Read Managalasi 2 Pita 2 Bible Online

2 Pita 2 - Managalasi bible

2 Pita 2

¹'Enakaivo poropetia ira'ata 'u'o ijí emapuni vaja kajino 'urijara. Ni areri ija'ina'e najahi'ina ira'ata 'u'o joni vajakino 'urine vu'a ira'ata ka'ene siserasahunijija hemi najahakame Natohwa ka'ene pua'e 'imenajaho hekajahuna. 'Ene mamako 'unama sisea puni haha 'ahi roe rehuna.

²'Eje ea mapokakija 'uasa vene 'ee puni ura ijí 'ararihae vehuna 'ee puni hahijihuna'e 'unama nimaijaho apene ira'ata 'wahuna.

³'Ene pu pusumano vwihajujara reje 'unama ira'atijino pisivi'i joni kukua 'ekahuna. 'Enakaivo puni eha ka'ene nitama mihajaho mai'o pama namu 'ee pua'e siseranihunijaho ni'urine areri rene namu.

⁴Ijihuni maijaho vea ka'ene 'ona oji'inapo sisea vejajaho Godiho pamakimana kaivo Hu pu ato'arumaume veni va'ara 'ee ma'oa ka'ene nutuvi'ina vaji irechamiu'e 'otua ve'irono hiju.

⁵'Ene nimarako Noa oni veijino mwe'a sahasi ea ka'ene hijajija pamaki'ika'i Noa ka'ene Godoni ira arira najahajine 'ee ea iropu no'o 'ajoha'ika'i toa ranavume ea ka'ene Godi paheju jihipuni roana.

⁶'Ene ara mama'ina ka'ene Satami'o Kamora'o pamaki'ika'i eha mihe venaume va'e ú'a rejajaho ea ka'ene túna'i Godi pa'ana 'wavi'i hihunijipo kahuni jihuna'e najahana.

⁷'Ene Hu Rati ka'ene arimaijaho Satami vaji ea ka'ene 'uasa veji'i hijari vaja kajino sema para'eju'e hi'eme ni'ajahana.

⁸Hu ea ariri jihuna'e hu pu pu'úmo hiji'i raka ka'ene huni nii kime 'ee he'eju'e veku veku pu sisea ka'ene veji'i hijujara vejume huni oja ka'ene aririjaho niho'o tura'i 'ahaana.

⁹'Enakaivo Natohwijara 'unama ichá'inijino ea ka'ene Godi hena kavi'inijihi venakia vaji ni'ajihuna arerina. 'Ene ea ka'ene arira pa'ajija 'otua veijino eha mihuna'e irechamiu'e hiju.

¹⁰Hu ea ka'ene puni hahijara sisea ka'ene ura renauji vene 'ee ea mama'inijihi kima senavujija ijihuni eha namu. 'Ene paju'i kaivo puni ura ijí vene 'ee patea juna'eju'e 'ona oji'ina puni mama'ina ira sisea 'waravura.

¹¹'Enakaivo vu 'ona oji'ina ka'ene mama'ina 'ee harusinijaho pu ira sisea eha pavene Natohwi jihuni una'a panamahe 'waravura.

¹²'Ejume ea ike hanuha sa'ina ka'ene vwiha pa'akipo maiji nahena irechamiu'e ojura'omo 'unirame 'anihuna. 'Ene pu uneunecha mapoka pahena pakivura kaivo pu ira sisea majikari 'waravura. 'Ena'omo ijí hanuha kajihi ruara'avajino pu 'u'o ruarahe pa'arehuna.

¹³Pura sisei hijujihuni maijaho sisea ka'ene pu veju jihipuni eha apeju. 'Ene pu niho'o veiri'a samaumaa kajino sisea vehunijipo teamanama parajura. 'Enakaivo pu niho'o joni vaja kajino areri matana 'ee titana rukinepo na'i ijí 'iruma ijura vaja kajino ira sisea 'waravi'i pisivisavu.

¹⁴'Ene pu puni nia 'eke ema 'ee paranaha sarame 'ee pu nii kime itunavujaho niho'o mai'o pa'uhuname turanavura. 'Ene pu pisiviu'e ea ka'ene pakirasahe hijujija oja 'urinau'e sisea vejura. 'Ene puni ojijaho niho'o pupusumaru vwihahunijara itunama parajura 'ee pu sesamaa siripa'ava ja'ina.

¹⁵'Enajihuna'e pu 'unama aririjaho niare'ika'i Perami ka'ene Piori oni harihijara 'unama sisea ka'ene venuji oja miha paranu ja'ina.

¹⁶'Enakaivo Peramiho sisea ka'ene hu venajihuna'e huni tonikia ka'ene ira pa'ajara emaapuni iri 'urarahe poropetia kaji ajimajaho tanumana.

¹⁷Ea ikija areri toa 'úja ka'ene pa'arene navuja'ina 'ee areri 'imitia'e asiasi'i 'anaa va'uja'ina. 'Ejume ea kajihi puna'e niho'o nutume na'ina'i vajama namuji 'ajaha hiju.

¹⁸Pu niho'o uneunecha ka'ene parehunijija ira kehi kehi 'waravi'i pisimiu'e hahijara ura renaujino ivavisa vena ato'urume ea ka'ene ni'unama sisea arevajija kú'o 'ekaura.

¹⁹'Ene puni ahija veje pa'arehuna nahame 'waravura kaivo pu opuina ijí 'unama sisea ka'ene pu veju kajihipuni pwea rejura. 'Ene uné rakijara emaa rosama paranujaho hu ijihuni pwea renuna.

²⁰'Enajihuna'e ea ka'ene núni Natohwa Ni'ajúhi'ina Jesu Keriso hena kamareja mwe'a kehuni sisea vajijino juhaha usevajipo kú'o va'e sisea kajino jasarame 'ee ijipo rosamie parajujaho puni hia ka'ene ni marako hijaja'ina pana kaivo niho'o sisemaa'e hijura.

²¹'Ejume ea ijá kajija 'unama ka'ene aririjaho pahe'ipisa mamaa veja'a. 'Enakaivo pu varapa ka'ene akuavi'inijija 'waravu'e henare'e túchaha va'ujipo areria pareju.

²²Ijaho haa ka'ene 'warava ja'ina'e renu. 'Ui kú'o 'unama va'e hura hwenaji inuja'ina 'ee maha toa rúrahu'e pa'arejukavi'i kú'o 'uname hii vaji va'uja'ina.