Read Managalasi Jemisi 1 Bible Online

Jemisi 1 - Managalasi bible

Jemisi 1

¹Na Jemisi ka'ene Godiho 'ee Natohwa Jesu Keriso oni pweijarana. Jua puni ituha iropu ropu no'o ka'ene rana'arame ani ani va'ajihi puna'e asura ikaho vene 'ajoravu. Nimairoa 'Ee Vwiha Mamaa Ijina

²'Ene vwehu nune hami vwihane nirisa'avara. Vea ka'ene ja venakia ani ani'ina piuni'avari vajijaho temarasa'avara.

³'Ene ja nihejura. Joni nimairoiji vene kivujara reju'e kisina rene hina va'ura.

⁴'Enakúne veje kirasahe va'ujaho roe emarene areri rene para'amana. 'Ejakame ja niho'o emarene areri renae paranareje unenua 'aho'a papivuhuna.

⁵'Enakaivo ja ea irara vwiha mamaiji pa'ana'e rena'amajaho maka'eje hu Godi ka'ene iswasiniji jarivakame Hu teama'eje ma'amana.

⁶'Enakaivo veje hu jarima 'wara'amajaho nimaa roji'i jarime 'wara'amana. Ijihuni maijaho ea irara panimaa ronujaho hu areri asiasi'i roe soha ninavu'e amenu ja'ina'e venuna.

⁷Ea ka'ene ija'inijaho hu paka'eje unenu'u pina Natohwi jihuna'i ape'ena roji'i hi'ama.

⁸Ijihuni maijaho ea ka'ene vwiha no'u no'o vwihanujaho huni 'unamijija mai'o parira kwinu soname namuna. Kukua Pa'amaijine 'Ee Kukua Rukinijina

⁹'Ene vwea nuna ka'ene pivuji'i hinujaho Godira hu aromahuni jihuna'e mari'uvi'i hinama.

¹⁰'Enakaivo veje ea ka'ene monia uneunecha rukima'urijaho huni pinana veje masuani ajuara'amana. Ijihuni maijaho areri sinarapo sonarene navura'omo 'uhue pa'areju ja'ina'e hu kwama va'eje pa'arehuna.

¹¹Ijihuni maijaho vea uhoiji'i ajimujara sinara 'aniu'e puni sona uasahe arihura. 'Ene ijí sinara sona kajihuni niura mamaijaho veju'e pa'areju ja'ina'e ea ka'ene niho'o uneunecha rukina'e re'i 'ahaukame sarama va'una vajijino 'u'o pa'arenuna. Nimairoa Huni Venaka 'Ee Venakú Ijina

¹²Ea ka'ene venakia hari majamano kirana va'amajaho Godira merajahuna. Ijihuna'e hu nimaa'e kirane va'ana'e re'amajaho hu majama hihuni i'esa ka'ene natohwijara ea ka'ene Hu oja mahuji nahama 'waramajaho apehuna.

¹³Ea pina'e siseijara vena ka'amajaho hu paka'eje ijá 'iama Na Godira vena kimana 'iama. Ijihuni maijaho Godiho areri sisea pa'eke ea vena kimuna. 'Ene Hu Huhusu sisea pa'eke ea vena kimuna.

¹⁴'Enakaivo ea kwinu kwino vena kivujaho vea ka'ene hura sisea iraka ka'ene itumujara tairia vau'e sisea venuna.

¹⁵'Ene vea ka'ene itunavujara roe emarena paranujaho sisea nahenuna. 'Ene vea ka'ene siseijara roe anesina'e rena paranujaho kwamasahuna renuna.

¹⁶Vwehu núna ka'ene na ja oja mihi'inakije paveje ea ja pisivisa'avara.

¹⁷'Ene uneunecha maho'o mamaa 'ee swara arira mamaijija ichutoi hanaji'ini jihipuni Omijihuna'i rene roura. Hu pata'arohe ani ani'ina rene 'ee Hu areri nihapo ikehikehi niha rena va'a va'uja'ina pana.

¹⁸Hu Huni ura ijino nú Huni vu'a nimaa vajijino nahenuana. 'Ejakame nú areri Hura uneunecha ka'ene vena jihipuni amurijihi re'avarono avanana. Hene 'Ee Vehunijina

¹⁹'Ene vwehu nuna ka'ene na oja mihi'inakije ja ikaho niheji'ina. Ja ea kwinu kwino mamako hami he'avara kaivo marako pa'warame 'ee pa'ajinavi'ina'e re'avara.

²⁰Ijihuna'e emaa huni ajirijaho pavenau'e Godoni 'unama ariramaa ija'ina paroe rejura.

²¹'Enajihuna'e 'unama ka'ene chiha rukinijija 'ee sisea 'aho'a ka'ene joni vaji navujija maho'o irecha'i kaivo masuani ajuarasahe hi'avara.

²²'Enakaivo ja ojono papisiva'arame vu'aru heji'inaru pare'avara kaivo ira iraka ka'ene ja hejajija hene veji'ina'e re'avara.

²³'Enajihuna'e ea irara Godoni iriji heji'ina'e re'i kaivo paveji'ina'e re'amajaho hu areri ei pini huni niura mane'a vaji kasaramu ja'ina'e venuna.

²⁴Ijihuna'e vea ka'ene hu ori kasarama hi'eju'e hu ea ichá'inijaho ruvu'e pa'arenu ja'ina'e venuna.

²⁵'Enakaivo ea irara varapa arimaa ka'ene vejume hanasina'e apejaji hami piuhahe ijihuni toi hiji'i paruvi'ina'e 'ee hene teama'eju'e veji'ina'e renujaho ea ijaho uneunecha ka'ene hura ve'amajaho niho'o merajahuna.

²⁶'Ene ei pini vwihaje hu mamaa veji'ina ro'ika'i huni mitara hami pa'ajohujaho hu ori pisivaramuna. 'Eju'e hura mamaa ka'ene venujaho ira'ata'e renuna.

²⁷'Ejume 'unama arira mamaa 'ee sisea pa'amaa ka'ene nú vejukame nuni Godi Omijara ura renujaho ikehina. 'Oja 'ee amuna ka'ene pivusahi'i hijujija 'ajohae 'ee mwe'a kehuni siseijaho tatumihi'i va'akame parenuhuna.