Read Managalasi 1 Pita 3 Bible Online

1 Pita 3 - Managalasi bible

1 Pita 3

¹Napare 'unama nikwinu'ina kajino paruhu jopuni hari hi'avara. 'Ejakame parua 'aho'a ka'ene ike Irake pahene vejujija ira pa'warahuna vo napahwa puni kara ijipo venae pu nimaa rohuna.

²'Enakaivo pu hine ki'eje jara arira one 'ee epuni hura vene 'ee kara jonijipo reje pu Ira ikaho hene vehuna.

³'Enakúne ja paki'eje sarira ka'ene haha 'ahi húmata muchame ataa 'aunua korutia name 'ee ateha ka'ene same ohuniji natohwa'e vwiha'ava.

⁴'Enakaivo veje joni oja vaji ea ka'ene apúrinanavu'e hinujara kara mamaa pasiserasahuna ka'ene vivinui sonasahe kara ka'ene Godi niho'o ura rena paranujino naja'avara.

⁵Ijihuni maijaho 'unama nikwinu'inakino napara akuavi'i arira'e Godoni vaji nimaa roji'i hijajija 'u'o sarira 'ene paruhwa puni hari hine 'ojara.

⁶'Enajihuna'e Seraho Eparahami oni ira hene venu jihuna'e nuni natohwe 'wamuna. 'Ejume ja huni 'apahija'e rejarakúne hura venaja'ina'e patea juna'eje raka ka'ene arimaijiru ve'avara.

⁷Ja 'u'o paruhwahe hami hena kakaravi'i hijuri 'unamijino napahu jopuni hura hami veji'i hiha. 'Ejakame joni siporua 'unama patanu'amana. Ijihuni maijaho hu napari jihuna'e ajuasina kaivo Godoni maiji vwihanúana ka'ene majama hihunijaho ja no'o ahuma apehuna. Maa Vejujihuna'e Ahia Sisea Apeju

⁸Ike vu'ake tanuhunijaho ikena. 'Enakúne roe ja pu'úmo vwiha kwino vwihane 'ee ea 'ahopuna'i temuka apene 'ee vwehu núna oja mai vwihanie 'ee ja ea ichá'inijaho pavwiha'ika'i oja ajuarasaha.

⁹'Ene roe ea 'ahopo nú sise'i 'ahú'avajaho sisea eha pavene 'ee hu ira sisea 'waru'amajaho nú eha ira sisea pa'warahuna kaivo ira mamaijino 'warava. Ijihuni maijaho ja mamaa'e vehuni jihuna'e Hu ja iji pijihana. 'Ejakame ja aacha mamaa apehuna.

¹⁰Godoni irijaho ika'ina'e 'waramana. Hu ura hami teama'eje hi'iro ve'amajaho huni iriji'o mitariji'o hami 'ajohakame sisea pa'wara'avara 'ee huni ira vaja papisivi'amana.

¹¹'Ene hu sisea are'i kaivo ta'arohe mamaaru ve'amana. 'Ene matauma hihuni 'unamijaho same 'ee 'unama kajihuna kaji veji'i hinama.

¹²Ijihuni maijaho Natohwi jihuni niijaho ea ka'ene ariri jihipuni haha 'ahi namu. 'Ene Huni ataijaho puni siporua he'irono 'ajohu. 'Enakaivo Natohwijaho Huni niura apene ea ka'ene sisea vejujija tanu'urihuna.

¹³A mamaiji vehuna'e ura rena parana'amajaho ea irara a sise'i 'aha'ena?

¹⁴'Enakaivo a mamai jihuni hahi sisei hi'amajaho teamaname 'ee pajume 'ee oja pahwa'usaha'amana.

¹⁵'Enakaivo na'ia mapoka Kerisoho Natohwa roji'i joni oja vaja kajino amura'e rana'avara. 'Ene joni nimaaroiji vahame 'warahunijaho amairiara'irakúne ea 'ahopo ijí he'irono apora'avajaho ja chochumano puni hura veji'i 'wara'avara.

¹⁶'Enakaivo oni vwiha veje arira'e re'amana. 'E'irakúne emaapo vu'a ira'atijino 'wame 'ee a ninama'avajaho oni kara mamaa ka'ene Keriso oni vaji namujara veje pu junahuna.

¹⁷A sisea venajihuna'e sisei hi'amajaho mamaa pana. 'Enakaivo Godi ura renujaho a mamaa ve'ama jihuna'e sisei hi'amajaho mamaa.

¹⁸Ijihuni maijaho Kerisoho ni'aha kwino sisei jihuna'e kwamana. Ariramaa ka'ene sisea pa'ajara sisea rukini jihipuni hahi kwamana. 'Enarena aherume Godoni roana. Hu hahijihuniji kwamana kaivo 'Avena vajijino vejume 'urinana.

¹⁹Hu va'e 'avena ka'ene iviamaa tipurai hijujija vu'a 'waramana.

²⁰Ijija maraku'ijaho vuataa paheji'ina'omo Noa oni veijino Godiho makivi'i vivinui 'ajiha hi'eju'e sisima venana. 'Ene ea iropu no'opisu toa 'aha kajino aherame roana.

²¹Ikara najuhajaho Jesu Kerisora kwama 'urinaji matesarame toi sama najuhu kaivo toi samahujara ni'ajúhe veje núni haha chiha pa'arehuna areri pana. Ijaho vwiha samaa re'amarono Godi jarima 'waravu.

²²Hu akúpa 'ahi ni va'ana'omo iviamaa Godoni ija mana'inija'i hi'eju'e 'ona oji'ina 'ee mama'ina 'ee harura Huni hararu hiju.