Read Managalasi Jemisi 3 Bible Online

Jemisi 3 - Managalasi bible

Jemisi 3

¹Vwehu nune veje ja ea mapoka najahi'ina pare'avara. Ja nihena kavuja'ina'e nú ea ka'ene ija'inijija ni'ima'ura'e eha sisea apehuna.

²Ijihuna'e nú ea maho'o 'unama ani ani'ini tachinamie arihura. 'Enavo ea pina hura ira ka'ene 'waramujino paasusamujaho hu ea arira. 'Ena'omo hu huni haha ori'ini 'ajoarahuna arerina.

³'Ena'omo nú iviamaa hosia puni iri vaji 'auria irechamiakame vu'ataa hejura re'avajaho nú puni hahiji 'u'o maho'o 'eke ura arini irechamihuna.

⁴Heha! Sisima ijija 'u'o mama'ina kaivo hwasisia mama'inapo 'ani'eju'e va'ura. Ija'ina'e sisima 'ajohi'inijara unenu pina ma'u'ui veju'e sisima ichá'ina hu ura renuja'ina'e va'una.

⁵'Ene 'u'o mitarijaho haha pwinana'a ma'u'ua kaivo uneunecha mama'ina kehi kehi 'waramuna. Heha! Nechi'a ni'ima'ura kaivo vena ma'u'ui 'ejanavu'e rena va'una.

⁶'Ene mitariji 'u'o vene 'ee sisea huni tinia. 'Ene mitarijara haha pwinana'a maho'o ruarahuna. 'Ene mitari jihuni harura sisea kajaho veni renuni kwaa ijino rena rou'e 'waramuna.

⁷Ijihuna'e hanuha ani ani'ina uka tapara 'ee uneunecha ka'ene mwe'i tiroha oji'ina sohanuha ijija emaapo 'uninamie 'ajohaura.

⁸'Enakaivo ei pini huni mitara hami 'ajohe sonama nahuna areri pana. Ijaho niho'o sisea ka'ene siheria pa'ana ka'ene maka puna'i 'aninamiu ja'ina itu'ona namu.

⁹Ijí mitara nikwisu kajino nú núni Natohwa 'ee Oma ta'arohura. 'Ene ijí mitara nikwisu kajino nú ea ka'ene Godi vare'ina'e venajija siripavura.

¹⁰'Ene ira nikwisu'ina kajino merajihujaho 'warame 'ee siripavujaho 'waravura. Vwehu nune ike uneunechakija 'unama ija'ina pave'avara.

¹¹'Ú toa úja mamaijaho toa siseiji'i ahume rouna raka?

¹²Vwehu nune matakapo tavo'a rejura raka? 'Ene aja 'ahi mataka 'ina irima navura raka? 'Ene soha areri toa maa re'ena raka? Vwiha Maa Ichutoi Rena Roujina

¹³'Ú ea irara joni vajakaho vwiha hami vwihaji'ine 'ee hena kama paraji'ine? Maka'eje hu huni kara mamaijino vene masuani vwiha mamaijino najahama.

¹⁴'Enakaivo ja niho'o senama parane 'ee joni ojijihuni ura ijiru vwihaji'ina'e re'avajaho pakehi kehi ve'avara. Kehi kehi vejujaho sisea ni'ima'ura ka'ene nimaiji'i ninakaravi'inijina.

¹⁵Vwiha ijá kajaho ichutoi rena rohuna pana kaivo ijaho mwe'a kehuna 'ee haha huni 'unama 'ee 'avena sisea puna'i rena roura.

¹⁶Ijihuna'e ichihichakaro oja sisesa vwihane 'ee ajiname 'ee puni ura ijino pupusu vwihajujipo navujaho sisea ani ani'ina kihune 'ee uneunecha ura arini panahuna.

¹⁷'Enakaivo mamaa ka'ene ichutoi rena roujija ikehina. Amurijaho ariramaa'e matauvi'ine masuani ajuaravi'ine hami vwihaji'ine numisarai rarena paraji'ine kara mamaa'e 'ee karokaha paveji'ina. 'Enakúne pa'aro'aroti namine choichoi pameji'ina'e re'avara.

¹⁸'Ene matauma hihuna 'waravi'inijipo matauma hihuna 'waravu'e roe ariramaa'e rejura.