Read Managalasi Hipuru 10 Bible Online

Hipuru 10 - Managalasi bible

Hipuru 10

¹Mosisi oni tamanijaho raka mamaa ka'ene rohuni jihuni manura. Nitama swasa ka'ene vejujaho juara kwinu kwinu pa'are'eju'e vena vejura. 'Enavo ijara ea ka'ene roujihi areri venae ariramaa rehuna pana.

²'Enavo ijipo somae ariramaa rena para'ipisa swasa ka'ene vena vejujaho areva'a. Ijihuni maijaho pu niariramaa renae 'ee puni siseiji vwihana temukavu ja'ina pareja'a.

³'Enakaivo juara kwinu kwino pura swasa ka'ene vejujara reju'e puni siseijaho vwinamuna.

⁴Ijihuni maijaho kotia 'ee purumakau 'aijija sisea sove pa'arehuna areri pana.

⁵'Enajihuna'e Keriso ka'ene mwe'i roajara ika'ina 'waramana.A hanuha swasa 'ee swara ura parenau kaivo Ara haha ka'ene amairia mihaji ura renau.

⁶Nitama rene sisei jihuna'e swasa ka'ene veni jae 'ee swara ka'ene vejujaho A mai'o tea pamanamuna.

⁷Ijihuna'e Na ika'ina 'waravu. Ike heha! Oo Godi Na roujaho Oni uraiji ve'i routa. Areri Godoni ira vaji nitama Na rona 'warimaji ve'i routa 'wamana.

⁸'Ene Na kú'o ika'ina 'waravu. A nitama rene hanuha swasa 'ee swara 'ee hanuha veni jaura 'ee swara 'aho'a ka'ene Mosisi oni tamanijara 'waramu ja'ina'e vejujaho A mai'o ura parenae 'ee tea pamanamuna 'wamana.

⁹'Ene Hu kú'o ika'ina 'waramana. Ike heha! Na Oni ura ijí ve'i routa 'wamana. Hu tamaniji pi'ona'i vo maiu'ina rana'iro roana.

¹⁰'Enakaivo Jesu Keriso oni hahijara núnijihuna'e 'aha kwinu swasa vejakame nú ea ariramaa re'avarono Godi ura rena paranana.

¹¹Sosia ni'ajihi'ina natohwijara swasa venuni 'aiju rori namine veku veku swasa nikwisu'ina ka'ene sisea veje niho'o papa'arehuniji hine hura hara venuna.

¹²'Enakaivo Hu sisei jihuni swasa ka'ene venajaho niji 'aha kwinu vejuma parana jihuna'e Hu Godoni ija mana'inija'i asuma hinu.

¹³Hu Huni nakijihi Huni mumora hari irechami'i 'ahaue ijí 'ajiha hinu.

¹⁴Hura ijí swasa ka'ene kwino venajino Hu ea ka'ene iji pijihajija maho'o majama ariramaa rehuna rejara.

¹⁵Godoni 'Avenijara vu'a kaha'i raka ka'ene 'waramaji nimaa 'iamarena Hu ika'ina 'waramana.

¹⁶Natohwijara ijá 'iama Vea kajino Na Nuni vu'a maiu'ina Nuni ehiji jihipuna'e vena'eju. Na Nuni tamana puni oja vaji irechame 'ee Na puni vwiha vaji venahakame pu hena veji'ina rehuna 'iamana.

¹⁷'Enarena Hu kú'o ika'ina 'waramana. 'Ene Na niho'o puni sisea 'ee varapa 'eji'ini jihipuni sisea kú'o pavwiha'eju 'iamana.

¹⁸'Ena'omo sisea vwihana areve pa'are'amajaho kú'o sisea huni swasa vehuna areri pana. 'Unama Maiu'ine 'Ee Majama Hihunijina

¹⁹Ijihuni hahi vwehu núne Jesuni 'aijara renajihuna'e nú paju'ika'i ruha ka'ene Ariramaa Nimaa Nimaiji va'e aruvara.

²⁰Ijihuna'e ateha ka'ene tanuma namujaho Hura Huni hahijino 'unama maiu'ina majama hihuna núnijihuna'e jarauhana.

²¹'Ene nú ivi'a núni Ni'ajihi'ina Natohwa Godoni ara 'ajohu jihuna'e

²²roe nú maarira'e Godoni una'i va'a. 'Ene oja nimaa nimaijino same 'ee Hu nimaa vetia parava. Ijihuni maijaho núni vwiha siseijija Keriso oni 'aijara venume núni siseijija pa'arenuana. 'Ene núni hahijaho toa chiha pa'ajino somuhana.

²³'Enakúne roe núra iraka ka'ene nimaaroa 'wavuji chichopijanamiujaho are'ikaivo ija kisi 'unanava. 'Ene Hura iraka ka'ene nahama 'waramujaho Hu pauchauchahi venuna.

²⁴'Enakúne 'unama ka'ene ni'ajarahuni 'unamijihi vwihane 'ee oja 'ekarame 'ee mamaa vehunijihi vwihaha.

²⁵'Enavo ja Godoni vu'a 'wavuri sei ahuma hine vu'a 'wa'iro ve'avajaho ea 'ahopo vejuja'ina'e paucha'asa'avara kaivo ea 'aho pu'úmo ahuma hine vu'a 'wame ni'ajara'avara. Ija'ina vehuni jihuni maijaho vea ka'ene Jesura kú'o 'unama iki mwe'i rohuna vea nitu'u namu.

²⁶Ijihuna'e nú nimai jihunijaho nihena ape'i kaivo mají sisea vena apena va'ujaho sisea puni swasa kú'o pina vehuna pa'ana.

²⁷'Enakaivo unenu pina ka'iro 'ajohuna pana vo Godoni 'otuiji 'ajohu. 'Ene Huni nakijihi veni ni'ima'uri renahuniji 'ajohu.

²⁸Ei pini Mosisi oni tamaniji pa'ararihaujaho ea no'ona ho no'opisu ijipo nahamaukame panumivura kaivo 'anau'e kwamuna.

²⁹'Ena'omo vwiha'avara! Ea ka'ene Godoni Harihiji túa vetie 'ee 'aa ka'ene nimaa vetiuji chiha rukina 'wame maa pa'ana 'wavujaho 'ú ea ija'inijija Godoni 'Avena ka'ene maiji vwihani'iniji ira sisea 'waravujija eha sisea ni'ima'ura paape'eja raka?

³⁰Ijihuna'e nú Hu nihena kavu. Hura ika'ina 'waramana. Eha vetiujaho Nuna'omo Nara pu eha vetihuna. Hu kú'o ika'ina 'waramana. Natohwijara Huni ehijijija 'otua vetihuna 'iamana.

³¹Unenu'u pina ni'ima'ura ka'ene juhunijaho ikena. Godi ka'ene mai'o hiji'ini jihuni ija tahi sisei jihuni sena ni'ima'ura ka'ene namujija ja apehuna.

³²'Enakúne ja marako Kerisona'i hena kavajaho parunami'avara. Ja vea ka'ene nimaa rojajaho sisea ni'ima'ura apejara vo ja matauma ija kisi 'unama hijara.

³³Na'ia 'aho'a ja 'eka va'e eriri 'urarahe 'ee 'eka hijiha'e 'ee 'aniara. Vea 'aho'a ea 'aho'a 'eka ija'ina 'ahiumakame ja pu ni'ajihara.

³⁴'Ene ea ka'ene tipurai irechamia jihipu'úmo ahuma sisea apejara. 'Ene uneunecha ka'ene ja 'ajohajaho 'etujihara vo ja teamana'eme matauvara. Ijihuni maijaho joni uneunecha mavarasa'ina ka'ene majama nahunijaho ijí 'ajiha namujaho ja nihejara.

³⁵'Enakúne jara Natohwiji nimaa ronare'e ija kisi 'unavakaho uneunecha ani ani'inapo re'avajaho parana o'u'avara. 'Ena'omo joni nimairoi jihuni eha ni'ima'ura navu.

³⁶'Enajihuna'e ja masuani hine pasena'eje Godi oni ura ijaho veji'i hi'avara. 'E'irakúne Hura nahama 'waramajaho 'eka'avara.

³⁷Ea ka'ene rohunaka 'wavujara rohuni vea samatu'u renuna'omo Hu paasinahuna.

³⁸Ea ka'ene ariramaijaho hu huni nimairoa 'ahiji hinu. 'Enavo ea irara Na túchahiujaho Na niho'o pateamanimu 'úmana.

³⁹'Enakaivo nú ea ka'ene Godi túchahae eha sisea ape'iro hijujihi pu vare'ina pana. 'Enavo núni nimaaroijara nú maranúhunijaho 'ajoha'eju'e namu.