura vejuji nú kivujaho pu nimaa Godoni ea pana. Pu niho'o sakarasahi'ini jihuna'e Godoni ira pataarohura. Pura unenu pina mamaa areri vehuna pana.