Read Managalasi Jemisi 2 Bible Online

Jemisi 2 - Managalasi bible

Jemisi 2

¹Vwehu nuna ja paki'eje núni Natohwa Jesu Keriso ka'ene mavarasa'iniji nimaa roji'ina 'wa'ika'i ea kwinu kwino ura rena'ina'e re'ava.

²Ija'ini jihuna'e jara roe ahuvuri vajijino ei pini ija rinia ka'ene korutia vejajaho ariname ateha maa same roe aruve 'ee ea pivuji'ina pina 'u'o ateha sisesai chiha rukini same roe aruhuna.

³'Ee ea ka'ene ateha mamaa same roaji kavi'i ijá 'wa'ama A roe ike ruha mamaakino asuma hina. 'E'ikaivo vu ea ka'ene pivuji'inijaho ijá 'wa'ama A karokaro va'e namina ho roe nuni mumori namukino asuma hina 'wa'ama.

⁴'Ú ja ivi'a ojono iana vetiarame 'ee vwiha sisea huni 'unamijino mina vetiaravume paranane?

⁵Vwehu nuna ka'ene na ja oja mihi'inakije heha! 'Ú Godiho ea ka'ene mwe'akino pivusahi'ina ka'ene Hu oja mahe 'ee puni nimairoa marasaha parane 'ee aachi'a ka'ene Godoni ari vahunaka nahama 'waramaji apehuna ija papijihana raka?

⁶'Enakaivo ja ea ka'ene pivuji'ini jihuni hura pavenahura. 'Ú ea ka'ene uneunecha rukinijija pu ja paruarahe 'ee pairisamie 'eke 'otua va'ahure?

⁷'Ene Iha mamaa kaji ja 'umejajaho pu ira sisea 'wavura raka?

⁸'Enavo varapa mavarasa'ina ka'ene Godoni ira vaji namujaho ika'ina 'warumana. Ja ea ka'ene joni rori hijujija oja mi'avara. Areri ja ojono joni haha oja mahuja'ina'e mi'avara 'úmana. Ja ija'ina'e ve'avajaho mamaa'e vene avahuna.

⁹'Enakaivo ja hine ronukwino reji'i hi'avajaho ja sisea'e vene avaju. 'Eju'e varapijara 'waramujaho ja sisea veji'ina.

¹⁰Ijihuna'e ea irara varapa 'aho'a 'ajo'i kaivo kwinu enujaho hu varapa maho'o ejume paranana.

¹¹Ijihuni maijaho Hu ika'ina 'warumana. Ja ea 'ahopuni napara patura'avara 'ee kú'o ika'ina'e 'warumana. Ja ea pa'anae kwa'amana 'úmana. 'Ena'omo ivi'a a ea 'ahopuni napara paturamana kaivo a ea 'anaume kwamana'e re'amajaho a varapa 'eji'ina'e renana.

¹²'Enakúne ja iraka ka'ene 'waravu ja'ina'e ve'avara. Ijihuni maijaho hanasina apejuri varapijara ja piuhiha kihuna.

¹³Ijihuni maijaho ea ka'ene ea pihuna'a panumisaramujaho 'otuijaho niho'o ea kajihuna'a panumisarahuna. 'Enajihuna'e numisara ijara 'otuijaho asimana. Nimai Rone 'Ee Vejajina

¹⁴'Ena'omo vwehu nune ei pini hu nimaa roji'ina 'i'ika'i hura one 'ee venujara areri pare'amajaho ijaho ichá'ine? 'Ene nimairoa ija'inijaho hu areri ni'aja'ena raka?

¹⁵Vwea núni pinina ho ma'ini pini ateha 'iruma pa'areje mahi'eje

¹⁶ja ei pini ika 'wahuna Mataume vaha 'ee haha ohoa rena'eje hiha 'ee túame areri rena'eje hiha 'i'i kaivo puni hahijihuni ura ijihi unenu'u 'aho'a pave'amajaho maa irakijihuna'e 'wara'eja?

¹⁷'Enajihuna'e nimairoijara huhusu re'ika'i kara mamaa paveji'ina'e re'amajaho kwamuna.

¹⁸'Enakaivo ei pini ika'ina 'warahuna. A nimairoa rukina 'ee na kara mamaaru veji'ina. 'Ena'omo a kara mamaa pa'ana re'amajaho ichá'ina'e oni nimairoa naji'ena? 'Eje na nuni kara mamaa ka'ene vejujihuni toi nuni nimairoa najahuna.

¹⁹'Ú a nimaa ronujaho Godiho nikwinune? 'Ejume ijaho a mamaa venu. 'Enavo 'avena sisesa 'u'o ijaho nimaa rone niho'o simamaruvi'i hiju.

²⁰'Ene vwiha pa'akera. 'Ú a ura na naja'urono avano? Oni kara maa pa'ana re'amajaho oni nimairoa maa pa'ana.

²¹'Ú Eparahami ka'ene núni omijara kara ka'ene vene huni hariha Aisikiho apene swasa vene 'aijua 'ahi ranamajara rejume hu arira'e renajaho nimaa pana raka?

²²A ivi'a huni nimairoa 'ee huni kara mamaiji'i ahume kaukara venajaho nikamo? Ijihuna'e huni kara mamaijara renajihuna'e huni nimairoa roe areri renana.

²³Ika'ina'e 'warumajara rejume Godoni irijaho roe nimaa'e renana. Eparahamira Godi nimaa ronajihuna'e Hu vejume arira'e renana. 'Ene hu Godoni napura 'wamana.

²⁴A ivi'a nikamo? Ea huni kara mamaijara reju'e ariramaa 'wavura. 'Enakaivo nimaaroaru pana.

²⁵'Ene Rehapi ka'ene 'uasa veji'inijara kara ka'ene venarena ea ka'ene júhi roajihi aherame 'eke 'unama ani irechamiume va'ajaho hu arira parenana raka?

²⁶Ijihuna'e haha ka'ene 'avena pa'ajaho kwamujina. 'Ena'omo 'u'o areri nimairoa ka'ene kara mamaa pa'ajaho kwavi'ina.