Read Managalasi 2 Pita 1 Bible Online

2 Pita 1 - Managalasi bible

2 Pita 1

¹Na Saimani Pita ka'ene Jesu Keriso oni pwea 'ee apasorui ea ka'ene puni nimairoa nikwisu'ina 'ee núni Godi 'ee ni'ajúhi'ina Jesu Keriso oni arira maijihuni vaji núra apejaja'ina'e apejajihi puna'e veju.

²Maiji vwihani'inijine 'ee Matauvi'inijaho joni vaji Godi 'ee Jesu ka'ene núni Natohwi jihuni henaka vajijino emarena paranama. Godira 'Umenae 'Ee Iji Pijihajina

³'Ene Huni harura mamaa ka'ene núra hihuna 'ee arira ohuna maho'o vajúhana. Núra Huni nimaa hena kavari vajijino Hura Huni pinana 'ee mamaa vajijino nú 'umenúana.

⁴Ikehuni hahi Hu Huni uneunecha mavarasa'ina nahama 'waramana. 'Ejakame ja ijihuni vaji mamaa huni pwina rene 'ee mwe'a ka'ene siseijara veju'e siseranujaho juhame karaa usema va'u.

⁵Ivi'a ijihuna'e joni nimaa roijaho harura veje mamaa re'avara 'ee mamaa re'avari vajijino henaka 'u'o aperu umana'avara.

⁶'Ene joni henaka vajijino ojono 'ajoarame kirasahunijaho aperu umana'avara. 'Ene vivinui hijuri vajijino Godoni 'unamaji vejujaho aperu umana'avara.

⁷'Ene Godoni 'unamiji vejuri vajijino vwehu jona hami 'ahi'avara. 'Ene vwehu jona hami 'ahiuri vajijino oja 'ekara'avara.

⁸Ijihuni maijaho kara ikipo jona'e rene 'ee emarena para'avajaho ijipo veje jara núni Natohwa Jesu Keriso hena kavuri 'unamijaho maa pa'ana parehune 'ee 'ina pa'ana parehuna.

⁹Ijihuna'e ea irara kara ikija pa'ajaho hu nia supavi'ina 'ee nia nutuvu'e kwaa jojora uneunecha pakimuna. 'Ene huni sisea nitama'ora ka'ene nisovume paranajaho hu niruvume pa'arenana.

¹⁰'Enajihuna'e vwehu núne ja ijihuna'e 'umenae iji pijiha jihuna'e ura rena para'eje ja kara ikehi ve'avajaho ja pa'amaaresuhuna.

¹¹Ijihuni maijaho 'unama ikehunikino ara majama nahuna ka'ene núni Natohwa Ni'ajúhi'ina Jesu Keriso oni vahuna maho'o ja mihuna.

¹²Ijihuni hahi na na'ia mapoka ja hurahara 'warave ja kara ikija vwihahuna. Ja nihenakame 'ee nimaa vajijino kisina rene hiju vo na majama hine ja huri 'warahuna.

¹³Na vwihajujaho maijaho na ikino hahiji'i mwe'i hijukino ja 'ejahi'i 'warave ja vwihahuna.

¹⁴Nara ikino mwe'i hahiji'i hijujaho ni rana'i veju. Ijaho núni Natohwa Jesu Kerisora vejume nununa'a samaa renana.

¹⁵'Ene na harura ve'ira'omo vea ka'ene nara ura va'ujaho kara ka'ene nara 'waravujija ja areri vwihahuna. Keriso Oni Hanaji'ina Nii Kavajina

¹⁶Ijihuni maijaho vea ka'ene núni Natohwa Jesu Keriso oni harura 'ee Hura rohuniji rone 'waravajaho nú ea ka'ene hena kama paraji'inijipo mamiha vu'a 'wara'ira'omo ijí 'ararihae 'warahuna pana kaivo nú núni nii Huni harura ka'ene kavaji rona 'waravara.

¹⁷Ijihuna'e vea ka'ene Hu hura 'ee pinana Godi Amona'i apenaji pina'inijara ika'ina Hu rone 'waramana. Ikaho Nuni Hariha ka'ene Na oja mahe 'ee teamanima paranujina 'wamana.

¹⁸Nú pu pu'úmo akuavuri huri'a 'ahi hi'eme Irakaho kahi akúpa 'ahi rena roajaho nú núni atai hejara.

¹⁹Ijihuna'e nú niheju. Poropeti epuni ira vaji 'waramajaho roe nimaa'e renana. 'Ena'omo ja puni iriji hene ve'avajaho ja mamaa'e vehuna. Puni vu'a kajaho areri nahehai nututi hana'eju'e vea nitumu ja'ina. 'Ene areri moroi joni oja vaji roe ajimu ja'ina.

²⁰'Enakaivo ikino maraku he'avara. Ijaho poropeti epuni vu'a ichá'ina ka'ene roujaho maiji ei pini huni vwihi ta'arohe 'warahuna pa'ana.

²¹'Ene poropetiepo vu'a ka'ene 'waravajaho emai huni ura ijino vehuna pana kaivo emaa'e Godoni 'Avenijara venaume Godi rone 'waravara.