Read Managalasi Hipuru 3 Bible Online

Hipuru 3 - Managalasi bible

Hipuru 3

¹'Enajihuna'e vwehu nuna ariramaa Godoni ehija ka'ene Godoni ari va'iro va'ukije Jesu Godoni Apasoru 'ee Ni'ajúhi'ina ni'iniji nú rona 'waravuji vwiha'avara.

²Hu Godi ka'ene Hu iji pijaha jihuna'i majama hami venuna. Areri Mosisira Godoni vu'a 'wavuri sei uneunecha mapoka ka'ene navuji majama hami venuja'ina venana.

³Mosisi oni pinana ka'ene ta'arohunijaho Jesuni pinana ka'ene ta'arohunijara niho'o ni'ima'ura. Areri ara mavarasa'ina ka'ene vejaji ta'arohujaho ea ka'ene ara kaji venaji ta'arohujara asima paranana.

⁴Ara kwinu kwino ea ka'ene ara veji'inijara venuna kaivo Godiho uneunecha maho'o Hu vesihana.

⁵'Enakaivo Mosisiho pwearu rene Godoni sei majama hami 'ajohi'i venuna. Hu raka ka'ene kame henajaho túna'i ijija rona 'warahuna.

⁶Keriso ka'ene Godoni Harihijara majama hami Huni sea 'ajohuna. 'Ena'omo nú nimaa roji'i ija kisi 'unanama hina va'e uri use'avajaho nú sea kajina. Godoni Ehipo 'Ojuta Hwena Hihunijina

⁷Ijihuni hahi Godoni 'Avena ika'ina 'waramana.Iviasi ja Huni ira he'avajaho

⁸ja joni oja paveja kisina re'ama. Areri Isureri opo nechi riri Godina'i ninakarame 'ee pataarohe 'ee vena kavaja'ina pave'avara.

⁹Nechi'a kajine joni opipo Na pu ajihukivi'i pu hine Na vena kivara. Nara raka ka'ene ea areri pavehunaka juara mapoka mapoka (40) vaji vejujaho pu nikavi'i pataarorihara.

¹⁰'Ejumakame Na ike amuja ka'ene hijukipo ajinivumakame Na ika'ina 'waravuta. Puni ojijaho veko veko nikwinu Na túchahehunijiruna. 'Ene raka ka'ene ve'avarono 'waravujaho pavejura.

¹¹Nuni sena vaji ika'ina 'waravuta. Pu niho'o Nuni tinia ka'ene 'ojuta hwena hihunijaho pava'e use'eja 'iavuta.

¹²'Enakúne vwehu nuna hami vwiha'avara! Vejuro'ika'i joni oja sisea 'ee panimaa rojujara veje Godi ka'ene majama hiji'iniji túchaha'ejakúne vwiha'avara.

¹³'Enajihuna'e iviasi 'warumu kaja'ina'e veku veko 'wame ni'ajara'avara. Vejuro'i joni vaji ea pina siseijara pisimie huni oja kisima'ura rehuna.

¹⁴'Enavo nú ija kisi 'uname marako nú hami vejaja'ina'e hami vena va'e uri use'avajaho nú Jesu pu'úmo Huni uneunechijaho ahuma 'ekahuna.

¹⁵Ruramare'e 'waravukaho parunami'avara.Iviasi ja Huni ira he'avara. Ja joni oja paveje kisina re'ama. Areri Isureri opo ninakarame pataaroriha ja'ina pave'avara 'iamana.

¹⁶Ea ijija irahipo Huni ira heji'i Godina'i ninakarame 'ee pataarohare? Ea ka'ene Ijipiti rene Mosisira aherama roajipo avajare?

¹⁷'Ene ea irahipo juara mapoka mapoka (40) vajijaho Godi vejume ajimane? 'Ú ea ka'ene nechi'i sisea vejumakame kwamasahajine?

¹⁸'Ee ea irahija'e Godi Huni sena vaji pu pava'e Huni tinia ka'ene 'ojuta hwena hihunijaho usehuna 'waramane? 'Ú Hu ea ka'ene Huni ira hene pavejujihi rona 'waramane?

¹⁹Ijihuni hahi nú ivi'a kivujaho pu Huni 'ojuta hwena hihuni tinijaho pavahuna. Ijihuni maijaho pu Godi panimaa roju.