Read Managalasi Taitasi 2 Bible Online

Taitasi 2 - Managalasi bible

Taitasi 2

¹'Enakaivo a vu'a nimaa ariramaa ijiru naja'amana.

²'Ene emaa 'u'o 'warave areme sonasahe hine hura vene vwiha hami vwihane 'ee huni nimaaroa arira name 'ee oja aririji mihe 'ee masuani ajuarana hija.

³'Ene paranaha 'u'o 'waravakame pu 'unama maaru vene pu majikari ea panamahe toa sisea puni harura hara pahija kaivo pu uneunecha ka'ene mai ijihunijiru naja'avara.

⁴'Ene pu napara ka'ene maiu'inijija najahe pu masuani mamaa hine paruhwaha oja mihe 'ee kasihwaha oja miha.

⁵'Enareje pu puni vwiha hami 'ajohe 'ee nia pakairasahe 'ee puni sea hami 'ajohe 'ee paruhwapuni ira hene veja. 'Ejakame pu ea 'aho'a Godoni vu'a areri sisea pa'wa'avara.

⁶'Ene 'unama nikwinu'ina kajino kivasa 'u'o 'waravakame puni vwiha hami 'ajo'avara.

⁷A 'u'o uneunecha mapoka ka'ene a ve'amajaho unama mamaaru vejakame pu 'u'o mamaaru ve'avara. A ea naja'amajaho ariraru najahe pu ara raka ka'ene najahu jihuni hura ve'avara.

⁸A niho'o vu'a maaru ea naja'amana. 'Ejakame ea pina a sisea areri pa'wara'amana. 'Ene ninakaravi'inijija junave nú ira sisea areri pa'waru'avara.

⁹'Ene 'unama kajihuna kajino pwea 'u'o 'waravaka puni mama'ini jihipuni iraru hena veja. 'Ene najahakame uneunecha mapoka ka'ene pu ve'avajara puni mama'ina teamanahuna. 'E'irakúne pu ira puna patu'avara.

¹⁰'Enakaivo pu puni mama'ini jihipuni uneunecha ma'u'umaa nesa pa'ekakame pu nimaa vetihuna. 'Ejakame Godi ka'ene núni Ni'ajúhi'ini jihuni irijaho richama para'amana.

¹¹Ijihuni maijaho Godira maiji vwihanúajara ea maho'o maranihuna apena roana.

¹²Ijí Godoni maiji vwihani'inijara nú najuhe nú 'unama sisea arehuna. Mwe'a kehuni 'unama paitunume 'ee hami vwihaji'i hine 'ee ariramaa hine 'ee mwe'i hina apena va'ukaho Godoni 'unama maijino veji'i hi'avara.

¹³'Ena'omo nú vea ka'ene Hura rohuni vea mamaa kaji 'ajaha hine 'ee núni Godia ka'ene ni'ima'urijaho 'ee núni Ni'ajúhi'ina Jesu Kerisora eajarame roa arihuniji 'ajaha hiju.

¹⁴Hu núnijihuna'e kwamana. Nú sisei vaji hi'eme nú Huni ea re'avarono 'eka ruva'uana. Hu nú venume Huni ea arimaa rene 'ee Huni ea ka'ene Hu mamaa nimaijihi rene 'ee nú mamaaru vehuna ura renau.

¹⁵A unekakihi haruriji'i maho'o ni'ajihe najahe 'wara'amana. Veje ea 'aho'a a túa paveta'avara.